1 ZA GOŊE 14

Ɓǝ profeto Ahija mo faa ɓo tǝ Jeroboam

1Ne cok ah syem gbǝ Abia we Jeroboam. 2Jeroboam faa nyi mawin ahe: Mo urri, mo fer suu ɓo mor ka za mo tǝra mo, mo ye mawin Jeroboam ka, mo ge Silo, yaŋ mai profeto Ahija mo gŋ. Mor ako ye faa nyi me, me ga kaa goŋ tǝ za Israel. 3Mo woo paŋgasso mor jol jemma, ne sum magǝgǝr makǝǝ ah ma'nyahre, tǝkine tǝnjwǝǝ cii vaŋno, mo ge wol ah ne ko, a ga cuu fan mai mo ga joŋ we man nyẽe nyi mo.

4Mawin Jeroboam joŋ noo ta, so ur kal ge Silo, ge dan ge yaŋ Ahija. Ahija ka gak kwan cok yao, nahnǝn ah rǝ̃ǝ ɓe, mor tam ɓo pǝlli. 5Amma Dǝɓlii faa nyi Ahija: Mawin Jeroboam no tǝ gin wo ɓo, a ga fer suu ah wo ɓo cam ka fii ɓǝ wel ah mai mo ne syem zah ɓo. Ka mo faa nyi nai sye nai sye.

6Ne cok Ahija mo laa cii ɓal ah mo ge dai zahfahe, Ahija faa nyi ko: Mo dan ge yaŋ o mawin Jeroboam, mo so muŋ suu ɓo muŋ mor fẽene? Peera me ɓo wo ɓo ne ɓǝ magaɓ ahe. 7Mo gyo, mo faa nyi Jeroboam: Dǝɓlii Masǝŋ Israel faa sye: Mo ẽe me nǝǝ mo gin kǝsyil zana, me kan goŋ ne mo tǝ za ɓe Israel. 8Me ɓaŋ goŋ gin yaŋ David, me nyi nyi mo. Amma amo ka tǝgbana dǝɓ yeɓ ɓe David mai mo gbǝ ɓǝ faa ɓe, mo syee mor ɓe ne zahzyil ah daŋ, mo joŋ fan ma 'nyah suu ɓe to ya. 9Amma amo so kal za ma kǝpel ɓo daŋ ne ɓe' ɓe, mo kal ge zyeɓ masǝŋ ki ra ne foto tǝgaa ma ɓǝɓaŋ mor ka ɓeɓ zahzyil nyi me ne ko, mo soɓ me ɓoo. 10Mor ahe, me ga pee ɓeɓ ge tǝ za Jeroboam maluu ne manyee ah daŋ. Me ga vǝr za Jeroboam fetfet tǝgbana dǝɓ moo gbǝǝ cok ne tahlle.#1 ZaG 15:29 11Dǝɓ yaŋ Jeroboam mai moo ga wǝ tǝgǝǝ yaŋ, goo ga re ko, mai moo ga wǝ cokki, juu sǝŋ ga re ko, mor Dǝɓlii ye faa ɓo.

12So faa: Mo ur mo ge yaŋ ɓo, ne cok ɓal ɓo moo ga maa ga tǝgǝǝ yaŋ, we ɓo ga wuu. 13Za Israel daŋ a ga yera yee wul wel ahe, wel ah ako ye ga yea ne pal yaŋ Jeroboam syak ah to, mor Dǝɓlii Masǝŋ Israel lwaa ɓǝ sãh ɓo no wol ah biŋ. 14Dǝɓlii ga kan goŋ ki tǝ za Israel, ako ye ga vǝr za yaŋ Jeroboam, tǝŋ tǝ'nah sǝ ɓe#14:14 Ɓǝ ah ka pǝ zah Yahuduen wat ya.. 15Dǝɓlii ga loɓ za Israel, a ga joŋ ra laŋ pel ah tǝgbana var moo laŋ pee. A ga nĩi za Israel gin pǝ sǝr masãh mai mo nyi nyi pa ɓǝǝ lii ra, a ga myah ra ga nǝn el Efrat nǝzakǝŋhaa, mor zyeɓra Astarte ka ɓeɓ zahzyil nyi Dǝɓlii ne ko. 16A ga soɓ za Israel myah mor faɓe' mai Jeroboam mo joŋ, ne mai mo kǝǝ za Israel joŋ ta.

17Mawin Jeroboam ur kalle, ge dai Tersa#14:17 Tersa: Yaŋ mai za goŋ Israel mo yea tǝ kaara gŋ ka yaŋ Samaria ɓah vuu ya ba yo.. Ne cok mo tǝ kan ɓal ga zahtǝgǝǝɓelle, we lee wul ta. 18Za Israel daŋ ciira ko, so yera yee wul ah tǝgbana mai Dǝɓlii mo faa ne zah profeto Ahija.

19Tǝcoŋ ɓǝ Jeroboam, ruu sal ah mo ruu, ne kaa goŋ ahe, ɓǝ ah ŋwǝǝ ɓo pǝ ɗerewol Ɓǝ Za Goŋ Israel. 20Zah'nan Jeroboam mo kaa goŋ daŋ a syii jemma gwa tǝtǝl gwa. So wuu. Wel ah Nadaɓ kaa goŋ pǝ cok ahe.

Rehoboam kaa goŋe

(2 KeeƁ 11:5–12:15)

21Rehoboam we Salomo kaa goŋ sǝr Yuda. Ne cok Rehoboam mo kaa goŋ, ka joŋ syii ɓo jemma nai tǝtǝl vaŋno. Kaa goŋ yaŋ Jerusalem syii jemma tǝtǝl rǝŋ, pǝ yaŋ mai Dǝɓlii mo nǝǝ ɓo kǝsyil ban za Israel daŋ mor ka cuu suu ah gŋ. A ɗii mah Rehoboam ne Naama, ako ye Ammoniyo. 22Za Yuda joŋra faɓe' wo Dǝɓlii, kǝǝra zahzyil ah ɓaŋ kpãh ne mai mo so joŋra faɓe' kal tǝ mǝ pa ɓǝǝ lii mo joŋra. 23Vuura cok joŋ syiŋ ma tǝgee sǝŋ camcam, cok mai kpuu mapǝ̃ǝ mo gŋ daŋ.#2 ZaG 17:9-10 24Za ma yeara ne joŋ ɓǝǝ no kǝsyil ɓǝǝ ta. Za Yuda a joŋra zahban faɓe' za mai Dǝɓlii mo nĩi ra pel za Israel ta.#CuuƁ 23:17

25Ne cok Rehoboam mo kaa goŋ syii dappe, Sisak goŋ sǝr Egiɓ ge ka ruu sal ne yaŋ Jerusalem. 26Woo fan mai mo ɓǝr yaŋ Masǝŋ tǝkine ma yaŋ goŋ daŋ belbelle. Woo bal mai Salomo mo zyeɓ ne vãm kaŋnyeeri ta.#1 ZaG 10:16-17; 2 KeeƁ 9:15-16 27Goŋ Rehoboam so zyeɓ bal ne vãm syẽ rǝk ge pǝ cok ahe, so soɓ ge jol zaluu sooje za ma byakra yaŋ goŋe. 28Koo nekẽne daŋ goŋ mo tǝ ga yaŋ Masǝŋ ɓe, za ma byak cok a woora bal uu ne ko, so a jin ra ga rǝk yaŋ za ma byak cokki.

29Tǝcoŋ ɓǝ Rehoboam ne yeɓ ah daŋ ŋwǝǝ ɓo pǝ ɗerewol Ɓǝ Za Goŋ Yuda. 30Sal no kǝsyil Rehoboam ne Jeroboam zah'nan daŋ. 31So Rehoboam wuu, ciira ko kah pah ah ra pǝ yaŋ David. Amma a ɗii mah ah ne Naama, ako ye Ammoniyo. Wel ah Abiija kaa goŋ pǝ cok ahe.

Currently Selected:

1 ZA GOŊE 14: MUAR

Highlight

Compare

Copy