Ruti 3
3
Ruti unowana nlume
1Limwe zhuba Naomi, mmezwale babe, bakandwa bakati, “Mwanangu, apa andingakushakile nsha kene kuti ugadzikane? 2Bhoazi iwoyu wawabe ushinga ne baanadi babe n'galithaka upejo naswi. Unowobe ewulusa bhali busiku igogu mu libuwa. 3Angula, uzhole, umbale zwiambalo zwizo zwakanaka tjose uyende ku libuwa, koga usitongo thama kuti akuzibe kuswikila apedza kuja ne kung'wa. 4Ati enolala uyele njele kuti walala ngayi, uyendeko, ube ufukula makumbo awe ulale paali, ngono unowokubudza kuti ushingeni.”
5Ruti kashandula eti, “Kose kwamunondibudza ndowokuthama.”
6Ndizo kayenda ku libuwa, ngono kashinga sekwa alayiwa ndi mmezwale babe. 7Bhoazi kati apedza kuja ne kung'wa, moyo uwe ukashatha, ndizo kanolala pa ndzibo we mmbumba we bhali. Ruti kanyanga kafukula makumbo awe kalala. 8Pakati kwe busiku nlume iwoyu kalobgwa nge hana, ngono kashanduka, kabona nkadzi ali lele pa makumbo awe. 9Kabhuzwa kati, “Ndiwe ani?” Ngono iye kadabila eti, “Ndimi Ruti nlandakadzi wenyu, fukidzani nlandakadzi wenyu, ngoti mu n'galithaka upejo.”#3:9 Ndimi Ruti…n'galithaka upejo: Kodwa kuti Ruti unoshaka kuti Bhoazi an'gale thaka se ali gamu le nlume uwe wakatjinyika.
10Bhoazi kabe eti, “Yahwe ngabakukombolele mwanangu, ngoti buthu gugo ku bupelo gopinda gwe kutanga, auzotobela bazhuzha be bafumi kene be bashayi. 11Mwanangu, ngwenu usitjatje, ndowokuthamila kose ikoku kwaunokumbila. Bakanyi kwedu bose banoziba kuti u nkadzi wakalulwama. 12#Ruti 2:20Koga nenguba kuli malebeswa kuti ndi n'galithaka, kuna mmwe n'galithaka upejo kundipinda. 13Lala ipapa busiku guno, mangwana ha eduma kukugalathaka, kowobe kwakalulwama. Ha asingashake, ndotuna na Yahwe tjose, imi ndowokugalathaka. Lala kuswikila mangwana.” 14Ndizo kalala ku makumbo awe kuswikila tjimuka, koga wakamuka kutji busikwana kuti asibong'we, ngoti Bhoazi wakabe ati, “Kusitongo zibgwa kuti nkadzi wakatongo zha ku libuwa.” 15Ipapo kandwa kati, “Zhisa ngubgwana yawakafuka uiwale.” Kaiwala, ngono Bhoazi kayela seme dzili tathatu dze bhali kabe enkhiga iyo ebe eyenda ku nzi. 16Kaswika kuna mmezwale babe. Bakambhuzwa beti, “Wayenda tjini, mwanangu?” Ruti kababudza kose kwaathamigwa ndi Bhoazi. 17Kabe eti, “Wandipa zwiyelo izwezwi zwe bhali zwili tathatu eti, ‘Usibgwilile kuna mmezwale babo usina tjawakabhata.’ ” 18Naomi kashandula eti, “Tjigalazo mwanangu kuswikila ubona tjinowoshingikala, ngoti aangagale kuswikila epedza ndebo iyeyi nasi.”
Kalanga Bible © Bible Society of Botswana, 2008, 2018.