Lumbo gwe Njimbo 5
5
1Ndaswika ku nnda wangu, hazwadzi yangu, nlongo wangu,
ndotjela mira ne zwipayisi,
ndoja mape ne butji gwe nyutji,
ndong'wa nkumbi wangu we zhambi ne nkaka.
Ijani, imwi bakwinya bangu, mung'we,
ing'wani kwakanginilila, imwi badani!
Lumbo gwe bunna
2Ndakayizela, koga moyo wangu wakabe wakalinga.
Teedza, wandinoda unokokodza eti,
“Undizhulile, hazwadzi yangu, tjido tjangu,
njiba yangu, wakapelela,
nsholo wangu unadoba le khawa,
mavudzi angu azhele madokhwe e busiku.”
3Ndakabe ndakaambula tjiambalo tjangu,
ndakabe ndinga tjiambala tjini?
Ndakabe ndangula makumbo angu,
ndakabe ndowobe ndialongelani shambgwa?
4Nthu wangu wakabiga luboko gugwe pa buli le dendele,
moyo wangu ukashatha kwazo.
5Ndakamilika kuno zhulila tjibhayamoyo tjangu,
maboko angu akadubikiwa mu mira,
zwinyala zwangu zwidotha mira,
udothela mu tjizhuli tje dendele.
6Ndakan'zhulila tjido tje moyo wangu,
ngono awana ashanduka abgwilila.
Ndikatemeka mafupa ngoyenda kukwe,
ndakanshaka, ansheta,
an'dana, akasindidabile.
7Balindi bakandiwana,
bali mu kuyenda yenda kwabo mu nzi nkulu,
bakandiloba, bakandikubadza,
bakanditolela jasi langu,
ibabaje balindi be makuma!
8Ndomukumbila, imwi bakololokadzi be Jerusalema
amungabona nthu wangu, mumbudze kuti ndogwala gwe ludo.
9Tjido tjitjo tjopinda bamwe badiwa ngeni,
iwe mbuya kupinda bamwe bakadzi?
Tjido tjitjo tjopinda bamwe badiwa ngeni,
kwa ungatiambila zwingapa?
10Tjido tje moyo wangu tjokwidzima tjili tjishaba,
tjopinda balume bali gumi le zwiwulu (10 000).
11Nsholo uwe i golide mbuyanana nge kwayo,
mavudzi awe akazwipomba matema se gungubo.
12Mesho awe anonga e njiba dzili pa misenya ye vula,
akangudziwa ne nkaka kwakalizanila, agele zubuyanana.
13Matama awe anonga minda dze zwipayisi zwinonuhwilila.
Milomo iye inonga maluba inodotha mira inowunga.
14Maboko awe anonga zwikombo zwe golide,
zwakanakisiwa nge dayimani.
Mbili unonga nyanga dze zhowu dzakakuyungiwa,
wakanakisiwa nge mabgwe e safire.
15Makumbo awe anonga phanda dze alabhasita,
dzakagadzikiwa pezhugwi kwe golide.
Ndingiko iye ungati Lebanoni,
mbuya se misida.
16Ndebeleko iye inozipa kwazo,
unoyemulika kwazo kwazo.
Iwoyu tjido tjangu, nzwalani wangu,
imwi bakololokadzi be Jerusalema.
Kalanga Bible © Bible Society of Botswana, 2008, 2018.