Makungulupeswa 18
18
1Iye unozwidusa mu bamwe unoshaka madzetelo,
kuti ashinge tjaanoda.
2Tjilengwe atjina hanya nge kuhwisisa,
koga tjoshaka kuleba mazwiwo atjo.
3Ha bubi guzha, kulingigwa pasi naikobo kozha,
kusalumbidziwa kozha kang'ompela ne kulengudziwa,
4Matama e nlomo we nthu i dziba lakangina,
nsenya we butjenjedu lukobana gunowunga.
5Akuzo naka kumila nthu mbiimbi,
kene kulambila nlulwami tjakatambunuka.
6Nlomo we tjilengwe unozhisa kukwebakwebana,
ne kulebanya kukwe kodana kulobgwa.
7Lebanya kwe tjilengwe kotjipaladza,
ne nlomo watjo i dati ku tjili.
8Matama e nnyeyi anonga zojiwa zwinozipa;
anongina tjose tjamukati kwe nthu.
9Iye unabusimbe mu nshingo uwe,
nnung'una we unokolomodza.
10Zina la Yahwe i thungamakole yakasima,
nlulwami unotizhila kuili ngono wakabakililika.
11Fumwa ye nfumi nzi uwe nkulu wakasima,
se guma gulu linombakilila.
12Moyo we nthu unozwikudza ha asathu kawa,
koga kuzwiyisa pasi kozha mbeli kwe gudzo.
13Ha nthu edabila asathu ahwa tjinolebgwa,
bulengwe gugwe ne mabhatisashoni.
14Meya ye nthu inodzikitadzila kugwala kukwe,
koga meya yakapuna ingatubugwa ndiyani?
15Nkumbulo wakatjenjela unowana luzibo,
ne zebe ye ntjenjedu inoshaka luzibo.
16Tjipo tje nthu tjonzhulila bugalo,
tjikansa pa bakulukulu.
17Unotanga kuwala ndebeleko iye unonga wakalulwama,
kuswikila mmwe ezha embuzwisisa.
18Hakata dzopedza zhoba,
dzikapedza ndebeleko pakati kwe mikwita inobe igwisana.
19Mwana wa tate wagwadza moyo unonga nzi nkulu wakasima,
koga kukakabadzana kwabo kobathubukanya zwakasima.
20Nthu unogutshiwa nge ntjelo we nlomo uwe,
waanodzwala nge nlomo uwe.
21Lufu ne butjilo zwimu simba le lulimi,
ndizo wali banoguda banowowana mbhailo wago.
22Iye wawana nkadzi wawana tjithu tjakanaka,
kakale unowana ludo gwa Yahwe.
23Nshayi unokumbila eteta eamba,
koga mfumi unon'dabila nge bushongola.
24Nthu una bazwalani banjinji unopambuka mu zila,
koga kuna nzwalani upejo kunopinda kwe mwana wa tate be nthu.
Kalanga Bible © Bible Society of Botswana, 2008, 2018.