Njimbo 22
22
Tjililo ne kukumbila bhatsho
1 #
Matewu 27:46; Mako 15:34 Ndzimu wangu, Ndzimu wangu, mandilashilani?
Ini muli kule zwingapa nge kundibhatsha
mu kuhwazogwadza kwangu kene?
2Ndzimu wangu, ndolila masikati,
koga amutondidabila.
Ndolila nenge busiku,
anditonyaluluka.
3Koga makayengemala,
tjigalo tjenyu tje bushe i gudzo le Iziraela.
4Bobatategulu bedu bakagalabgwe mu muli,
bakagalabgwe mukabaangula.
5Bakalilila kumuli ngono bakatjidziwa,
bakagalabgwe mu muli,
ngono bakasibhakhwe nge shoni.
6Koga imi ndi gonye andite ndili nthu,
ndolengudziwa nge bathu,
ndosekiwa nge mmwe ne mmwe.
7 #
Matewu 27:39; Mako 15:29; Luke 23:35 Bose banondibona banondidadila,
banondihwong'ola, bedzungudza misholo,
8 #
Matewu 27:43
beti, “Wakabiga muna Yahwe,
Yahwe ngaban'gwile, ngaban'angulile,
ngoti unoshathisiwa ndibo!”
9Koga ndimwi makandidusa mu ntumbu.
Makanditjengeta nditji
mu zhamu la mme yangu.
10Ndakamupiwa kudwa
mu kuzwagwa kwangu.
Makabe Ndzimu wangu
kudwa pa kuzwagwa kwangu.
11Musibe kule nami,
ngoti mbatsha dzipejo,
ngono akuna ungabhatsha.
12Mikono minjinji yakandikomba,
mikono yakasima ye
Bhashani yakandikombeledza.
13Inondiashamila yakazhula
milomo yayo se shumbalume
inobomba ikazandabula.
14Ndotebugwa se vula,
mafupa angu wose akalungunuka;
moyo wangu unonga phola,
unonyawuka mukati kwe ifuba tjangu.
15Simba langu lapela,
lulimi gwangu gonamatila mu bgwasha.
Makandiladzika mu hwuluba ye lufu.
16Mbgwa dzakandikomba,
goko le babi lakandikombeledza,
bakabhaya maboko angu ne makumbo angu.
17Ndingabala mafupa angu wose.
Bathu banondilingisisa bendinyenya.
18 #
Matewu 27:35; Mako 15:24; Luke 23:34; Johani 19:24 Banokobana zwiambalo zwangu tjekwabo
bekandila kubona kuti upi unotola tjipi.
19Koga imwi Yahwe, musibe kule!
Imwi bhatsho yangu,
libilidzani kundiangulila!
20Mundivikile thumo;
gwilani butjilo gwangu mu simba le mbgwa.
21Mundiangulile mu shumba.
Munditjidze mu nyanga dze nyati.
22 #
Bahebheru 2:12
Ndowozibisa bakanyi kwangu zina lenyu,
ndowomukudza pakati kwe gubungano.
23Imwi banotja Yahwe!
Mubakudze mose imwi bana ba Jakubo!
Mubalumbidze mose imwi bana ba Iziraela!
24Abazolingila pasi kene bakashinyata
kudziyila kwe bakahwisiwa zogwadza,
abazobasumbikila buso gwabo,
koga bakahwa kukumbila bhatsho kwabo.
25Kumukudza kwangu mu
gubungano gulu kodwa mu muli.
Ndowoshingikadza kutuna kwangu
mu mesho aibabo banomutja.
26Bashayi banowoja bakaguta,
ibabo banoshaka Yahwe banowobakudza.
Dzene bangatjila nge kusingapele!
27Midzibo yose ye shango
inowokumbula ikashandukila kuna Yahwe,
ne njudzi dzose dzowobanamata.
28Ngoti bushe ngegwa Yahwe,
ngono banobusa zwitjaba.
29Bose bafumi be shango
banowothigama benamata.
Bose be nyama ne lopa
banowothigama mbeli kwabo.
30Zwizekugwana zwinozha zowobashingila,
Bathu banowoleba ngekwa She,
bebudza zwizekugwana zwinowozha.
31Banowoleba ngekwe ndulamo ya She,
ku zwizekungwana zwinowozwagwa
ngobe She bakaithama.
Kalanga Bible © Bible Society of Botswana, 2008, 2018.