1 ZA GOŊE 21

Akaɓ kyeɓ ka nyiŋ 'wah Nabot

1Dǝɓ ki no Jezereel a ɗii ne Nabot, a no ne 'wah kah yaŋ mai Akaɓ goŋ Samaria mo ge vuu ɓo gŋ. 2Comki Akaɓ ge faa ɓǝ nyi Nabot tǝ ɓǝ 'wah ahe, faa: Mo nyi 'wah kpuu vin ɓo mai mo fahceekor ɓo nyi me, mor a kah yaŋ ɓe gwari, me ga nyi 'wah masãh ah ma kal mai nyi mo pǝ cok ahe, mo 'yah ɓe laŋ, me ga soo mo ne lak nǝn daidai ahe. 3Amma Nabot faa nyi Akaɓ: Dǝɓlii mo cak me ne nyi faren yaŋ mai me lwaa gin jol pa ɓe ra ka nyi mo.

4Akaɓ kal ge yaŋ ah ne ɓǝ foo tǝkine zahzyil syenne, mor ɓǝ mai Nabot ma Jezereel mo faa nyi ko: Me ka nyi faren mai me re ɓo yaŋ pa ɓe ra nyi mo ya. Ge swǝ ge sǝŋ tǝ faswul ahe, joŋ suu ah na syemme, zyii ka ren fan a. 5Mawin ah Jesabel dan kal ge wol ah ɓǝr yaŋ faa nyi ko: Mo foo ɓǝ mo ka tǝ zyii ren fan a mor fẽene? 6Zyii faa nyi ko: Me faa ɓǝ ɓo ne Nabot Jezereeliyo, me faa nyi ko: Mo nyi 'wah ɓo me, me lee ne lak o, wala mo 'yah ɓe laŋ, me ga nyi 'wah maki ah nyi mo pǝ cok ahe. Amma zyii faa zye ka nyi 'wah kpuu vin 'min nyi me ya.

7So mawin ah Jesabel faa nyi ko: Amo ye ka ne swah zǝzǝ̃ǝ tǝ sǝr Israel daŋ ya ne? Mo ur sǝŋ mo re farelle, ka zahzyil ɓo mo laa pǝ'nyahre. Ame ga nyi 'wah kpuu vin Nabot Jezereeliyo nyi mo.

8So ŋwǝǝ leetǝr ne tǝɗii Akaɓ, kan lamba tǝ leetǝr ah ra ne lamba ma ne tǝɗii Akaɓ, pea leetǝr ah ra ge wo zaluu ma yaŋ Jezereel yaŋ mai Nabot mo kaa ɓo gŋ. 9Ŋwǝǝ ɓǝ pǝ leetǝr ah ra naiko: We lai ɓǝ syẽe fanne, we kan Nabot ge pǝ cok mayǝk ah kǝsyil zana. 10We rǝk za matǝ vǝrvǝr ah ra kah ah gwa, ka mo cera ko mo faara: Faa ɓǝɓe' tǝ Masǝŋ tǝkine goŋ daŋ. Ka we gbǝ ko pǝ̃ǝ ge lal ne we ɓaa ko ne tǝsal pǝ wulli.

11Zaluu ma yaŋ Jezereel joŋra tǝgbana Jesabel mo faa, na ɓǝ mai mo ŋwǝǝ ɓo pǝ leetǝr mo pea ge ɓo wo ɓǝǝra. 12Laira ɓǝ syẽe fanne, kanra Nabot pǝ cok mayǝk ah kǝsyil zana. 13Za matǝ vǝrvǝr matǝ gwa ge haira kah ahe, cera ko pel za faara: Nabot faa ɓǝɓe' tǝ Masǝŋ tǝkine goŋ daŋ. So ɓaŋra ko pǝ̃ǝ ge fahceekor lal ne ko ɓaara ko gŋ ne tǝsal pǝ wulli. 14Fahfal ah peera pee ge wo Jesabel faara: Ɓaara Nabot ne tǝsal wǝ ɓe.

15Ne cok Jesabel mo laa ɓaara Nabot ne tǝsalle, wǝ ɓe, Jesabel faa nyi Akaɓ: Mo ur o, mo ɓaŋ 'wah kpuu vin Nabot Jezereeliyo mai mo zyiiko ka mo lee ne lakr a kŋ o. Mor Nabot wǝ ɓe. 16Ne cok Akaɓ mo laa Nabot wǝ ɓe, Akaɓ ur sǝŋ, so kal ge pǝ 'wah kpuu vin Nabot Jezereeliyo, mor ka ɓaŋ ka syak ahe.

Masǝŋ ŋgoŋ kiita tǝ Akaɓ ne Jesabel

17Amma Dǝɓlii faa nyi Elias Tisbiyo, faa: 18Mo ur ka mo ge zyaŋ tǝ Akaɓ goŋ Israel mai mo no yaŋ Samaria a pǝ 'wah kpuu vin Nabot, kal ge ɓo gŋ mor ka ɓaŋ 'wah ah ka syak ahe. 19Mo faa nyi ko: Dǝɓlii faa sye: Amo i Nabot pǝ wulli, mai kii ya, mo so 'yah nyiŋ fan ah ta ne? Dǝɓlii faa: Pǝ cok mai goo mo lahra syim Nabot gŋ, a ga lahra syim ɓo gŋ ta.#1 ZaG 22:38 20Akaɓ faa nyi Elias: Amo lwaa me sye ɓe pa syiŋ ɓe. Elias zyii zah ah faa: Ame lwaa mo ɓe, mor mo soɓ suu ɓo ɓo mor ka joŋ faɓe' wo Dǝɓlii. 21Mo laa ɓe ne? Dǝɓlii ga joŋ mo laa bone, a ga nĩi morsǝ̃ǝ ɓo myah ga lal fetfet, a ga vǝr za Akaɓ mawǝǝ daŋ, dǝɓ mai mo lwaa tǝtǝl suu ah ɓo ne dǝɓ mai mo byak yo daŋ ga lalle. 22A ga joŋ ne za ɓo tǝgbana mo joŋko ne za Jeroboam we Nebat, tǝgbana mo joŋko ne za Baasa we Ahija ta, mor mo ɓeɓ zahzyil ɓo nyi ko pǝlli, so mo kǝǝ za Israel danra pǝ faɓe' ta. 23Dǝɓlii faa ɓǝ tǝ Jesabel ta, faa: Goo ga re nǝǝ Jesabel ɓǝr ɓaale Jezereel.#2 ZaG 9:36 24Dǝɓ yaŋ Akaɓ mai moo ga wǝ tǝgǝǝ yaŋ, goo ga re nǝǝ ahe, dǝɓ mai moo ga wǝ pǝ 'wah cokki, juu ga re ko.

25('Manna, dǝɓ ma jur Akaɓ mai mo soɓ suu ah ɓo mor joŋ faɓe' wo Dǝɓlii kǝka, mawin ah Jesabel ye kǝǝ ko. 26Joŋ fan maɓea ah ɓo pǝlli, ne mai mo syee mor masǝŋ ki ra ryakryak tǝgbana Amorien mai Dǝɓlii mo nĩi ra pel za Israel.)

Akaɓ wonsuu ahe

27Ne cok Akaɓ mo laa ɓǝ mai naiko, ŋgǝ̃ǝ mbǝro wo suu ahe, so ɓaa fatãa ge wo suu, syẽe fanne, swǝ ge sǝŋ ne mbǝro tãa ahe, mo ur sǝŋ ka syee ɓe, a syee jokoko. 28Dǝɓlii faa ɓǝ nyi Elias Tisbiyo faa: 29Mo kwo Akaɓ mo wonsuu ah ɓo pel ɓe ɓe ne? Mor wonsuu ah pel ɓe, me ka joŋ ko laa bone pǝ zah'nan goŋ ah ya. Amma pǝ zah'nan wel ah ɓe, me ga joŋ bone ge tǝ za yaŋ ahe.

Currently Selected:

1 ZA GOŊE 21: MUAR

Highlight

Compare

Copy