1 ZA GOŊE 17

Tǝmgbuu wol Elias ne farelle

1Comki profeto Elias#17:1 Tǝɗii Elias, tǝgba faa: Dǝɓlii ye Masǝŋ ɓe. Tisbiyo ma Giliat ge wo goŋ Akaɓ, faa nyi ko: Me haa zah pǝ tǝɗii Dǝɓlii Masǝŋ Israel mai me tǝ joŋ yeɓ ahe, pǝzyil syii ma pel rai bam ka tǝ ya, mahm laŋ ka nǝn tǝ sǝr a, sai ka me faa ɓe.#Yak 5:17

2So Dǝɓlii faa nyi ko: 3Mo ur mo ge fah morcomzah'nanne, ka mo ge muŋ suu ɓo kah el Kerit ka ga nǝfah tǝkǝsǝŋ Yordan, 4ka mo zwǝ bii el ahe. Me ga faa nyi tǝmgbuu ka mo gera nyi mo ne farel gŋ.

5Joŋ tǝgbana ɓǝ mai Dǝɓlii mo faa, ur kalle, ge kaa kah el Kerit mai mo fah tǝkǝsǝŋ Yordan. 6Tǝmgbuu a woora tǝwaa tǝkine nǝǝ ga nyi ne ko ne zah'nan tǝkine lil daŋ. A zwan bii pǝ elle.

Elias ne mawin wul yaŋ Sarepta

7Fahfal ah nje, bii el ah ǝŋni, mor bam ka tǝ tan wo sǝr a. 8So Dǝɓlii faa ɓǝ nyi Elias faɗa: 9Mo ur mo ge yaŋ Sarepta sǝr Sidon, mor me faa ɓǝ ɓo nyi mawin wul gŋ ka mo kaa gŋ mo wolko mo.#Lu 4:25-26 10Elias ur kal ge yaŋ Sarepta. Ne cok mo ge dai zahgoo yaŋ ahe, lwaa mawin wul kŋ tǝ sǝǝ zahwii. Elias ɗii ko faa nyi ko: Mo bee bii gee me ne biŋ ka me zwǝ sa. 11So mawin tǝ ga ka ga bee bii o, Elias so ɗii ko faa: Mo coŋ tǝcoŋ tǝwaa mor jol biŋ gee me ne ta. 12Mawin zyii faa: Tǝgbana Dǝɓlii Masǝŋ ɓo mo no sǝŋ, me ka ne wol yaŋ ya, sai sum no pǝ cii sum ɓe biŋ nai sye, a ne pǝlam jolle, nǝm no pǝ gbel nǝm biŋ ta, so me tǝ sǝǝ zahwii gwa nai ka me pii soo ge yaŋ me joŋ farel ne mor suu ɓe ne we ɓe, ka ru re, so ru ga wukki.

13Amma Elias faa nyi ko: Mo ɗuu gal ka, mo ge joŋ tǝgbana mo faa, amma mo joŋ farel ah gee me ne biŋ kǝpel ɗao, ko mo so ga joŋ mor suu ɓo ne na ɓo ba. 14Mor Dǝɓlii Masǝŋ Israel faa: Sum pǝ cii sum ɓo ka vǝr a, nǝm pǝ gbel nǝm ɓo ka pee ya, ŋhaa zah'nan mai Dǝɓlii moo ga tǝ bam ge tǝ sǝrri.

15Mawin kal ge joŋ tǝgbana ɓǝ faa Elias. Elias ne mawin tǝkine nan ah rera farel zah'nan pǝpãare. 16Sum pǝ cii sum ah vǝr a, nǝm pǝ gbel nǝm ah laŋ pee ya, tǝgbana ɓǝ mai Dǝɓlii mo faa nyi Elias.

17Fahfal fan mai mo joŋ, syem ɓaŋ we mah yaŋ nyẽeko, syem ah a pǝgaɓ no cam, ŋhaa wuu. 18Mawin faa nyi Elias: A fẽe ye tai na ɓo tǝki ne, dǝɓ Masǝŋ? Amo ge ɓo wo ɓe ne joo faɓe' gin lal ne in we ɓe pǝ wul ne? 19Elias faa nyi ko: Mo nyi we ɓo gee me. Ɓaŋ wel ah gin zahbii ah nyi nyi ko, so Elias yee kal ge tǝ yaŋ ma sǝŋ ne ko, ge sor wee ge tǝ faswul ahe. 20So Elias pǝǝ Dǝɓlii faa: Dǝɓlii Masǝŋ ɓe, mor fẽe mo joŋ ɓǝɓe' wo mawin wul mai me kaa ɓo yaŋ ah ne in wel ah pǝ wul ne? 21So swǝ ge tǝ wel ah zahlǝŋ sai, pǝǝ Dǝɓlii faa: Dǝɓlii Masǝŋ ɓe, mo soɓ tǝ'yak wee pii soo ge wol ahe.#2 ZaG 4:34-35 22Dǝɓlii laa ɓǝ faa Elias, tǝ'yak we pii soo ge wol ahe, syemme. 23Elias ɓaŋ gin tǝ yaŋ sǝŋ ɗǝr ge sǝŋ ne ge nyi mah ah faa: Na ɓo nyẽeno, syem ɓe. 24Mawin zyii faa nyi Elias: Zǝzǝ̃ǝ me tǝ ɓe, amo ye dǝɓ Masǝŋ, ɓǝ faa Masǝŋ ma pǝ zah ɓo laŋ goŋga yo.

Currently Selected:

1 ZA GOŊE 17: MUAR

Highlight

Compare

Copy