AMOS 1
1
1Ɓǝ mai ɓǝ faa Amos yo, ako ye pakǝpii gwii daga yaŋ malaŋ ma ɗii ne Tekoa. Masǝŋ cuu ɓǝ fan mai mo tǝ ga joŋ wo za Israel nyi ko syii gwa kǝpel sǝr mo ge coo. Ne cok ah ka Osias ye kaa goŋ Yuda ɓo, Jeroboam we Joas ye kaa goŋ Israel ɓo.#2 ZaG 15:1-7; 2 KeeƁ 26:1-23; 2 ZaG 14:23-29
2Amos faa: Dǝɓlii ɓyaŋ ɓǝ daga tǝwaa Sion, kyaŋ ah cii gin Jerusalem ge, cok pii fan daŋ yakke, fãa mai mo tǝwaa Karmel daŋ syiŋ hǝram.#Jo 3:16
Kiita Masǝŋ tǝ za jǝk Israel
Siria
3Dǝɓlii faa: Za yaŋ Damaskus joŋra faɓe' ɓo ɓǝrki ɓǝrki. Me ga ŋgoŋ kiita tǝ ɓǝǝ 'manna 'manna, mor ɓeɓra sǝr za Giliat ɓo pǝɓe' no cam.#Esa 17:1-3; Jer 49:23-27; Zak 9:1 4Me ga pee wii ge tǝ yaŋ Hazael goŋ Siria, a ga sye yaŋ ma ne ɓaale ah ra mai goŋ Benhadat mo vuu ɓo. 5Me ga hah zahfah yaŋ Damaskus, me ga vǝr ɓǝ za goŋ Bet-Heden, ne ma cok tǝforoŋ Aven daŋ. Za ga gbahra za Siria kal ga sǝr Kir ne na byakke.
Filistia
6Dǝɓlii faa: Za yaŋ Gaza joŋra faɓe' ɓo ɓǝrki ɓǝrki. Me ga ŋgoŋ kiita tǝ ɓǝǝ 'manna 'manna, mor woora za ɓe daŋ leara fan ne ra ge jol za Edom.#Esa 14:29-31; Jer 47:1-7; Eze 25:15-17; Jo 3:4-8; Zef 2:4-7; Zak 9:5-7 7Me ga pee wii ge tǝ yaŋ Gaza, ɓaale ah tǝkine yaŋ ma ne fan sal gŋ daŋ ga sye wii. 8Me ga vǝr ɓǝ za goŋ Asdod ne Askalon daŋ. Me ga ŋgoŋ kiita tǝ yaŋ Ekron, tǝcoŋ Filistien mai mo coŋra ɓo daŋ a ga wukra.
Tirus
9Dǝɓlii faa: Za Tirus joŋra faɓe' ɓo ɓǝrki ɓǝrki. Me ga ŋgoŋ kiita tǝ ɓǝǝ 'manna 'manna, mor nĩira za ɓe daŋ myah kal ge ɓo sǝr Edom, zyii foora ɓǝ gbanzah mai mo gbǝra ɓo kǝsyil ki ya.#Esa 23:1-18; Eze 26:1–28:19; Jo 3:4-8; Zak 9:1-4; Mt 11:21-22; Lu 10:13-14 10Me ga pee wii ge tǝ yaŋ Tirus, ɓaale ah tǝkine yaŋ ma ne fan sal gŋ daŋ ga sye wii.
Edom
11Dǝɓlii faa: Za Edom joŋra faɓe' ɓo ɓǝrki ɓǝrki. Me ga ŋgoŋ kiita tǝ ɓǝǝ 'manna 'manna, mor foora mor wee pa ɓǝǝ Israel ne salle, kwora syak tǝ ɓǝǝr a. Ɓaŋra kpãh pǝ'manne, soɓra kpãh ɓǝǝ wuu ya.#Esa 34:5-17; 63:1-6; Jer 49:7-22; Eze 25:12-14; 35:1-15; Ob 1-14; Mal 1:2-5 12So me ga pee wii ge tǝ yaŋ Teman, ɓaale ah tǝkine yaŋ ma ne fan sal ma Bosra daŋ ga sye wii.
Ammon
13Dǝɓlii faa: Za Ammon joŋra faɓe' ɓo ɓǝrki ɓǝrki. Me ga ŋgoŋ kiita tǝ ɓǝǝ 'manna 'manna, mor sal mai mo ruura ka ren sǝr ne ko, reara ɓǝr ŋwǝǝ ma ne ɓil Giliat.#Jer 49:1-6; Eze 21:28-32; 25:1-7; Zef 2:8-11 14Me ga pee wii ge tǝ yaŋ Rabba, ɓaale ah tǝkine yaŋ ma ne fan sal gŋ daŋ ga sye wii. Yee ga gaŋ gŋ tǝgbana zah'nan ma ruu salle, tǝnyee ga ɗah gŋ nǝǝ ɓǝm kahnkahn tǝgbana zyak mǝǝzuwuŋ moo nǝǝni. 15Za goŋ ɓǝǝ ne zaluu ah ra daŋ a gara pǝ byak sǝr za ki.
Bible Moundang © Alliance Biblique du Tchad, 1996.