Ruti 1
1
Elimeleki ne nsha uwe ku Moabu
1Kwakati mu misi yakabe ibusa Basumikilisi kukabe ne bhamba mu shango. Ngono mmwe nlume we Bhetelehema mu ntuthu we Juda kayenda kunolubila mu shango ye Moabu ana nkadzi uwe ne bakololo babe babili. 2Zina le nlume iwoyo lakabe liyi Elimeleki le nkadzi uwe kuyi Naomi, mazina e bakololo babe kuyi Mahiloni na Kilioni, bali Baefurata be Bhetelehema mu Juda. Bakayenda ku shango ye Moabu bakanogalako. 3Elimeleki nlume wa Naomi kafa, ngono Naomi kasala ne bakololo babe babili. 4Bakololo ibabo bakalobola bakadzi be Moabu, zina le mmwe kuyi Opha, le mmwe kuyi Ruti, ngono bakagala ikoko makole ali gumi. 5Mahiloni na Kilioni bakafabo, ndizo Naomi kasala asitjina bana ne nlume.
Naomi na Ruti banobgwilila ku Bhetelehema
6Ipapo kamilika ne balongo babe kubgwilila kanyi kwabo, ngobe ahwa ali mu Moabu kuti Yahwe bakakumbula bathu babo bakabapa zojiwa. 7Kadwa ne balongo babe babili kwaakabe egala, bakatola zila kubgwilila ku shango ye Juda. 8Ngono Naomi kadwa balongo babe babili kati, “Yendani mmwe ne mmwe wenyu abgwilile ku nzi wa mmeyabe. Yahwe bamubhate zubuyanana sekwa makabhata bafi nami. 9Yahwe bamupe kugadzikana, mmwe ne mmwe wenyu mu nzi we nlume unowonlobola.” Ipapo kabaputa, ngono bakamilidza mahwi abo bakalila. 10Bakandwa bakati, “Aa, iswi tobgwilila namwi ku bathu bakanyi kwenyu.”
11Ngono Naomi kabe eti, “Bgwililani bana bangu. Mowobe muyendilani nami? Apa kutjina bamwe bakololo mu ntumbu wangu bangamulobola kene? 12Bgwililani bana bangu. Yendani zwenyu, ngoti ndakwegula andingatjabe ne nlume. Na iko ha ndingati ndina kugalabgwe kuti ndingawana nlume mu busiku igogu abe ne bakololo, 13mungabalindila kuswikila bekula kene? Mungagala musina balume? Aa, bana bangu, ndakabhaika kwazo kupinda sekwa muli iko, ngoti tjiazha tja Yahwe tjobhayana nami.”
14Ipapo bakamilidza mahwi abo kakale, bakalila kwazo. Opha kaputa mmezwale babe kabawoneka, koga Ruti kabanamatila. 15Naomi kabe eti, “Bona nlongwana uwo wabgwilila kuna bakanyi kwabo ne ku midzimu iye, bgwilila naye.”
16Koga Ruti kashandula eti,
“Musinditshindilidze kuthubukana namwi
ne kuti ndisimutobele,
ngoti kwamunoyenda ndowoyendaboko
ne kwamunolala ndowolalaboko,
bakanyi kwenyu banowobe bakanyi kwangubo
ne Ndzimu wenyu unowobe Ndzimu wangubo.
17Pamunofila ndowofilabopo
abuya abiganyiwapo.
“Yahwe bandilobe bapaphulule, ha tjimwe tjingandithubukanya namwi kuzhe kwe lufu.”
18Naomi kati ebona kuti Ruti wakazwimisila kuyenda naye, kanletja. 19Ndizo bubili gwabo bakayenda kudzina benoswika ku Bhetelehema.
Bakati beswika mu Bhetelehema nzi wose ukadzongeka ngekwabo, ngono bakadzi bakati, “Ndi Naomi iwoyu kene?”
20Naomi iye kabe eti ku bali, “Musindidane muti ‘Naomi,’ mundidane muti ‘Mara,’#1:20 Naomi…Mara: Mu Ikalanga mazina ana tjaanodwa. Tjihebheru na itjobo tjakajalo. Zina ileli Naomi lodwa zipa, Mara lodwa baba. ngoti Masimbawose bakathama kuti butjilo gwangu gubipe kwazo. 21Imi ndakayenda ndakatuta, koga Yahwe bandibuza ndakalembedza maboko. Mondidanilani muti ‘Naomi?’ Yahwe bakandifupatila, Masimbawose bakandidziyidza.”
22Ndizo Naomi kabuya edwa ku Moabu ana Ruti we N'moabu nlongo uwe, bakaswika mu Bhetelehema mu tjibaka tje kuvung'wa mathunde anoyi bhali.
Currently Selected:
Ruti 1: KBTP
Highlight
Copy
Compare
Share
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.