1 TESSALONIKIEN 3
3
1Ne cok ru kwo ru ka gak rõm kyaŋ yao, ru foo ka ru kaa ɓuu yaŋ Aten.#Yeɓ 17:15 2Ru pee naa pa man Timoteus mai mo tǝ joŋ yeɓ Masǝŋ ne ru ne cuu Ɓǝ'nyah Kristu ga wo ɓiiri. Ru pee ko ka mo ge swaako we tǝkine gbah jol ɓii pǝ iŋ ɓiiri, 3mor ka koo zune kǝsyil ɓii mo pii soo fahfal ne bone mai ka, mor awe ne suu ɓii we tǝ ɓe, bone ma morãi a kǝsyil fan mai Masǝŋ mo kan ɓo mor mana. 4Mor ne cok ru yea wo ɓiiri, ru hǝǝ faa nyi we kǝpelle, na ga laa bone. So awe tǝ ɓo belbelle, fan ah ge joŋ ɓo nai 'manna. 5Mor ah me pee Timoteus wo ɓiiri, me ka gak rõm kyaŋ ga nai yao, me pee ko mor ka laa ɓǝ iŋ ɓiiri. Mor me ɗuu galle, ɗah maki Satan kǝǝ we ɓe ne, so ka yeɓ ɓuu daŋ ga yea tǝkolle.
6Amma zǝzǝ̃ǝko Timoteus gee wo ɓii ge wo ɓuu ɓe, ge kee ɓǝ 'nyah ɓǝ iŋ ɓii tǝkine 'yah ɓii we ne nyi ru. Ge faa nyi ru, cẽecẽe awe foo ɓǝ ɓuu pǝlli, we ne koŋ ka ẽe ru tǝgbana ru ne koŋ ka ẽe we ta.#Yeɓ 18:5 7So kǝsyil ɓǝ gaɓ ɓuu ru ne ko tǝkine bone daŋ laŋ, ɓǝ mai ru laa tǝ ɓǝ ɓii swaa zahzyil nyi ru pǝlli wee pa ɓe. Ɓǝ iŋ ɓii we ne ye swaa zahzyil nyi ru. 8Mor zǝzǝ̃ǝko aru ne cee 'manna, mor we uu ɓo ne Dǝɓlii pǝswahe. 9Mor zǝzǝ̃ǝ ru gak joŋ osoko nyi Masǝŋ mor ɓiiri. Ru joŋ osoko nyi ko mor ɓǝ 'nyah mai ru laa ɓo pel Masǝŋ man tǝ ɓǝ ɓiiri. 10Com ne suŋ daŋ ru tǝ fii ko pǝlli ka mo nyi fahlii nyi ru ka ga ẽe we ne suu ɓuuru, ka ga baa tǝcoŋ fan mai mo pee we ɓo pǝ iŋ ɓiiri.
11Masǝŋ Pa man ne suu ahe, ne Dǝɓlii man Yesu mo zyeɓ fahlii mor ka ru ge ẽe we! 12Dǝɓlii mo joŋ ka 'yah ɓii wo ki tǝkine 'yah za daŋ mo ge pel pǝlli, ka mo yea tǝgbana mai 'yah ɓii mo pǝ zahzyil ɓuuru. 13Ne fahlii mai a ga swaa zahzyil ɓii ka we yea daŋdaŋ tǝkine bai ɓǝɓe' pel Masǝŋ Pa mana, ne cok gin Dǝɓlii man Yesu ne za mǝ ah daŋ#3:13 Za mǝ ah daŋ: a gak cuu angeloi tǝkine za syee mor Masǝŋ mai mo wukra kǝpelle..
Bible Moundang © Alliance Biblique du Tchad, 1996.