YEƁ ZAPEE 14

Paulus ne Barnabas yaŋ Ikonium

1Paulus ne Barnabas danra ge yaŋ kee ɓǝ Masǝŋ Yahuduen yaŋ Ikonium, faara ɓǝ nyi za na mai kŋ faɗa. So Yahuduen pǝlli tǝkine za Grek daŋ nyiŋra ɓǝ ahe. 2Yahuduen mai mo zyii nyiŋra ɓǝ ah ya kǝǝra zah za mai mo ye ka Yahuduen a ka mo urra ɓǝɓe' ne wee pamme. 3Paulus ne Barnabas nǝnra yaŋ Ikonium pǝlli, a cuura ɓǝ Dǝɓlii nyi za bai galle, Dǝɓlii joŋ syedowal ne cuu ɓǝ mai mo tǝ faara tǝ ɓǝ gboŋgboŋ ah goŋga yo, mor ah nyi swah nyi ra ka joŋ yeɓ matǝ gǝriŋ ah tǝkine dǝǝbǝǝri. 4Za yaŋ ah woŋra gwa: za ki mor Yahuduen, za ki laŋ mor zapee ah ra.

5Yahuduen ne za mai mo ye ka yahuduen a tǝkine zaluu ɓǝǝ daŋ gbǝra zah ka cuu bone nyi Paulus ne Barnabas, so ka ɓaa ra ne tǝsal pǝ wulli. 6Ne cok Paulus ne Barnabas mo laara ɓǝ ah naiko, ɗuura kal ge yaŋ Listra ne Derbe sǝr Likaonia, tǝkine sǝr ma kah ah ra. 7Kal ne cuura Ɓǝ'nyah gŋ.

Paulus ne Barnabas yaŋ Listra

8Dǝɓ ki no yaŋ Listra ɓal ah ka pǝswah ya, kur ɓo daga byaŋ ah sǝ, syee taa ya. 9Laa ɓǝ mai Paulus mo tǝ faani. So Paulus pee nahnǝn wol ahe, kwo ko a ne iŋ ka laɓɓe. 10Paulus ɓyaŋ ɓǝ faa nyi ko: Mo ur sǝŋ mo uu ne ɓal ɓo. Dǝɓ ah ur sǝŋ ne pel gaŋ, so kal tǝ syelle. 11Ne cok za mo kwora fan mai Paulus mo joŋ, ŋwaara ɓǝ ne zah Likaonien faara: Masǝŋ woora suu ɓo tǝgbana suu dǝfuu ɗǝrra ge ɓo wo mana. 12Ɗiira Barnabas ne Zeus, ɗiira Paulus ne Hermes, mor ako ye tǝ faa ɓǝ. 13Pa joŋzahsyiŋ masǝŋ Zeus mai yaŋ juupel ah mo zah ɓaale yaŋ lalle woo ŋgǝǝri gwa tǝkine fãi fanne, ge zah ɓaale yaŋ lal ne ko, ako ne za daŋ a 'yahra ka joŋ syiŋ wo zapee ne ko. 14Amma ne cok zapee matǝ gwa mo laara ɓǝ ahe, ŋgǝ̃ǝra mbǝro wo suu ɓǝǝra, so ɗuura ge wo zana, ɓyaŋra ɓǝ faara: 15Zana, we joŋ fan mai nai mor fẽene? Aru laŋ ru ye dǝfuu tǝgbana we ta. Ru ge tǝ cuu Ɓǝ'nyah nyi we, ru tǝ lai we ka we soɓ masǝŋ ki maraiko, we ge wo Masǝŋ ma ne cee mai mo joŋ sǝŋ ne sǝrri, bii tǝkine fan mai mo gŋ daŋ.#Pǝ̃ǝ 20:11; Lǝŋ 146:6 16Ne zah'nan ma fahfal mo pǝ̃ǝ kal ɓo, Masǝŋ soɓ za daŋ syeera fahlii ɓǝǝ tǝgbana ɓǝ foo ɓǝǝra. 17Amma ne daŋ laŋ cẽecẽe a cuu suu ah ne fan sãh mai moo joŋko: a pee bam sǝŋ gin nyi we, a soɓ gwahl fan camcam cee pǝsãhe, a nyi farel nyi we tǝkine joŋ zahzyil ɓii laa pǝ'nyahre. 18Koo mo faara ɓǝ nai laŋ, cakra za ka mo joŋra syiŋ wo ɓǝǝ ka pǝsyemme.

19Za ki kǝsyil Yahuduen urra gin yaŋ Antiokia sǝr Pisidia ne yaŋ Ikonium ge, kǝǝra zah za ka ɓaara Paulus ne tǝsalle, so kwakra ko gin tǝgǝǝ yaŋ ge ɓoo lalle, mor lǝŋra wǝ ɓe. 20Amma ne cok za ma iŋ mo taira ge wol ahe, so urri, kal ge tǝgǝǝ yaŋ. Tǝ'nan ah so kal ge yaŋ Derbe ne Barnabas.

Piira soo ge yaŋ Antiokia sǝr Siria

21Paulus ne Barnabas cuura Ɓǝ'nyah yaŋ Derbe, so lwaara za ma nyiŋ ɓǝ ah gŋ pǝlli. So piira soo ge yaŋ Listra, Ikonium ne yaŋ Antiokia sǝr Pisidia. 22Swaara zahzyil za ma iŋ ah ge ne ko, laira ra ka mo uura ne iŋ pǝswahe, faara nyi ra: Na ga pǝ̃ǝ kǝsyil bone camcam pǝlli ka dan pǝ Goŋ Masǝŋ. 23Pǝ eklesia vaŋno vaŋno daŋ a rǝkra zaluu gŋ ga ne ko. Fahfal mo syẽera fan tǝkine juura pel ɓe, a soɓra ra jol Dǝɓlii mai mo nyiŋra ɓǝ ah ɓo.

24So pǝ̃ǝra sǝr Pisidia, gera sǝr Pamfilia. 25Cuura ɓǝ Masǝŋ yaŋ Perga, fahfal ah so kalra ge yaŋ Atalia. 26Ne cok mo vǝrra yeɓ ɓǝǝra, so yeera dah gŋ ka ga yaŋ Antiokia, yaŋ mai eklesia ah mo soɓ ra jol Masǝŋ kŋ.

27Ne cok mo ge daira Antiokia, taira za eklesia daŋ keera ɓǝ yeɓ mai Masǝŋ mo joŋ ne ra daŋ nyi ra, ne mai mo nyi fahlii ɓo nyi za mai mo ye ka Yahuduen a ka mo nyiŋra ɓǝ ah ta. 28So nǝnra wo za syee mor ah gŋ pǝlli.

Currently Selected:

YEƁ ZAPEE 14: MUAR

Highlight

Copy

Compare