YEƁ ZAPEE 1

1Pa 'yah ɓe Teofilus:

Pǝ ɗerewol ɓe ma zahnahpel ah me ŋwǝǝ ɓǝ fan mai Yesu mo joŋ daga tǝtǝŋ ah tǝkine ɓǝ mai mo cuu daŋ,#Lu 1:1-4 2ŋhaa dai zah'nan mai mo kalko ge sǝŋ ne ko. Ka ɓah kal ga sǝŋ ya ba, cuu ɓǝ ne Tǝ'yak Matǝdaŋdaŋ nyi zapee mai mo syen ra ɓo. 3Fahfal wul ah uu pel ɓǝǝ cuu suu ah zye no ne cee nyi ra ryakryak ne fahlii camcam zah'nan jemma nai tǝkine faa ɓǝ Goŋ Masǝŋ nyi ra. 4Com mai mo tai ɓo cok vaŋno ne ra, faa ɓǝ mai nyi ra: We soɓ yaŋ Jerusalem ka ga cok ki ka, amma we byak fan mai Pa ɓe mo faa ɓǝ ah ɓo ka nyi we, mai me faa ɓǝ ah nyi we kǝpel kŋ.#Lu 24:49 5Mor Yohana joŋ baptisma ne bii, amma tǝgǝǝ zah'nan nje ɓe, we ga nyiŋ baptisma ne Tǝ'yak Matǝdaŋdaŋ.#Mt 3:11; Mk 1:8; Lu 3:16; Yoh 1:33

Yesu kal ge sǝŋ

6Ne cok zapee mo taira ɓo wo Yesu, so fiira ko faa: Dǝɓlii, ne cok ah mo ga jin Goŋ ge jol za Israel faɗa ne? 7Yesu zyii faa nyi ra: Zah'nan ah ne cok ah mai Pa ɓe mo nǝǝ kan ɓo ne swah ah we ka tǝ ya. 8Amma Tǝ'yak Matǝdaŋdaŋ mo ɗǝr ge tǝ ɓii ɓe, we ga lwaa swahe, we ga joŋ syedowal tǝ ɓe yaŋ Jerusalem ne sǝr Yudea daŋ, tǝkine sǝr Samaria ŋhaa ka dai zahtǝmgboo sǝr daŋ.#Mt 28:19; Mk 16:15; Lu 24:47-48 9Fahfal Yesu mo faa ɓǝ mai nyi ra vǝrri, so ur kǝsyil ɓǝǝ kal ge sǝŋ. Ne cok mo tǝ ẽera ko ne gan ahe, swãh bam so rii ko nahnǝn ɓǝǝra.#Mk 16:19; Lu 24:50-51

10Ne cok mo tǝ ẽera cok ga sǝŋ ka Yesu tǝ kal ganne, kwora za gwa ɓaara mbǝro ɓo pǝfãi ge uura kah ɓǝǝ faara nyi ra: 11Awe za sǝr Galile, we uu ẽe cok ga sǝŋ mor fẽene? Yesu mai mo ur ɓo kǝsyil ɓii kal ga sǝŋ, a ga pii soo ge tǝgbana mai we kwo ko ne kal ga sǝŋ ta.

Dǝɓ ma joŋ yeɓ pǝ cok Yudas

12So zapee pii soora gin kah waa Ma Ne Tǝbaakãmme ge yaŋ Jerusalem, waa ah a kah Jerusalem gwari tǝgbana kilomeetǝr vaŋno. 13Ne cok mo ge daira Jerusalem, yeera kal ge ɓǝr yaŋ ma sǝŋ mai moo taira gŋ cẽecẽe. Zan ah Petar, Yohana, Yakuɓ ne Andreas, Filip ne Tomas, Bartolomeus, Mateus, Yakuɓ we Alfeus, Simon Wesǝrri ne Yudas we Yakuɓ.#Mt 10:2-4; Mk 3:16-19; Lu 6:14-16 14Ara daŋ a taira cok vaŋno juupel cẽecẽe, tǝkine ŋwǝǝre, Maria mah Yesu tǝkine wee mah Yesu daŋ.

15So com maki ah mo taira ɓo gŋ, pãa ɓǝǝ tǝgbana temere ne jemma gwa, Petar ur uu kǝsyil ɓǝǝ faa nyi ra: 16Wee pa ɓe, goŋga ɓǝ mai Tǝ'yak Matǝdaŋdaŋ mo faa ɓǝ ah ne zah David pǝ Ɗerewol Masǝŋ kǝpel tǝ Yudas mai mo kal pel za ma gbanra Yesu joŋ gur ɓe. 17Yudas yea kǝsyil mana, joŋ laŋ yeɓ ne na ta.

18(Lak mai mo soora ko ne tǝ ɓǝɓe' ah ɓaŋ lee 'wah ne ko, so lee ge sǝŋ pǝ 'wah ah ɓǝr ah cẽere, fan ɓǝr ah njul ge lalle.#Mt 27:3-8 19Za mai mo kaara ɓo yaŋ Jerusalem daŋ tǝra ɓǝ fan mai mo joŋ ɓe, mor ah ɗiira 'wah ah ne zah ɓǝǝ ne Hakeldama, tǝgba faa: 'Wah Syimmi.)

20Tǝgbana ɓǝ ah mo ŋwǝǝ ɓo pǝ ɗerewol Lǝŋni:

Yaŋ ah ga ciŋ gboŋni, dǝɓ ka kaa gŋ ya.

So ɓǝ ah ŋwǝǝ ta:

Ka dǝɓ ki mo ɓaŋ cok yeɓ ahe.#Lǝŋ 69:25; 109:8

21-22Sai dǝɓ ki mo taiko ne na ka joŋ syedowal tǝ ɓǝ ur Dǝɓlii Yesu pǝ wulli, dǝɓ ah mo yeako kǝsyil za mai mo syeera ne na ne cok Dǝɓlii Yesu mo yea tǝ kyãh wo sǝr nyẽe ne na, daga ne cok mai Yohana mo tǝŋ cuu ɓǝ baptisma ahe, ŋhaa dai zah'nan mai Yesu mo ur kǝsyil man kal ge sǝŋ.#Mt 3:16; Mk 1:9; 16:19; Lu 3:21; 24:51

23So woora za gwa rǝkki: Yuseɓ ma ɗii ne Barsabas a ɗii ne Justus ta, tǝkine Matias. 24So juura pel faara: Dǝɓlii, mo tǝ zahzyil za daŋ, mo cuu dǝɓ mai mo nǝǝ ɓo kǝsyil za matǝ gwa rai nyi ru, 25mor ka mo joŋko yeɓ papee pǝ cok Yudas mai mo zol soɓ ɓo mo kal ge ɓo pǝ cok mǝ ahe. 26So peara kǝsyii ɓǝǝ ka nǝǝ dǝɓ vaŋno, Matias ye lwaa. So keera ko ge kǝsyil zapee matǝ jemma tǝtǝl vaŋno.

Currently Selected:

YEƁ ZAPEE 1: MUAR

Highlight

Copy

Compare