DANIEL 2
2
Nebukanezar lolomme
1Ne syii patǝ gwa ah Nebukanezar mo kaa goŋ ɓo, lolomme. Ɓǝ foo lom ah gaɓ ko pǝlli, ŋhaa ka gak nanǝm ya. 2So goŋ pepee ɗii za syiŋrĩ, za ẽe ciŋ, za kǝndaŋne, tǝkine za yiila sǝr ahe, ka mo gera, mo keera zah lom ah mo loo nyi ko. Ne cok mo gera, ge uura pel goŋe.#Tǝŋ 41:8 3Goŋ faa nyi ra: Ame lolomme, ɓǝ foo lom ah gaɓ me ɓo, ame 'yah ka me tǝ mor ɓǝ lom ahe. 4Za fatan rai zyiira zah goŋ ne zah Aramien#2:4 Sapetǝr 2 verse 4 ŋhaa dai sapetǝr 7 verse 28, ŋwǝǝ ɓo ne zah Aramien. Ne cok ah Yahuduen pǝlli a faara zah Aramien, ako ye zah malii mai za moo faa ne cok ah ŋhaa dai zah'nan Yesu. faara: Masǝŋ mo soɓ tǝtǝl goŋe! Goŋ mo kee ɓǝ lom ah nyi ru, so ru ga cuu mor ɓǝ ah nyi mo.
5Goŋ zyii zah ɓǝǝ faa: Pǝ ɓǝ foo ɓe me foo ɓo, ɓǝ ah uu ɓo naiko: We kee ɓǝ lom ɓe tǝkine cuu mor ah nyi me. We gak ya ɓe, me ga ŋgom suu ɓii ɓǝri ɓǝri, me ga joŋ yaŋ ɓii ra ciŋ gboŋni. 6Amma we kee ɓǝ lom ɓe, tǝkine cuu mor ah nyi me ɓe, me ga nyi fan nyi we pǝlli, me ga yii we ta. Zǝzǝ̃ǝko, we kee ɓǝ lom ah nyi me, tǝkine mor ah daŋ. 7So zyiira zah goŋ faɗa, faara: Goŋ mo kee ɓǝ lom ah sye nyi ru to ɓe, ru ga cuu mor ahe. 8Goŋ zyii zah ɓǝǝ faa: Me tǝ belbel we tǝ kyeɓ ka muŋ cok tǝkolle, mor we kwo ɓǝ mai me foo ɓo ka joŋ wo ɓii ɓe. 9We kee zah lom ah nyi me ya ɓe, me ga ŋgoŋ kiita tǝ ɓii zahki daŋ. We zyeɓ ɓǝ ɓo kǝsyil ɓii ka gin gwah ber nyi me, ŋhaa ka me soɓ ɓǝ mai me foo ɓo ka joŋ myahe. We kee ɓǝ lom ah nyi me. Nai ɓe, me ga tǝ, we gak ka cuu mor ah nyi me ta.
10Za fatan rai zyiira zah goŋ faara: Koo dǝɓ vaŋno wo sǝr ma gak kee ɓǝ mai goŋ mo fii kǝka. Koo goŋ malii ma ne swah daŋ ma gak fii fan mai wo za syiŋ sǝr ah ra, ne za ẽe kǝndaŋ tǝkine za ẽe ciŋ kǝka. 11Ɓǝ mai goŋ mo tǝ fii a pǝgaɓɓe, dǝɓ ma gak cuu mor ɓǝ ah nyi mo kǝka, sai masǝŋ ki ra mai mo kaara ɓo ka kǝsyil dǝfuu ya to.
12Goŋ ɓaŋ kpãh tǝ ɓǝ ah pǝ'manne, so faa, ka mo ikra za fatan goŋ mo pǝ sǝr Babilon daŋ pǝ wulli. 13Ɓǝ ah myah kalle, ka ik za fatan ga lalle, ne Daniel tǝkine palyaŋ ah ra daŋ.
Masǝŋ cuu mor ɓǝ lom ah nyi Daniel
14So Daniel ur kal ge wo Arjok, dǝɓlii sooje ma byak goŋe, mai mo pǝ̃ǝ ɓo ka ga ik za fatan sǝr Babilon pǝ wulli. Syen ɓǝ ma ga faa ne ki ne yella. 15Ge fii Arjok faa: Goŋ nyi ɓǝ lai mai ɓo pǝgaɓ nai mor fẽene? So Arjok kee ɓǝ fan mai mo joŋ daŋ nyi Daniel.
16Daniel kal ge wo goŋe, pǝǝ ko, ka mo nyi cok nyi ko biŋ, ka mo so ge keeko mor ɓǝ lom ah nyi goŋe. 17So Daniel kal ge fah yaŋ ahe, ge faa ɓǝ fan mai mo joŋ ɓo nyi palyaŋ ah Hanania, Miskal ne Azaria. 18Faa nyi ra mo pǝǝra Masǝŋ ma coksǝŋ, mor ka mo kwo syak tǝ ɓǝǝra, so ka mo fiira ko, ka mo cuuko mor ɓǝ tǝsyeɓ ah nyi ra, mor ka mo ikra ra, ne za fatan sǝr Babilon manyeeki ah ra daŋ pǝ wul ka. 19Masǝŋ cuu ɓǝ tǝsyeɓ ah nyi Daniel ne lom ne suŋni, mor ah Daniel so yii Masǝŋ ma coksǝŋ faa:
20Masǝŋ ako ye pa fatanne, a pǝswahe,
Osoko ah ga lii ga lii.
21Ako yee fer cokki, tǝkine zah'nan daŋ,
Ako yee nǝǝ goŋ gin tǝ za goŋe,
Ako yee nyi fatan ne tǝtǝl ma laa mor ɓǝ daŋ nyi zana.
22Ako yee cuu ɓǝ maɗǝk ah ne mai mo muŋ ɓo syeɓ,
Tǝ fan mai daŋ mo muŋ ɓo pǝ cokfuu ɓe.
Kaa ɓo pǝ cokfãi.
23Masǝŋ pa ɓe lii ra, me joŋ osoko nyi mo, tǝkine yii mo.
Mor amo ye nyi fatan ne swah nyi me,
So amo laa juupel ɓe,
Amo cuu ɓǝ tǝsyeɓ goŋ nyi ru ɓe.
Daniel kee ɓǝ lom ne cuu mor ah daŋ nyi goŋe
24So Daniel kal ge wo Arjok, dǝɓ mai goŋ mo faa ɓo nyi ka mo ikko za fatan sǝr Babilon daŋ pǝ wulli, faa nyi ko: Mo ik ra pǝ wul ka, mo ge wo goŋ ne me, me ga kee zah lom ah nyi ko.
25So ne pel gwari sǝ, Arjok zaŋ Daniel kal ge wo goŋ Nebukanezar ne ko, faa nyi goŋe: Ame lwaa dǝɓ ki vaŋno kǝsyil Yahuduen mai mo woora ra ge ɓo nyee ne ko, a ga kee mor ɓǝ lom goŋ nyi ko.
26Goŋ faa nyi Daniel (mai moo ɗii ne Beltesazar ta): Mo gak ka kee ɓǝ lom mai me loo, tǝkine cuu mor ah nyi me daŋ ne? 27Daniel zyii zah goŋ faa: Goŋe, ɓǝ mai mo fii, za fatan maluuri, za kǝndaŋne, ne za syiŋrĩ tǝkine za ma fee ɓǝ ŋwǝǝmǝŋgai daŋ, ka gak keera ɓǝ ah nyi mo ya. 28Amma Masǝŋ ma coksǝŋ, ako ye pa ma joo ɓǝ ma tǝsyeɓɓe. Ako ye cuu ɓǝ fan mai mo tǝ ga joŋ pel nyi goŋe. Zǝzǝ̃ǝko me ga kee mor ɓǝ lom mai mo loo, ne fakwan mai mo kwo pǝ cok swul ɓo daŋ nyi mo.
29Goŋe, ne cok mo swǝ ɓo sǝŋ, amo lolom ne ɓǝ fan mai mo tǝ ga joŋ pelle, Masǝŋ mai moo joo ɓǝ ma tǝsyeɓɓe, ako ye cuu fan mai mo tǝ ga joŋ pel nyi mo. 30Masǝŋ cuu ɓǝ tǝsyeɓ mai nyi me mor ka me kee ɓǝ ah nyi mo goŋe, ka mor me tǝ fan kal za ki ɓo ya, amma mor ka mo laa mor ɓǝ lom ɓo mo loo ɓo, so ka mo tǝ ɓǝ foo mai mo foo ɓo.
31Goŋe, pǝ fakwan ɓo, mo kwo fan pǝ'man na suu dǝɓɓi, a pǝwahe, a sãh worak worak, uu pel ɓo jaŋ, a pǝ ren gal no cam. 32Tǝtǝl fan ma na suu dǝɓ ah a ne vãm kaŋnyeeri masãhe, bii ah ne jol ah ra zyeɓ ɓo ne vãm solai. Ɓǝr ah ne sãh ah a ne vãm syẽ. 33Ɓal ah ra a ne vãm fuu, fuuɓal ah ra, kǝki ne vãm fuu, kǝki ne vuuri. 34Mo so tǝ ẽere, mo kwo tǝsal malii ah hǝr gin tǝwaa ge, bai mai jol dǝɓ mo juu, ge dah fuuɓal foto dǝfuu ma ne vãm fuu ne vuu laŋ bilbil, so myah ra ge lalle. 35So dah fan daŋ, vãm fuu, vuuri, vãm syẽ, vãm solai, ne vãm kaŋnyeeri, fan ah ra daŋ so ciŋ tǝgbana kun zah saŋ mai zyak moo woo kal ne mo ka coŋ ya. Amma tǝsal mai mo ge dah foto dǝfuu, ciŋ waa ma'man ahe, nyiŋ sǝr ne lii ah daŋ.
36Lom ah naiko, zǝzǝ̃ǝ me ga kee mor ah nyi goŋe. 37Amo goŋe, mo ye goŋ malii tǝ za goŋ ra daŋ. Masǝŋ ma coksǝŋ nyi goŋe, ne swahe, ne 'man tǝkine yǝk daŋ ɓo nyi mo. 38Ɓaŋ mo kan goŋ ɓo ne tǝ za sǝrri, ne tǝ faɓal tǝkine juu ma zoo sǝŋ daŋ. Amo ye tǝtǝl ma ne vãm kaŋnyeeri ahe. 39Fahfal ɓo, goŋ maki ah ga urri, amma ka pǝyǝk na mo ya. So fahfal ah goŋ patǝ sai ah ga ur ta, ako ye ma ne vãm syẽ, a ga kaa goŋ tǝ sǝr daŋ. 40So goŋ patǝ nai ah ga urri, a ga yea pǝswah na swah vãm fuu, mor vãm fuu a gak dah fan daŋ, nai ta, goŋ ah a ga myah goŋ camcam daŋ. 41Amo so kwo ɓal ah ne tǝwee ɓal ahe, kǝki ah ne vuuri, kǝki ah laŋ ne vãmme. Goŋ ah ga woŋ gwa, amma goŋ ah ga yea pǝswah tǝgbana vãm fuu, mor mo kwo vãm fuu suuki ɓo ne vuuri. 42So tǝgbana tǝwee ɓal ah ra kǝki ah mo ne vãmme, kǝki ah mo ne vuuri, ɓǝ ah 'yah faa: Goŋ ah kǝki ah ga yea pǝswahe, kǝki ah ka ga yea pǝswah ya. 43Mo so kwo vãm fuu suuki ɓo ne vuuri. Ɓǝ ah 'yah faa: Za goŋ matǝ gwa a ga kyeɓra ka za ɓǝǝ mo taira ki, amma ka gak ya, tǝgbana vãm mo ka gak mgbãa ki ne vuu ya. 44Ne cok zah'nan goŋ ɓǝǝra, Masǝŋ ma coksǝŋ a ga kan goŋ maki ahe, goŋ ah ka ga vǝr a syaŋsyaŋ. Za ki ka ga nyiŋra goŋ ah ya, amma a ga vǝr goŋ marai daŋ, so goŋ mǝ ah yea ga lii ga lii. 45Tǝgbana mo kwo tǝsal hǝr gin tǝwaa ge, bai mai jol dǝɓ mo juu, ge dah foto dǝfuu mai mo zyeɓ ɓo ne vãm fuu, vãm syẽ, vuuri, vãm solai, tǝkine vãm kaŋnyeeri. Masǝŋ mayǝk ye cuu fan mai mo tǝ ga joŋ pel ɓo nyi goŋe, ame kee ɓǝ lom ɓo mo loo ɓo nyi mo njaŋ, mor ah me cuu ɓo nyi mo laŋ, goŋga yo.
Goŋ nyi fan nyi Daniel
46So goŋ Nebukanezar kea ge sǝŋ pel Daniel, ɗǝŋ zahpel ge tǝ sǝrri, so faa ka mo ge joŋra syiŋ tǝkine tǝǝ ɓǝrdi wol ahe. 47Goŋ so faa nyi Daniel: Masǝŋ ɓo kal masǝŋ maki ah ra daŋ, ako ye Dǝɓlii tǝtǝl za goŋ daŋ, ako ye pa ma joo ɓǝ ma tǝsyeɓ ah ra to. Ame tǝ ɓǝ mai mor mo gak kee mor ɓǝ ma tǝsyeɓ mai ge ɓo lalle. 48So goŋ yii Daniel, ɓaŋ ko kan pǝ cok kal mayǝk ahe, nyi fan nyi ko pǝlli ta, soɓ ɓǝ sǝr Babilon daŋ ge pel ahe, ɓaŋ ko kan dǝɓlii ne tǝ za fatan sǝr ah daŋ. 49Daniel so pǝǝ goŋ ka mo soɓko yeɓ sǝr Babilon jol Sadrak, Mesek ne Abednego. Amma Daniel kaa mǝ ah wo goŋe.
Bible Moundang © Alliance Biblique du Tchad, 1996.