2 SAMUEL 1
1
David laa ɓǝ wul Saul
1Fahfal wul Saul, ne cok David mo pii soo gin cok ik Amalekien, ge swǝ Ziklak zah'nan gwa. 2Zah'nan sai ah dǝɓ ki ge daga cok ɗǝr sal Saul ge dai. Ŋgǝ̃ǝ mbǝro wo suu ahe, so woo sǝr rǝk ge tǝtǝlli, ka cuu, ɓǝ joŋ ɓo. Ne cok mo ge wo David, lee ge sǝŋ, so ɗǝŋ zahpel ge tǝ sǝrri. 3David fii ko: Mo gee kẽe ge ne? Zyii faa nyi ko: Me ǝ̃ǝ gin cok ɗǝr za Israel ge. 4David faa nyi ko: Ber fẽe gŋ ne? Mo kee nyi me sa. Zyii faa: Za ɗuu gin zah sal ɓe, so za wuk gin gŋ pǝlli ta, Saul ne nan ah Yunatan laŋ wukra ɓe.
5David fii we tǝbanna mai mo ge kee ɓǝ nyi ko: Mo tǝ ne fẽe Saul ne nan ah Yunatan wukra ɓe ne? 6We tǝbanna mai mo ge kee ɓǝ ah nyi zyii faa: Ne cok me ge tǝ waa Gilboa, me ge lwaa Saul ee suu ge ɓo tǝ zǝǝ ahe, so muŋta sal ne za ma yee ah mo tǝ foora mor ah ge daira ko gwari.#1 Sa 31:1-6; 1 KeeƁ 10:1-6 7Pak nahnǝn kwo me, so ɗii me, me zyii: Awai. 8So fii me faa: Amo ye zune? Me zyii zah ah faa: Ame ye Amalekiyo. 9So faa nyi me: Mo tǝɓ ge wo ɓe gwari ka mo i me pǝ wulli, mor bone kal swah ɓe ɓe, so ne daŋ laŋ cee ɓe no 'wa ba. 10Me tǝɓ ge wol ah me i ko pǝ wulli. Mor me tǝ ɓe, mo lee ge sǝŋ ɓe, ka yea ne cee fahfal ah yao. Me nǝǝ njok vãm kaŋnyeeri gin tǝtǝl ahe, me so nǝǝ fan mai mo maa ɓo jol ah ta. Me so woo ge ɓo dǝɓlii ɓe ne nyẽeko.
11David gbǝ mbǝro wo suu ah ŋgǝ̃ǝre. So za mai mo ne ki daŋ joŋra nai ta. 12Dahra gorre, yera yee, syẽera fan ŋhaa dai lilli, mor ɓǝ Saul ne nan ah Yunatan ne za Dǝɓlii tǝkine za Israel daŋ, mor ikra ra ɓo.
13David fii tǝbanna mai mo ge kee ɓǝ nyi ko: Mo ur gin kẽne? Zyii faa: Ame Amalekiyo, me ee ge kaa ɓo sǝr ɓo. 14David faa nyi ko: Mor fẽe gal re mo ne kan jol ga wo dǝɓ mai Dǝɓlii mo syee nǝm ɓo tǝl ah ya ne? 15So David ɗii dǝɓ vaŋno kǝsyil zan ah faa: Mo tǝɓ ge nyee mo i ko. Dǝɓ ah i Amalekiyo pǝ wulli. 16David faa nyi ko: Syim ɓo pii soo ge tǝ ɓo ɓe, mor zah ɓo ye joŋ syedowal tǝ ɓo, mor mo faa zye i dǝɓ mai Dǝɓlii mo syee nǝm tǝl ahe.
David yeyee wul Saul tǝkine Yunatan
17David gee lǝŋ wul mai ne yee wul Saul ne nan ah Yunatan. 18So faa nyi za ka mo cuura nyi za Yuda. Lǝŋ ah ŋwǝǝ ɓo pǝ ɗerewol Jasar naiko.#Jos 10:13
19Israel mo laa ɗao,
Ira fan sãh ɓo ge lal tǝgee ɓo ra ɓe.
Za swah leara ge sǝŋ ɗii ne!
20We myah ɓǝ ah yaŋ Gat ka.
We faa ɓǝ ah tǝ fahlii tǝgǝǝ yaŋ Askalon ka ta,
Ka ŋwǝǝ Filistien mo laara pǝ'nyah ka.
Ka wee gãhnyah maŋwǝǝ mo 'nyahra suu ne ɓǝ ah ka.
21Awe waa Gilboa,
Koo mahmme, wala bamme, mo ge tǝ ɓii ka.
Koo 'wah ma byaŋ fan kǝpel ka nyi mor joŋ syiŋ laŋ ka yea ya.
Mor soɓra bal za swah ɓoo gŋ.
Bal Saul lwaa rwah nǝm ge wol ah yao.
22Saŋ Yunatan ka soo nǝfal bai joŋ fan wo za syiŋ ah ya.
Kafahe Saul laŋ ka jin tǝtǝl bai ik ra ya ta.
23Saul ne Yunatan a laara ɓǝ ki pǝ'nyahre,
A 'yahra ki no cam.
Woŋra ki ne zah'nan cee ɓǝǝr a,
Ne wul ɓǝǝ laŋ woŋra ya ta.
Ara pǝgwah fǝlyao kal matǝr ɓe,
Kalra ɓol ne swah ɓe ta.
24Awe ŋwǝǝ Israel, we yeyee wul Saul.
Ako yee ɓaa mbǝro syẽ masãh ah nyi we.
Ako yee saa vãm kaŋnyeeri ma gai nyi we tǝ mbǝro ɓii ta.
25Za swah leara ge sǝŋ zah sal ɗii nai ne!
Yunatan, ira mo ɓoo tǝgee ɓe.
26Yunatan naa pa ɓe, me tǝ swaa ɓǝ ɓo pǝlli,
Mor mo pǝ'nyah wo ɓe no cam.
Ɓǝ ɓe 'nyah suu ɓo kal ŋwǝǝ ɓe.
27Za swah leara ge sǝŋ ɗii ne!
Fan sal laŋ mok ɓe ta.
Bible Moundang © Alliance Biblique du Tchad, 1996.