2 KEE ƁƏ 4
4
Fan ma joŋ yeɓ yaŋ Masǝŋ
1Goŋ Salomo coo cok joŋ syiŋ ma ne vãm syẽ, wah ah meetǝr jemma, 'ah ah laŋ meetǝr jemma ta, giŋ ah meetǝr dappe.#Pǝ̃ǝ 27:1-2 2So coo tahsah daaro ne vãm syẽ ka kan mabii ne ko, daga zah ah ma kǝi ŋhaa ka ga dai zah ah ma kǝki ahe, a meetǝr dappe, giŋ ah ma ga sǝŋ meetǝr gwa ne raita, 'ah ah meetǝr jemma tǝtǝl dappe. 3Morkǝsǝŋ tǝkee zah ah foto wǝǝ dǝǝ ryaŋ ɓo daŋ. Foto dǝǝ ah lǝǝ ɓo fal ki gwa, mgbãa ki ɓo ne tahsah daaro ah sǝ. 4Daaro ah kan ɓo tǝ foto wǝǝ dǝǝ jemma tǝtǝl gwa. Jinra nahnǝn ge ɓo fahsǝŋ sai, jin ge ɓo fah morcomlil sai, a fah morkǝsǝŋ sai a nǝfah morcomzah'nan sai ta, mabii ah uu ɓo tǝ ɓǝǝra, zahmor ɓǝǝ laŋ jin ge ɓo nǝfah kǝɓǝrri. 5Yǝk tahsah ah a tǝgbana 'ah pǝlam jolle, kah zah ah a tǝgbana zah tahsah ma zwan bii, dǝɓ kwan tǝgbana fãi kulli, mabii ah ɓaŋ liitǝr ɓo tǝgbana 120.000. 6So coora tahsah er bii jemma, woora rǝk zah yaŋ Masǝŋ nǝjokǝsãh dappe, rǝkra laŋ nǝfah jokǝlǝɓai dappe ta, mor ka vãh nǝǝ faɓal mai moo joŋra syiŋ ne ko. Bii ma pǝ daaro malii ah a mor ka za joŋzahsyiŋ mo vãhra jol ne ko.#Pǝ̃ǝ 30:17-21
7-8So coora kpuu pitǝrla ma ne jol ma vãm kaŋnyeeri jemma tǝgbana fahlii ah mo cuu ɓo, ne taabǝl gŋ jemma ta, so woora rǝk ɓǝr yaŋ Masǝŋ. Kpuu pitǝrla ma ne jol dappe ne taabǝl dappe ta, woora rǝk nǝfah jokǝsãhe, rǝk ra nǝfah jokǝlǝɓai laŋ nai ta, so vuura cii ma vãm kaŋnyeeri temere ta.#Pǝ̃ǝ 25:31-40#Pǝ̃ǝ 25:23-30 9Zyeɓra cok ɓǝr pedǝǝ yaŋ Masǝŋ ka za joŋzahsyiŋ mo haira gŋ. So zyeɓra cok malii ah nǝfah kǝlal ah ta, zahfah ah ra daŋ syeera vãm syẽ ge ɓo wol ahe. 10Kanra mabii ah ɓo kah yaŋ Masǝŋ gwari, nǝfah morkǝsǝŋ ah ka ga nǝfah kǝmorcomzah'nanne. 11-16Huram joŋ ciiri, fan woo cokki, tǝkine tahsah camcam daŋ. Vǝr yeɓ joŋ fan mai daŋ mo faako ɓǝ ah nyi goŋ Salomo zye gak joŋ mor yeɓ yaŋ Masǝŋ naiko: Wǝǝdǝǝ matǝ gwa, ne fan ma ne sok tǝ gwa mai mo tǝtǝl wǝǝdǝǝ sǝŋ, ne foto fan ma kaŋ na jin mo rii fan ma ne sok tǝ gwa mo tǝtǝl wǝǝdǝǝ matǝ gwa, tǝkine fan ma na lee kpuu grenadin temere nai mo kiŋ ɓo tǝtǝl jin mai mo rii fan ma tǝtǝl wǝǝdǝǝ ɓo zahlǝŋ gwa, ne tahsah er bii jemma, ne mabii, ne foto wǝǝ dǝǝ matǝ jemma tǝtǝl gwa mabii mo tǝtǝl ahe, ne ciiri, fan woo cokki tǝkine tǝfẽare. Huram dǝɓlii za zyeɓ fan zyeɓ fan marai daŋ ne vãm syẽ ma sǝsãhe, tǝgbana mai goŋ Salomo mo faa ɓo, mor ka joŋ yeɓ yaŋ Dǝɓlii.
17Goŋ joŋ fan yeɓ marai daŋ kah el Yordan pǝ cok coo fan mai mo kǝsyil Sukot ne Zartan. 18Joŋ fan ma ne vãm syẽ camcam gŋ pǝlli, ŋhaa dǝɓ ka gak tan kee pãa ah ya. 19Goŋ Salomo joŋ fan yeɓ camcam ma joŋ yeɓ yaŋ Masǝŋ naiko: Cok joŋ syiŋ ma ne vãm kaŋnyeeri, taabǝl ma rǝk farel ma nyi nyi Masǝŋ cẽecẽe, 20kpuu pitǝrla camcam tǝkine pitǝrla ra ma ne vãm kaŋnyeeri masãh ah mai moo kanra wii ne pel cok matǝdaŋdaŋ tǝɗe' tǝgbana ɓǝ ah mo cuu ɓo, 21ne fãi fan mai mo gŋ mor gai ahe, ne pitǝrla, ne tǝfẽa mai mo ne vãm kaŋnyeeri masãh ahe, 22ne nyah camcam, ciiri, tahsah ma tǝǝ ɓǝrdi, tǝkine tǝkpel woo yakwii. Fan marai daŋ joŋ ɓo ne vãm kaŋnyeeri masãhe. Zahfah yaŋ Masǝŋ ma nefah kǝɓǝr yaŋ ne zahfah ma ga pǝ cok matǝdaŋdaŋ tǝɗe' daŋ syeera vãm kaŋnyeeri ge ɓo wol ahe.
Bible Moundang © Alliance Biblique du Tchad, 1996.