Zumbunulo 8
8
Tjizhalilo tje butendeka
1Pkhwizana yakati izhula tjizhalilo tje butendeka, kukabe ne kunyalala kudzimu, tjibaka tjingaswika gaswa le awara. 2Shule kwa ipapo abona batumwa be kudzimu bali kutendeka, ibo banoma mbeli kwe Ndzimu, ngono bakapiwa nyanga dzinolidziwa dzili kutendeka.
3 #
Amosi 9:1;
Kufuluka 30:1, 3 Mmwe ntumwa we kudzimu kazha kama pa tjibeso tje zwibhayilo akabhata tjija tje golide tjinopisigwa motsha. Ngono kapiwa motsha uli nnjinji kwazo kupa Ndzimu pang'ompela ne mitembezelo ye bayengemali bose mu tjibeso tje golide mbeli kwe tjigalo tje bushe. 4Busi gwe motsha gukamilika guyenda pezhugwi ne mitembezelo ye bayengemali kudwa mu luboko gwe ntumwa we kudzimu wakabe ali mile mbeli kwe Ndzimu. 5#Zwipo 16:12; Ezekiele 10:2; Kufuluka 19:16; Zumbunulo 11:19; 16:18Shule kwa ipapo ntumwa katola tjija tjinopisigwa motsha katjizhadza moto unodwa mu tjibeso tje zwibhayilo ebe etjiposela mu shango, kukabe ne kudadamula ne mahwi ne kupenya kwe vula ne kutengenyeka kwe shango.
Nyanga dzinolidziwa dzili kutendeka
6Kudwa ipapo batumwa be kudzimu bali kutendeka bakabe bana nyanga dzinolidziwa dzili kutendeka bakazwilulwamisila kudzilidza.
7 #
Kufuluka 9:23-25; Ezekiele 38:22 Ntumwa we kutanga kalidza lunyanga gugwe, tjivulamabgwe ne moto zwakashanganyiwa ne malopa zwikawila mu shango, ngono ikwamu tje butatu tje shango tjikatshwa, ngabo ye butatu ye miti ikatshwa ne bushwa butshwa gose gu bgwelele gukatshwa.
8Ntumwa we kudzimu we bubili kati elidza lunyanga gugwe, tjimwe tjinonga dombo gulu gulu linothuta moto tjikaposegwa mu gungwa, 9ngono lubabi gwe butatu gwe gungwa gukashanduka gukabe malopa, ngabo ye butatu ye zwibumbiwa zwinotjila mu gungwa zwikafa ne ngabo ye butatu ye zwikepe ikakolomodzwa.
10 #
Isaya 14:12
Ntumwa we kudzimu we butatu kalidza lunyanga gugwe, nyenyedzi hwulu yakabe ithuta se luvone ikawa idwa pezhugwi, ikawila mu ngabo thatu dze njizi ne dze misenya ye vula. 11#Jeremiya 9:15Nyenyedzi iyeyo zina layo inoyi “Kubabakwendulu.” Lubabi gwe butatu gwe vula gukashanduka kukababa se ndulo, ngono bathu banjinji bakabulawa ngong'wa vula iyeyo, ngobe yashanduka ikababa.
12 #
Isaya 13:10; Ezekiele 32:7; Jowele 2:10, 31; 3:15 Ntumwa we kudzimu we bunna kalidza gugwe lunyanga, lubabi gwe butatu gwe zhuba gukakatshiwa, ne gwe mwedzi ne gwe nyenyedzi gukakatshiwabo, ndizo butatu gwe mbabi dze tjedza tjazo tjikabe zhalima, lubabi gwe butatu gwe masikati gukasibe ne tjedza, ne lubabi gwe butatu gwe busiku.
13Shule kwa ipapo alinga, ngono ahwa dzu lilila nge hwi gulu, lakawuluka pezhugwi, liti, “Ye mme wee! Yee mme wee! Yee mme wee! Kwapalala ibabo bagele mu shango ha nlidzo uzha udwa mu nyanga dzilidziwa tjinyolotjo nge batumwa be kudzimu batatu basala.”
Kalanga Bible © Bible Society of Botswana, 2008, 2018.