Njimbo 115
115
Ndzimu nng'ompela we malebeswa
1Kusi ku tili, imwi Yahwe, kusi ku tili,
koga ku zina lenyu ngakube ne gudzo,
ngentha ye ludo gwenyu gusingazunguzike ne kugalikabgwe kwenyu.
2Ini zwitjaba zwingati,
“Ndzimu wabo ungayi?”
3Ndzimu wedu u kudzimu,
unothama tjaunoda.
4 #
Njimbo 135:15-18; Zumbunulo 9:20 Midzimu yabo i siliva ne golide,
zwakathamwa nge maboko e bathu.
5Ina milomo koga ayitolebeleka,
ina mesho koga ayitobona.
6Ina zebe koga ayitohwa,
zwimilo zwayo azwitonuhwigwa.
7Ina maboko ngono ayitohwa tjayabhata,
ina makumbo ngono ayitoyenda,
ayina hwi lainothama nge hwulo dzayo.
8Ibabo banoithama banonga iyo,
na bose banogalabgwe muili.
9Iwe Iziraela, galabgwe muna Yahwe!
Ndibo bhatsho ne tjivikili tjabo.
10Iwe ng'umba ya Aroni, galabgwe muna Yahwe,
ndibo bhatsho ne tjivikili tjabo.
11Imwi banotja Yahwe, galanibgwe muna Yahwe!
Ndibo bhatsho ne tjivikili tjabo.
12Yahwe bagala bakatikumbula, banowotikombolela,
banowokombolela ng'umba ya Iziraela,
banowokombolela ng'umba ya Aroni.
13 #
Zumbunulo 11:18; 19:5 Banowokombolela ibabo banotja Yahwe,
batukununu ne bakulukulu bose ngofanana.
14Dzene Yahwe bangamuwatsha,
mose imwi ne bana benyu.
15Dzene mungakombolegwa ndi Yahwe,
ibo bakathama kudzimu ne shango.
16Kudzimu ndekwa Yahwe,
koga shango bakaipa bathu.
17Bafi abatokudza Yahwe,
kene ibo banodelukila ku lunyalalo.
18Koga ndiswi tinowokudza Yahwe
kudwa ngwenu kunoti kusingapele.
Kudzani Yahwe.
Kalanga Bible © Bible Society of Botswana, 2008, 2018.