YEƁ ZAPEE 12

Herodes i Yakuɓ pǝ wulli, so gbǝ Petar ɓoo ge daŋgai

1Ne cok ah goŋ Herodes tǝŋ ne cuu bone nyi za eklesia manyeeki ahe. 2I Yakuɓ naa mah Yohana ne kafahe pǝ wulli. 3So kwo ɓǝ ah 'nyah suu Yahuduen ɓo, so ge gbǝ Petar ta. Fan ah joŋ ne zah'nan fĩi farel ma bai fan mbǝ̃ǝre. 4Ne cok Herodes mo gbǝ Petar so ɓoo ge daŋgai, woo sooje rǝk nai nai cok camcam nai ka mo byakra ko, foo ɓo ka zye ge pel za ne ki fahfal fĩi Paska.#Pǝ̃ǝ 12:1-27 5Ka tǝ byakra Petar pǝ daŋgai, amma za eklesia a juura pel wo Masǝŋ mor ah ne swahe.

Petar pǝ̃ǝ gin daŋgai

6Ka Herodes tǝ yah ka ga pel za ne ki na tǝ'nan ahe, ne suŋ moo Petar nǝnǝm ɓo kǝsyil sooje gwa. Gaara ko ɓo ne celeelu gwa, so sooje uura ɓo zahfah daŋgai tǝ byakra cokki. 7Ne pel nai sǝ angelos ge dai, cokfãi sǝǝ pǝ sululu. Pa pee laŋ Petar gin kahlaa kpiŋ ko, so faa nyi ko: Mo ur sǝŋ gwari. So celeelu wǝǝ gin jol ah lea ge sǝŋ suu ɓǝǝra. 8So angelos faa nyi ko: Mo baŋ ganda ɓo. So Petar joŋ na mo laako. Angelos faa nyi ko: Mo ɓoo mbǝro ɓo ka mo syee ge mor ɓe. 9Petar pǝ̃ǝ gin pǝ daŋgai syee ge mor angelos, tǝ sõone fan mai angelos ah mo tǝ joŋ wol ah goŋga yo ya, amma lǝŋ zye tǝ loo lomme. 10Ge pǝ̃ǝra zahfah patǝ vaŋno ah sooje ma byak cok mo gŋ, so ge pǝ̃ǝra zahfah patǝ gwa ahe, ge daira zahfah ma vãm ah ka ga nǝfah kǝ tǝgǝǝ yaŋ. Zahfah ah gbǝr suu ah pel ɓǝǝra, pǝ̃ǝra kalle. Syeera ge saŋ fahlii vaŋno, ne pel sǝ, angelos soɓ Petar, so kalle. 11So Petar tahn suu ah faa: Me tǝ gur njaŋ ɓe, Dǝɓlii ye pee angelos ah ge wǝǝ me jol Herodes tǝkine fan mai Yahuduen mo tǝ kyeɓra ka joŋ wo ɓe daŋ.

12Fahfal mo tǝ ɓǝ ah naiko, so kal ge yaŋ Maria mah Yohana ma ɗii ne Markus ta. Za taira ɓo gŋ pǝpãare, tǝ juura pelle. 13Petar ge uu kǝ̃ǝ zahfah gǝ̃ǝre, mǝlaŋ ma ɗii ne Rode pǝ̃ǝ ge ka gbǝr zahfahe. 14Ge tǝ kyaŋ Petar so laa pǝ'nyahre, ŋhaa gak gbǝr zahfah ya, so ɗuu kal ge ɓǝr yaŋ ge faa Petar no ge ɓo lalle. 15Faara nyi ko: Mo pǝ tǝgwĩi. So swaa ɓǝ ah faa: 'Manna. So faara nyi ko: Angelos ah yo. 16Petar uu ne kǝ̃ǝ zahfahe, ne cok mo ge gbǝrra zahfahe, kwora ko so kaara tǝ ɓǝ ah gǝriŋ. 17Petar haɓ ra ne jolle, ka mo yeara zahe, so kee ɓǝ mai Dǝɓlii mo wǝǝ ko pǝ daŋgai pǝ̃ǝ ge lal nyi ra. So faa ka mo keera ɓǝ ah nyi Yakuɓ ne wee pam manyeeki ahe. Fahfal ah pǝ̃ǝ kal ge cok ki.

18Ne cok zah'nan mo ceeni, ɓǝ gaŋ kǝsyil sooje pǝ'man ne fiira fii: A fẽe ye ge joŋ Petar ne? 19Herodes faa mo kyeɓra ko ge ne ko, amma lwaara ko ya. So fii ka mo gera ne sooje, so faa mo ikra ra ge lal pǝ wulli.

Fahfal ah Herodes ur gin sǝr Yudea kal ge yaŋ Kaiseria, kaa gŋ.

Herodes wuu

20Herodes ɓaŋ kpãh tǝ za sǝr Tirus ne Sidon pǝ'manne, amma gera ɓo ka zyeɓ ɓǝ ah ne Herodes. Kǝpel ah ge ɗǝrra wo Blastus pa ɓaŋ paŋzǝǝ goŋe, so fahfal ah kalra ge wo Herodes ka fii ko ka jam mo yea kǝsyil ɓǝǝra, mor sǝr ɓǝǝ a lwaara farel gin sǝr Herodes.

21Ne cok zah'nan ah mo kanra ɓo mo ge o, Herodes ɓoo mbǝro goŋ ah ge kaa tǝ fakal ah ne ko, so faa ɓǝ nyi zana. 22Za so ŋwaara ɓǝ ne lii ɓǝǝ daŋ faara: Kyaŋ dǝfuu ye ka mai ya, amma kyaŋ masǝŋ yo. 23Amma ne cok ah sǝ, angelos ge i Herodes, mor nyiŋ yǝk Masǝŋ kan ge tǝ suu ahe, tǝkaa syer ɓǝr ah wǝ ne ko.

24So ne cok ah ɓǝ faa Dǝɓlii myah ge pel pǝlli.

25Fahfal Barnabas ne Saulus mo vǝr yeɓ mai mo peera ra ge Jerusalem ne ko, so pii soora, ɓaŋra Yohana ma ɗii ne Markus ge ne ta.

Currently Selected:

YEƁ ZAPEE 12: MUAR

Highlight

Copy

Compare