2 KEE ƁƏ 26
26
Osias goŋ Yuda
(2 ZaG 14:21-22; 15:1-7)
1Za Yuda daŋ taira, ɓaŋra Osias we Amazia mai mo joŋ syii ɓo jemma tǝtǝl yea, kan goŋ ne pǝ cok pah ahe. 2Osias nyiŋ yaŋ ma ɗii ne Elat fahfal wul pah ahe, so vuu yaŋ ahe.
3Ne cok Osias mo kaa goŋ, ka joŋ syii ɓo jemma tǝtǝl yea, kaa goŋ yaŋ Jerusalem syii jemma dappe tǝtǝl gwa. A ɗii mah ah ne Jekolia, mǝlaŋ yaŋ Jerusalem yo. 4Osias joŋ fan ma 'nyah suu Dǝɓlii tǝgbana pah ah Amazia mo joŋ. 5Ne cok zah'nan Zakarias pa ma gbah jol ah ne ɓǝ Masǝŋ mo no sǝŋ ba, joŋ mor Dǝɓlii pǝsãhe, so Masǝŋ ẽe ko.
6Comki Osias ge ruu sal ne Filistien. Dah ɓaale yaŋ Gat, ne ma yaŋ Jabnia ne Asdod daŋ ge sǝŋ, so vuu yaŋ maswah ah ra kah yaŋ Asdod gwari, so ne pǝ sǝr Filistien manyeeki ah daŋ. 7Masǝŋ gbah jol ah nĩi Filistien ne za Araɓ mai mo kaara ɓo Gurba'al, tǝkine Munien daŋ. 8Ammonien a gin haora zah wo Osias ne fanne, Osias ge pǝswahe, ŋhaa tǝɗii ah zoo ge dai sǝr Egiɓ.
9Vuu yaŋ sal mawah ah ra yaŋ Jerusalem, maki ah kah zahfah Ma Ne Nyahe, maki ah kah zahfah Elle, maki ah pǝ cok mai ɓaale mo ge rãa ɓo gŋ. 10So vuu yaŋ sal mawah ah ra pǝ cok ma tǝ sǝr sǝŋ ah ra camcam, so cii lak bii ra gŋ ta, mor a ne dǝǝ pǝ cok ma tǝ waa ah ne ma tǝ sǝr sǝŋ daŋ pǝlli. A 'yah ɓǝ pǝǝ pǝlli, a lai za ka mo yeara ne 'wah kpuu vin ne 'wah makol daŋ pǝ cok ma tǝ waa ah ne ma tǝ sǝr sǝŋ daŋ.
11Osias a ne za sal pǝpãare, zyeɓra suu ɓǝǝ kaa ɓo ne ka ruu salle. Ɗerewol mai mo ŋwǝǝra tǝɗii za sal ah ra ɓo gŋ, a jol za ŋwǝǝ fan ah Jiel ne Maaseja mai Hanania ma kǝsyil zaluu sooje goŋ ye mo lwaara ɓo. 12Pãa zaluu sooje ah ra 2.600. 13Lwaara sooje maswah ah mai moo gak ruura sal ne za syiŋ goŋe, pãa ɓǝǝ 307.500. 14Osias nyi fan sal nyi ra daŋ: balle, zǝǝ, njok salle, mbǝro vãmme, saŋne, guu, ne tǝsal ma 'nǝǝ ne garviŋ. 15So za fatan ah ra zyeɓra masin nyi yaŋ Jerusalem ka kan tǝ yaŋ mawah ahe, ne tǝ nyah ɓaale, mor ka 'nǝǝ guu ne tǝsalle. Tǝɗii Osias zoo cok daŋ. A gbahra jol ah ne fan pǝlli, mor ahe so joŋ ko ŋhaa ge pǝswahe.
Osias lwaa kiita tǝ ɓǝ yii suu ahe
16Amma ne cok goŋ Osias mo joŋ pǝswahe, zahzyil ah tǝŋ yii suu, ŋhaa ɓǝ ah joŋ so ciŋ lee ahe. Joŋ faɓe' wo Dǝɓlii Masǝŋ ahe, mor dan ge ɓǝr yaŋ Masǝŋ ka tǝǝ ɓǝrdi pǝ cok joŋ syiŋ ma tǝǝ ɓǝrdi. 17Pa joŋzahsyiŋ Azaria ne za joŋzahsyiŋ maswah ma ne zahzyil ara jemma nama, foora mor goŋ ge gŋ mor ka cak ko. 18Faara nyi ko: Osias, mo ka ne fahlii ka tǝǝ ɓǝrdi wo Dǝɓlii ya. Sai za joŋzahsyiŋ ma morsǝ̃ǝ Aron mai mo nǝǝra ra rǝk ɓo mor yeɓ ah ye ne fahlii ah to. Mo pǝ̃ǝ gin pǝ cok matǝdaŋdaŋ maiko. Amo joŋ faɓe' ɓo wo Dǝɓlii Masǝŋ, ka ga yii mo tǝ ɓǝ fan mai mo joŋ ya.#Pǝ̃ǝ 30:7-8; KeeZ 3:10
19Osias uu ɓo ɓǝr yaŋ Masǝŋ kah cok joŋ syiŋ ma tǝǝ ɓǝrdi, a ne tǝkpelzaŋraŋ ma tǝǝ ɓǝrdi jolle, so ɓaŋ kpãh ne za joŋzahsyiŋ ra pǝ'manne. So ne pel gwari nai sǝ, tǝkpiŋ pǝ̃ǝ zahpel ahe. 20Pa joŋzahsyiŋ Azaria, ne za joŋzahsyiŋ manyeeki ah mo kwora syem pǝ̃ǝ ɓo zahpel goŋ naiko, so nĩira ko ne swah ka mo pǝ̃ǝko gin yaŋ Masǝŋ, so ako laŋ hǝǝ ka pǝ̃ǝ ga lalle, mor Masǝŋ ŋgoŋ kiita ɓo tǝl ahe.
21Goŋ Osias kaa ne tǝkpiŋ ah nooko, ŋhaa dai zah'nan wul ahe. Ka ne fahlii ka ga yaŋ Masǝŋ faɗa yao, kaa pǝ yaŋ ma syak ahe, soɓ yeɓ ah daŋ tǝɗe', wel ah Yutam ye joŋ yeɓ sǝr pǝ cok ahe.
22Profeto Esaia we Amoz ŋwǝǝ ɓǝ fan mai Osias mo joŋ ka ako tǝ goŋ daŋ. 23Osias wuu, ciira ko pǝ cok mai moo ciira za goŋ gŋ, amma ciira ko pǝ pal ma cii za goŋ ya, mor a ne syem fan suu. Wel ah Yutam kaa goŋ pǝ cok ahe.#Esa 6:1
Bible Moundang © Alliance Biblique du Tchad, 1996.