2 SAMUEL 10
10
David nĩi Ammonien ne Sirien
(1 KeeƁ 19:1-19)
1Fahfal ah goŋ Ammonien wuu, nan ah Hanun kaa goŋ pǝ cok ahe. 2David faa: Me ga joŋ ɓǝ sãh wo Hanun we Nahas tǝgbana pah ah mo joŋ ɓǝ sãh wo ɓe ta. David pee za yeɓ ah ge ka haozah wol ah pǝ cok wul pamme.
Amma ne cok za yeɓ David mo ge daira sǝr Ammonien, 3zaluu Ammonien faara nyi dǝɓlii ɓǝǝ Hanun: Mo lǝŋ ɗah ɓo David tǝ yii pa ɓo ko pee za ge ɓo tǝ haozah wo ɓo pǝ cok wul ah ne? Mo tǝ ɗah sõone David pee zan ah ge ɓo wo ɓo mor ka ẽe yaŋ tǝkine foo ah ka so gin ɗaŋ ya ne?
4So Hanun gbah za yeɓ David swãa raita pyaŋ ɓǝǝra, so ŋgom mbǝro ɓǝǝ gin sǝŋ ŋhaa ge kan tǝwaazahmor taataa, soɓ fahlii nyi ra gur kal o. 5Ge faara ɓǝ ah nyi David, so David pee za ka ga zyaŋ tǝ ɓǝǝra, mor zan ah swãa re ra ɓo pǝlli. So goŋ faa nyi ra: We kaa yaŋ Jeriko ka pyaŋ ɓii mo so luu ɗao, ka we ge ba.
6Ne cok Ammonien mo kwora rǝ ciŋ za ɓea ɓo wo David o, so peera lak ge ɓaŋ sooje Sirien ma Bet-Rehoɓ ne Zoba 20.000, peera ge ɓaŋ ne jol goŋ Maaka 1.000, so ge ɓaŋra jol za Toɓ 12.000. 7Ne cok David mo laa ɓǝ ahe, so pee Joaɓ ne za sal kalra ge gŋ. 8Ammonien pǝ̃ǝra gin yaŋ ɓǝǝ malii ma ɗii ne Rabba, ge dǝra sal ge lal zah ɓaale yaŋ ahe, Sirien tǝkine za Toɓ ne za Maaka uura ma ɓǝǝ lal cam.
9Ne cok Joaɓ mo ge kwo sal pel ah tǝkine kǝfal ah daŋ, so syen za kǝsyil za Israel ma syen ahe, woo ra rǝk pel Sirien jaŋjaŋ. 10So soɓ tǝcoŋ za sal manyeeki ah daŋ jol naa mah ah Abisai, rǝk ra pel Ammonien jaŋjaŋ. 11So faa: Ka Sirien mo kalra swah ɓe ɓe, ka mo ge gbah jol ɓe, ko ka Ammonien ye mo kalra swah ɓo, me ga gbah jol ɓo. 12Na swaa suu mana, na uu pǝswah mor za man tǝkine yaŋ mai Masǝŋ mo nyi ra ɓo nyi na. Ka Dǝɓlii mo joŋko fan mai mo ga 'nyah suu ahe.
13Joaɓ ne za mai mo ne ki tǝŋ ruura sal ne Sirien, so Sirien ɗuura pel ɓǝǝra. 14Ne cok Ammonien mo kwora Sirien mo tǝ ɗuura ganne, ara laŋ so ɗuura pel Abisai, kalra ge yaŋ ɓǝǝra. So Joaɓ pii soo gin mor Ammonien kal ge yaŋ Jerusalem.
15Ne cok Sirien mo kwora za Israel ik ra ɓo naiko, so taira swah ɓǝǝ wo ki. 16Hadadezar pepee ge wo Sirien mai mo haira ɓo tǝkee zǝǝ Efrat nǝzakǝŋhaa. Ge daira Helam, Sobak dǝɓlii sal Hadadezar ye kal pel ɓǝǝra. 17Ge faara ɓǝ ah nyi David, so David tai za Israel daŋ yee el Yordan ne ra, gera Helam. Sirien dǝra sal ge lal kal David, so tǝŋ ruura sal ne ki. 18Amma Sirien rǝkra ɗul pel za Israel. David tǝkine zan ah ikra pǝr ma kwak muŋta sal Sirien 700 tǝkine za ma yee pǝr 40.000. Ira dǝɓlii sal ɓǝǝ Sobak pǝ wul pǝ cok ah ta. 19Ne cok ah za goŋ mai Hadadezar mo lwaa ra ɓo daŋ mo kwora za Israel moo ik ra naiko, so zyeɓra ɓǝ ka kaa jam ne za Israel, a joŋra yeɓ zahmor Israel. Fahfal ah Sirien a ɗuura gal ɓǝ gbah jol Ammonien.
Bible Moundang © Alliance Biblique du Tchad, 1996.