2 PETAR 3
3
Ɓǝ gin Dǝɓlii
1Za 'yah ɓe, leetǝr mai patǝ gwa ah ye me ŋwǝǝ ɓo wo ɓiiri. Pǝ leetǝr ah gwa daŋ me kyeɓ ka ur ɓǝ foo masãh ah ne pǝ zahzyil ɓiiri, ka we foo ɓǝ mai me cuu ɓo nyi we. 2Me 'yah we foo ɓǝ mai profetoen matǝ goŋga mo faara daga ɓaaɓe, ne ɓǝ lai Dǝɓlii ne pa ǝ̃ǝre mai zapee mo cuura nyi we. 3Sai we tǝ ɓǝ ah kǝpelle, ne zah'nan ma fahfalle, za mai moo syeera mor 'yah suu ɓǝǝ to a ga pǝ̃ǝra, a ga tǝǝra we,#Yud 18 4a ga faara: Faa zye ga ge, ka nai ya ne? Ko a ga ge nekẽne? Pa man wukra ɓe, amma so fan daŋ a no tǝgbana mai mo joŋ ɓo daga tǝtǝŋ fanne! 5A 'yah yaŋra ɓǝ maino: Daga ɓaaɓe Masǝŋ faa ɓǝ, so coksǝŋ ne sǝr joŋni, so sǝr pǝ̃ǝ gin mor bii ge lalle, ge uu kǝsyil bii.#Tǝŋ 1:6-9
6So sǝr ah vǝr ne bii ta.#Tǝŋ 7:11
7Amma coksǝŋ ne sǝr matǝ zǝzǝ̃ǝko, joŋ ne ɓǝ faa Masǝŋ, a mor ka vǝr ne wii nai ta. Tǝ byak zah'nan mai moo ga ŋgoŋra kiita tǝ za faɓe' ne ko tǝkine muŋ ra.
8Amma me 'yah we yaŋ ɓǝ mai ka, za 'yah ɓe: zah'nan vaŋno a pel Dǝɓlii tǝgbana syii ujenere, syii ujenere pel Dǝɓlii tǝgbana zah'nan vaŋno.#Lǝŋ 90:4 9Dǝɓlii ka gbǝ rol ne joŋ ɓǝ faa ah tǝgbana mai za ki mo tǝ lǝŋra ya. Jeertǝ tǝ kyaŋ we, mor ka tǝ 'yah koo dǝɓ vaŋno mo muŋ ya, amma tǝ 'yah ka za daŋ mo ferra zahzyil ɓǝǝra.
10Amma zah'nan gin Dǝɓlii a ga ge tǝgbana nyinni. Ne zah'nan ah coksǝŋ ga vǝr ne cii pǝ'manne, fan ma tǝlǝǝ sǝŋ daŋ a ga sye wii vǝr tǝɗe'. Sǝr ne fan mai mo no gŋ daŋ a ga sye wii.#Mt 24:43; Lu 12:39; 1 Tes 5:2; Caŋ 16:15 11Ne cok fan mai daŋ moo ga vǝr naiko, pǝram we kyeɓ ka we yea za tǝ goŋga tǝkine ɗuu Masǝŋ. 12Ne cok we tǝ byak zah'nan Masǝŋ ɓe, we kyeɓ ne swahe ka zah'nan ah mai coksǝŋ moo ga sye wii ne tǝɗe' tǝkine fan tǝlǝǝ sǝŋ moo ga hǝǝ ne syen wii daŋ mo ge dai we gwari. 13Amma Masǝŋ faa ɓǝ coksǝŋ mafuu ne sǝr mafuu ah mai za matǝ njaŋ moo ga kaara gŋ ɓo nyi na, ana kaa ɓo tǝ byak ahe.#Esa 65:17; 66:22; Caŋ 21:1
14Mor maiko za 'yah ɓe, ne cok we tǝ byak zah'nan ahe, we kyeɓ ne swahe, ka we yea bai 'nahmme tǝkine bai ɓǝɓe' pel Masǝŋ, mor ka we yea jam ne ki. 15We kwo kyaŋ Dǝɓlii man mo tǝ kyaŋ we tǝgbana cok mai Masǝŋ mo nyi ɓo we ka we ǝ̃ǝ ne ko 16tǝgbana naa pa man Paulus mo ŋwǝǝ ɓǝ ah ɓo nyi na tǝ ɓǝ mai ne fatan mai Masǝŋ mo nyi ɓo nyi. Ŋwǝǝ ɓǝ ah ɓo pǝ leetǝr ah daŋ. Pǝ cok mai mo faa ɓǝ ah ɓo gŋ daŋ, ɓǝ ah pǝgaɓ ka laa mor ahe, za mai mo tǝra fan ki ya, so mo ka gak uura ya, zyakra fahlii fer ɓǝ ahe, tǝgbana mai mo joŋra ɓo ne Ɗerewol Masǝŋ manyeeki ah ta. A mor ka muŋ suu ɓǝǝra.
17Amma awe, za 'yah ɓe, we tǝ ɓǝ ah ɓo daga ɓaaɓe. We joŋ yella, ka we soɓ za maɓea ah mo kwakra we ka zyak we ne ɓǝɓe' ɓǝǝ ka, ka we tǝɓ ɓal gin pǝ cok ɓii mai we uu ɓo gŋ ge lal ka. 18Amma we giŋ ge pel pǝzyil gboŋgboŋ ne tan Dǝɓlii ne pa ǝ̃ǝ man Yesu Kristu. Kristu yea pǝyǝk daga zǝzǝ̃ǝko, ŋhaa ga lii! Amen.
Bible Moundang © Alliance Biblique du Tchad, 1996.