1 ZA GOŊE 7

Salomo vuu yaŋ goŋe

1Salomo vuu yaŋ goŋ syii jemma tǝtǝl sai, vǝr yeɓ yaŋ daŋ ne ko.

2Salomo vuu yaŋ ma ɗii ne Gǝ̃ǝ Liban, wah yaŋ ah a meetǝr jemma dappe, 'ah ah a meetǝr jemma gwa tǝ dappe, giŋ ah a meetǝr jemma tǝ dappe, yaŋ ah a ne wǝǝdǝǝ kpuusok bah nai, tǝkine bǝraŋ kpuu bah mo ɓaa ɓo tǝ wǝǝdǝǝ kpuusok ah ra. 3Lao tǝtǝl ah sǝŋ ne kpuu bahre, ŋhaa ge dai pǝ cok mai bǝraŋ mo gŋ mo tǝ wǝǝdǝǝ kpuusok jemma nai tǝtǝl dappe. Lǝǝ ah ra daŋ a ne kpuusok jemma tǝtǝl dappe, jemma tǝtǝl dappe. 4So kpuu no lǝǝ ɓo wo ki gŋ sai, zahtǝwoo rǝk ɓyaŋ ki ɓo jaŋjaŋ zahlǝŋ sai. 5Zahfah ah ra tǝkine zahtǝwoo ah ra daŋ a ne nyah nai, zahtǝwoo ah rǝk ɓyaŋ ki ɓo zahlǝŋ sai.

6Joŋ yaŋ ma ne wǝǝdǝǝ, wah ah meetǝr jemma gwa tǝ dappe, 'ah ah meetǝr jemma tǝ dappe, joŋ yaŋ ah tǝgbana daŋki, a pel yaŋ ma ɗii ne Gǝ̃ǝ Liban.

7Salomo so zyeɓ daŋki ka fakal goŋ mo kan gŋ ka kaa ŋgoŋ kiita, tǝgba faa: Daŋki Kiita. Lǝǝra kpuu bah daga tǝ sǝr sǝŋ yaŋ ŋhaa ge dai mor bǝraŋdǝǝsǝŋ.

8Yaŋ Salomo mai moo kaako gŋ mo pǝ yaŋ maki ah kǝɓǝr yaŋ, vuura jur ki ɓo ne daŋki Gǝ̃ǝ Liban. So Salomo vuu yaŋ maki ah jur daŋki nyẽe faɗa, nyi nyi mǝlaŋ Farao mai mo ɓaŋko kan ɓo.#1 ZaG 3:1

9Yaŋ rai daŋ vuu ɓo ne tǝsal masãh ah ra, mai mo zyezyeɓ ɓo mo lii ɓo lii, mo so ŋgom ɓo nǝfah kǝɓǝr tǝkine fah kǝlal ah daŋ ne syii, tǝŋ daga mor ah mo kpii ɓo sǝŋ ŋhaa rwǝ̃ǝ ahe, daga fahfal yaŋ ah lal ŋhaa ge dai zahsyee yaŋ ah malii gbǝm. 10Mor ah laŋ kpii ɓo ne tǝsal masãh ah ne tǝsal maluu ahe, tǝsal mai mo lii ɓo meetǝr nai nai. 11Tǝtǝl ah sǝŋ laŋ a ne tǝsal masãh ah mai mo zyezyeɓ ɓo mo lii ɓo lii, tǝkine kpuu bahre. 12Yaŋ malii ah ryaŋ ɓo ne tǝsal mai mo zyeɓ ɓo mo lǝǝ ɓo fal ki sai, kpuu bah lǝǝ ɓo tǝl ah ɗal vaŋno. Pedǝǝ yaŋ Dǝɓlii ne daŋki zah yaŋ ah daŋ a naiko ta.

Fan yeɓ mai mo zyeɓ kan ɓo mor yaŋ Masǝŋ

(2 KeeƁ 3:15–5:1)

13So goŋ Salomo pepee ge ɗii dǝɓ ki sǝr Tirus a ɗii ne Huram. 14Ako ye na mawin wul daga morsǝ̃ǝ Naftali, amma pam dǝɓ sǝr Tirus yo, a ɓaŋ vãm syẽ, a ne yella ne tǝtǝl tǝkine fatan ma joŋ yeɓ fan ma ɓaŋ ne vãm syẽ no cam. Ge wo goŋ Salomo ka joŋ yeɓ mai mo 'yahko daŋ nyi ko.

15Ɓaŋ wǝǝdǝǝ ma ne vãm syẽ ah gwa, wah ah vaŋno a meetǝr doraŋ, kimra suu mai wah ah mo nǝn meetǝr yea ge wol ahe, waddǝǝ patǝ gwa ah laŋ a nai ta. 16Ɓaŋ fan ki ne vãm syẽ camcam gwa joŋ ne sok tǝgbana kpuusokki mor ka kan ga tǝtǝl waddǝǝ kpuu sǝŋ, wah fan ah vaŋno a meetǝr gwa ne raita, maki ah laŋ nai ta. 17So kaŋ fan na jin gwa, ne suu vãm a tǝgbana gǝǝnyiŋ, mor ka jǝŋ ga tǝtǝl wǝǝdǝǝ mai mo ɓaŋra ɓo mo tǝ fan mai mo kan ɓo tǝ wǝǝdǝǝ ko. Tǝtǝl ah vaŋno ah a ne fan ma na jin gŋ rǝŋ rǝŋ. 18Joŋ fan tǝgbana lee kpuu ma ɗii ne grenadin mor ka rii fan ma ne sok tǝ gwa matǝ wǝǝdǝǝ, kiŋ tǝtǝl fan ah gwa daŋ zahlǝŋ gwa. 19Fan ma ne sok tǝ gwa a no tǝ wǝǝdǝǝ ahe, fan no gŋ tǝgbana fãi kulli, giŋ ah a nǝn meetǝr gwa. 20Tǝtǝl sok ah matǝ gwa nǝn kǝki ah fan ki no gŋ, a tǝgbana dǝɓ ul tǝ'yak ge ɓo ɓǝr fanne, fan ah a fahfal fan ma na jinni, fan ma na lee kpuu grenadin temere gwa kiŋra fan ma ne sok gwa ɓo daŋ. 21Woo wǝǝdǝǝ ah ra syii mor daŋki zah yaŋ Masǝŋ, syii waddǝǝ maki ah nǝfah jokǝsãhe, a ɗii ne Jakin, tǝgba faa: Masǝŋ ye kan ɓo. So syii waddǝǝ maki ah nǝfah jokǝlǝɓai, a ɗii ne Boas, tǝgba faa: Dǝɓ lwaa swah jol Masǝŋ. 22Huram vǝr joŋ yeɓ wǝǝdǝǝ naiko.

23Fahfal ah Huram ɓaŋ tahsah ne vãm syẽ, a tǝgbana daaro, ka kanra bii ne ko, so ɗiira bii ah ne Mabii. Daga zah ah maki, ŋhaa ge dai zah ah ma kǝki ahe, a meetǝr dappe. Giŋ ah a meetǝr gwa ne raita. 'Ah ah a meetǝr jemma tǝ dappe. 24Fan ma na gbel kiŋ ɓo zah ah ma mor kǝsǝŋ, kǝsyil meetǝr vaŋno a yea gŋ jemma gwa. Kiŋ Mabii ah daŋ ɓo zahlǝŋ gwa, vãm ah mo ɓaŋra ɓo a tǝki vaŋno ne ko. 25Mabii ah uu ɓo tǝ foto wǝǝ dǝǝ ma ɓaŋ ne vãm syẽ jemma tǝtǝl gwa, a fahsǝŋ sai, a fah kǝmorcomlil sai, a fah morkǝsǝŋ sai, a fah morcomzah'nan sai, Mabii uu ɓo tǝtǝl ɓǝǝra. Zahmor ah ra daŋ jin ge ɓo nǝfah kǝɓǝrri. 26Yǝk tahsah ah a tǝgbana 'ah jolle. Kahzah ah a na tǝkee zah we tahsah malaŋ ma zwan bii, dǝɓ kwan tǝgbana fãi kulli, Mabii ah ɓaŋ liitǝr 80.000.

27So Huram joŋ muŋta pǝr ma ne vãm syẽ jemma, wah ah a meetǝr gwa, 'ah ah a meetǝr gwa, giŋ ah a meetǝr vaŋno ne raita. 28Joŋ muŋta ah naiko: muŋta a ne cok gban jol tǝtǝl ah sǝŋ ɓyaŋ ki ne waddǝǝ ma kǝsyil ahe. 29Ɗea fan wo suu ah tǝgbana ɓolle, wǝǝ dǝǝ, tǝkine cerubim. Tǝtǝl ah sǝŋ ne sǝŋ ah daŋ ɗea fan gai manyeeki ah ɓo gŋ ta. 30Muŋta ah ra ne ɓal nai nai ɓaŋ ɓo ne vãm syẽ tǝkine vãm mai ɓal ah ra mo maa ɓo gŋ daŋ. So fan mai mo maa ɓo pǝzyil ɓal ah laŋ mgbãa ki ne vãm maki ah a ne nyah nai. Fal ɓal rai camcam daŋ ɓaŋ ɓo tǝki vaŋno ne kpuu suu mah ah malii. Amma joŋ pǝ̃ǝ fan gai mai mo wo suu muŋta ge lal a. 31Zah ah ge kan ɓo tǝ fan gai matǝ kǝsǝŋ ahe, giŋ fan ah a raita meetǝr, 'ah ah a gwari ne meetǝr vaŋno, a ne nyah nai, ka gǝrlǝŋ ya. 32Ɓal muŋta ah ra nai daŋ mai mo mor kǝsǝŋ kpuu suu ah malii a tǝgbana raita meetǝr, vãm mai ɓal ah ra mo maa ɓo gŋ a mor kǝsǝŋ muŋta ahe. 33Fan ah ra joŋ ɓo tǝki vaŋno ne ɓal muŋta: vãm ma maa pǝ ɓal ahe, vãm ɓal ahe, vãm manyiŋ ma kǝsyil ɓal ahe, tǝkine vãm malaŋ mai vãm manyiŋ moo maa gŋ. Daŋ ɓaŋ ɓo ne vãm syẽ. 34Fan ma wo ɓal muŋta nai daŋ ɓaŋ ɓo tǝki vaŋno ne kpuu suu ah malii daŋ. 35Fan maki ah no tǝtǝl muŋta ah sǝŋ mai mo ɓaŋ ɓo ne vãm syẽ a gǝrlǝŋ, 'ah ah dai raita meetǝr ya. Pǝ cok ah fan gban jol no gŋ, a ne vãm syẽ ta. 36Ɗea cerubim, ɓolle, ne kpuu dabonooje tǝkine fan gai tǝtǝl ah sǝŋ pǝ cok mai mo ɗea fan gŋ ya ba. 37Muŋta ah ra jemma daŋ joŋra jur ki ɓo, fan yeɓ ɓǝǝ laŋ vaŋno.

38Huram so joŋ tahsah daaro ma vãm syẽ ka kan tǝ muŋta jemma daŋ. Giŋ ah ma ga sǝŋ a meetǝr gwa, ɓǝr ah ɓaŋ liitǝr 1.600.#Pǝ̃ǝ 30:17-21 39Zyiira muŋta matǝ dappe ah fah jokǝsãh yaŋ Masǝŋ, matǝ dappe mai laŋ jokǝlǝɓai. Kanra tahsah mabii fah kǝjokǝsãh yaŋ Masǝŋ a fah morkǝsǝŋ ahe.

40Huram joŋ cii ma vãm syẽ mor ka woo sãhe, ne fan woo cokki, tǝkine tahsah camcam. Huram vǝr yeɓ mai mo joŋko nyi goŋ Salomo ɓǝr yaŋ Dǝɓlii daŋ naiko:#2 KeeƁ 4:11–5:1 41wǝǝdǝǝ gwa, ne fan ma ne sok tǝ gwa mai mo tǝtǝl wǝǝdǝǝ, fan ma na jin mor rii fan ma ne sok tǝ gwa mo tǝtǝl wǝǝdǝǝ a gwa, 42tǝkine lee kpuu grenadin temere nai ma kiŋ tǝtǝl jin mai mo rii fan ma tǝtǝl wǝǝdǝǝ zahlǝŋ gwa, 43muŋta jemma ma ne tahsah ma kan tǝ muŋta ah ra, 44ne tahsah daaro Mabii vaŋno tǝkine foto wǝǝ dǝǝ matǝ jemma tǝtǝl gwa ma mor kǝsǝŋ mabii, 45cii ma mor woo sãhe ne fan woo cokki, tǝkine tahsah camcam daŋ.

Fan mai Huram mo joŋ nyi goŋ Salomo mor yaŋ Dǝɓlii, fan ah ra ne vãm syẽ mai moo sǝsãhe. 46Ɓaŋra fan yeɓ ah kah el Yordan pǝ cok sǝr masãh ah mai mo kǝsyil Sukot ne Zartan. 47Salomo soɓ fan ma ne vãm daŋ nooko, lii yǝk ah ra ya, mor a pǝpãa pǝlli, keera pãa yǝk vãm syẽ ah ra ya.

48Salomo so joŋ fan yeɓ ma joŋ yeɓ ɓǝr yaŋ Masǝŋ daŋ: cok joŋ syiŋ ma tǝǝ ɓǝrdi, a ne vãm kaŋnyeeri, ne taabǝl ma vãm kaŋnyeeri mor kan farel mai moo kanra pel Dǝɓlii cẽecẽe,#Pǝ̃ǝ 25:23-30; 30:1-3 49ne pitǝrla ma ne jol ma vãm kaŋnyeeri masãh ahe, mai mo nǝfah jokǝsãh ah dappe, ma nǝjokǝlǝɓai dappe ta, sunduku gbanzah Dǝɓlii a kǝsyilli, ne fãi fan ahe, ne pitǝrla ah ra, ne tǝfẽa ah ra daŋ a ne vãm kaŋnyeeri,#Pǝ̃ǝ 25:31-40 50ne cii ah ra, ne wee tahsah manyeere, ne tǝkpel tǝǝ ɓǝrdi ah daŋ a ne vãm kaŋnyeeri masãhe. Sarnyẽe ma ɓaa zahfah cok matǝdaŋdaŋ tǝɗe', tǝkine ma ɓaa zahfah mǝ yaŋ Masǝŋ daŋ a ne vãm kaŋnyeeri.

51Yeɓ mai goŋ Salomo mo joŋ ne vuu yaŋ Dǝɓlii vǝr naiko. So Salomo woo fan mai pah ah David mo nǝǝ rǝk ɓo mor yeɓɓe: vãm solai, vãm kaŋnyeeri, tǝkine fan yeɓ daŋ ge rǝk ɓǝr yaŋ rǝk fan pǝ yaŋ Masǝŋ.#2 Sa 8:11; 2 KeeƁ 18:11

Currently Selected:

1 ZA GOŊE 7: MUAR

Highlight

Compare

Copy