2 SAMUEL 12
12
Natan lai David, so David toobii
1Dǝɓlii pee profeto Natan wo David. Natan ge wol ah yaŋ ah faa nyi ko: Za gwa no yaŋ vaŋno, dǝɓ maki ah pa joŋn o, maki ah laŋ pa syak yo.#Lǝŋ 51:1 2Pa joŋ a ne faɓal manyee ne maluu daŋ pǝlli. 3Pa syak ka mǝ ah ne fan ki ya, sai a no ne we pǝsãhm vaŋno, lee we pǝsãhm ah lee. A wol we pǝsãhm ahe, we pǝsãhm ah joŋ dǝɓlii wol ah tǝkine wee ahe, a ren farel ne ki, a zwan bii pǝ ŋhǝǝ ahe, a swan tǝdahɓǝr ah ta, a tǝgbana mǝlaŋ ahe. 4Comki dǝɓ gwǝǝ ge wo pa joŋne, zyii ka gban gwii mǝ ah ne dǝǝ ah ka joŋ farel nyi gwǝǝ mai mo ge ɓo wol ah ne ya. So gbǝ we pǝsãhm pa syak joŋ farel nyi dǝɓ mai mo ge ɓo yaŋ ah ne ko.
5David ɓaŋ kpãh tǝ ɓǝ dǝɓ ah pǝ'manne, so faa nyi Natan: Dǝɓlii no, dǝɓ ma joŋ fan mai a nǝn pǝkoŋ wulli. 6A ga soo ne pǝsǝ̃ǝ nai, joŋ yeɓ mai ɓo nai mor ka kwan syak ya.
7Natan so faa nyi David: Amo ye dǝɓ ahe! Dǝɓlii Masǝŋ Israel faa: Me syee nǝm tǝ ɓo kan goŋ tǝ za Israel ne ko, me so ǝ̃ǝ mo jol Saul, 8me nyi goŋ ah ne ŋwǝǝ ah daŋ nyi mo, me so ɓaŋ mo kan goŋ Israel ne goŋ Yuda ne ko. Koo mai mo kii kǝnah mo ya laŋ, me ga nyi fan ki gai mo gŋ. 9Mor fẽe mo syẽa ɓǝ faa Dǝɓlii mo so joŋ faɓe' mai wol ah ne? Mo i Urias pǝ wulli, mo joŋ Ammonien ira ko zah salle, mo so ɓaŋ mawin ah kanne. 10Daga zǝzǝ̃ǝko ɓǝɓea ka ga woŋ ki ne morsǝ̃ǝ ɓo ya, mor mo laa zah ɓe ya, mo ɓaŋ mawin Urias kanne. 11Mo laa njaŋ, me ga joŋ dǝɓ ki kǝsyil za piicel ɓo ge ne gaɓ tǝ ɓo, me ga woo ŋwǝǝ ɓo ne nahnǝn ɓo gǝǝ nyi nyi dǝɓ ki, a ga swah ne ra ne comme.#2 Sa 16:22 12Ma ɓo mo joŋ pǝ muŋni, amma me ga joŋ ma ɓe pel za Israel daŋ ne com taŋraŋ.
13David faa nyi Natan: Me joŋ faɓe' wo Dǝɓlii ɓe. So Natan faa nyi David: Dǝɓlii rõm mo ɓe, mo ka wǝ ya. 14Amma mo joŋ yeɓ mai mor ka za ma syiŋra Dǝɓlii mo tǝǝra ko, we mai mo byaŋra ɓo mo a ga wuu. So Natan kal ge fah yaŋ ahe.
We David wuu
15Dǝɓlii joŋ we mai mawin Urias mo byaŋ ne David joŋ syem pǝ'manne. 16David juupel wo Masǝŋ mor wel ah ka mo laɓɓe, zyii ren farel a. Ne cok mo dan ge yaŋ ɓe, ka ga cok ki ya. Ne suŋ daŋ a swan tǝ sǝrri. 17Zaluu pel ah gera wol ah mor ka ɓaŋra ko gin tǝ sǝr ur sǝŋ, amma zyii ya, re farel ne ra laŋ ya. 18Patǝ rǝŋ zah'nan ah we wuu. Za yeɓ David ɗuura gal ka faa we wǝ ɓe nyi ko. So faara: Ne cok we mo yea ne cee, na faa ɓǝ nyi ko, zyii laa ɓǝ faa man a. Na so ga faa nyi ko zǝzǝ̃ǝ ɗii we wǝ ɓe ne? Bǝ foo ah ga jok ko pǝlli. 19Ne cok David mo kwo za yeɓ ah tǝ faara ɓǝ nyi ki ne zah gwǝǝre, tǝ sǝ, we wǝ ɓe. David fii za yeɓ ahe: We wǝ ɓe ne? Zyiira faa: Oho wǝ ɓe. 20So David ur gin tǝ sǝrri, ge er bii, sõm suu ne ɓǝrdi, so ɓoo mbǝro maki ahe. Fahfal ah dan kal ge ɓǝr yaŋ Dǝɓlii, juupel gŋ. So pii soo ge yaŋ ahe, fii ka mo gera nyi ko ne farelle, so gera ne nyi ko re. 21Za yeɓ David faara nyi ko: Ɓǝ fẽe ye mo joŋ ɓo mai ne? Ne cok we mo ne cee ba, mo zyii ren farel a, mo yeyee, so zǝzǝ̃ǝ we wǝ ɓe, mo so ur sǝŋ mo re fanne. 22David zyii faa: Ne cok we mo ne cee ba, me syẽe fanne, me yeyee, mor me lǝŋ ɗah maki Dǝɓlii kwo syak tǝ ɓe a soɓ tǝl ah me no ne? 23Amma zǝzǝ̃ǝko we wǝ ɓe, me so ga syẽe fan mor fẽene? Me gak pii soo ne ki no ne? Ame ye ga lwaa ko mgbaŋ, amma we ka pii soo ge wo ɓe yao.
Salomo byaŋ
24David cii tǝtǝl mawin ah Batseba, so ge wol ah swǝ ne ki, gbǝ ɓilli, so byaŋ we worre, ɗii wel ah ne Salomo. Dǝɓlii 'yah ko, 25so pee ɓǝ ah ne zah profeto Natan ge ɗii ko ne Jedija, tǝgba faa: we ãm Dǝɓlii#12:25 Wala: We 'yah Dǝɓlii..
David re yaŋ Rabba
(1 KeeƁ 20:1-3)
26Ne cok ah Joaɓ ruu sal ne Rabba yaŋ goŋ Ammonien, re yaŋ ahe. 27Joaɓ pee za ge wo David faa nyi ko: Me ruu sal ne Rabba, me re dahgbil ma ne bii ɓe. 28Mo tai tǝcoŋ za ge ne zǝzǝ̃ǝ ka mo ge ryaŋ yaŋ ah ne sal ka mo re, mor ka ame ye me re yaŋ ah ka mo so ɗiira ne tǝɗii ɓe ka. 29David tai za daŋ so kal ge Rabba. Ruu sal ne yaŋ ahe, so re. 30Nǝǝ njok goŋ yaŋ ah gin tǝl ahe#12:30 Bibel zah Grek faa: goŋ yaŋ ah ako ye masǝŋ Ammonien ma ɗii ne Milkom.. Yǝk njok ah nǝn kilo jemma sai tǝtǝl dappe, tǝsal mai lee ah moo yea pǝgaɓ a no tǝ njok ah ta. Ɓaŋra njok ah maa nyi David. David woo fan ma lwaa zah sal yaŋ ah pǝlli ta. 31So nĩi za yaŋ ah pǝ̃ǝ ra ge lalle, joŋ za ki na za sǝǝ kpuu, za ki na za gea vãmme, za ki laŋ na za ŋgom vãmme. So joŋ ra ka mo joŋra yeɓ pǝ cok suŋ darŋgel. Joŋ nai ne yaŋ Ammonien daŋ. David ne za sal daŋ pii soora ge yaŋ Jerusalem.
Bible Moundang © Alliance Biblique du Tchad, 1996.