YEƁ ZAPEE 6

Syenra za rǝŋ ka gbah jol zapee

1Ne cok ah pãa za syee mor ah a ɓoo ga pelle, so Yahuduen ma faara zah Grek urra ɓǝ ne byaŋ Yahuduen ra, faara a soɓra ŋwǝǝ wul ma ɓǝǝ lal ne cok woŋ farel zah'nan daŋ. 2Zapee matǝ jemma tǝtǝl gwa taira pãa za syee mor ah daŋ faara nyi ra: Ka pǝsãh ka ru soɓ cuu ɓǝ Masǝŋ ka ru so joŋ yeɓ farel a. 3Mor maiko wee pamme, we syen za masãh ah kǝsyil ɓii rǝŋ mai Tǝ'yak Matǝdaŋdaŋ mo baa ɓo pǝ zahzyil ɓǝǝ tǝkine fatanne, ka na soɓ yeɓ mai nyi ra. 4Ma ɓuu ru ga yea ne juupelle, tǝkine yeɓ cuu ɓǝ. 5Ɓǝ mai zapee mo faara 'nyah suu za pãa ne lii ɓǝǝ daŋ. So nǝǝra Setefanus dǝɓ ma ne iŋ lii, Tǝ'yak Matǝdaŋdaŋ baa ɓo zahzyil ahe, ne Filip, Prokorus, Nikanor, Timon, Parmenas, ne Nikolas dǝɓ ma syee mor ɓǝ iŋ Yahuduen yaŋ ah Antiokia. 6So woora ra ge uu pel zapee, juura pelle, rǝkra jol tǝ ɓǝǝra.

7Ɓǝ faa Masǝŋ myah ge pel pǝlli, pãa za syee mor ah ɓoo ge pel yaŋ Jerusalem pǝlli, za joŋzahsyiŋ pǝlli laŋ nyiŋra ɓǝ Yesu.

Gbǝra Setefanus

8Setefanus dǝɓ mai Masǝŋ mo ẽe ko ɓo mo nyi swah ɓo nyi pǝlli, joŋ dǝǝbǝǝri malii ne yeɓ matǝ gǝriŋ ah kǝsyil za pǝlli. 9Amma za ki urra gin yaŋ kee ɓǝ Masǝŋ mai moo ɗiira ne yaŋ kee ɓǝ Masǝŋ za mai mo wǝǝra ra ɓo pǝ byakke, ara ye Yahuduen mai mo yaŋ Kirene ne Aleksandria ne Yahuduen mai mo gera gin sǝr Kilikia ne Asia ge, tǝŋ syera syel ne Setefanus. 10Amma gak uura pel ah ne ɓǝ ya, mor a faa ɓǝ ne fatan mai Tǝ'yak Matǝdaŋdaŋ mo nyi ɓo nyi ko. 11So ɓaŋra lak soo za ne ko ka mo faara: Ru laa Setefanus tǝ faa ɓǝɓe' tǝ Mosus ne Masǝŋ daŋ. 12Wiira zahzyil zana, zaluu ne za ma cuu ɓǝ lai ge ryaŋra ko, gbǝra ko kal ge cok tai malii pel zaluu ne ko. 13Gera ne za syedowal ka mo gwahra ber zah ahe, faara: Dǝɓ mai a faa ɓǝɓe' tǝ yaŋ Masǝŋ matǝdaŋdaŋ tǝkine ɓǝ lai Mosus. 14Mor ru laa faa Yesu ma yaŋ Nazaret a ga dah yaŋ Masǝŋ mai ga lalle, so a ga fer zah fan joŋ mai Mosus mo cuu nyi na daŋ. 15Za mai mo ɓǝr yaŋ pǝ cok tai daŋ woora nahnǝn rǝk tǝ Setefanus, kwora zahpel ah tǝgbana mǝ angeloi.

Currently Selected:

YEƁ ZAPEE 6: MUAR

Highlight

Copy

Compare