Mbalo 36
36
Thaka ye bakololokadzi baku misha
1Misholo ye misha ye ludzi gwa Giliyadi nkololo wa Makiri, Makiri ali nkololo wa Manase ibo bakabe bali be ludzi gwe zwizekugwana zwa Josefa bakazha kuna Mushe ne batungamili ne hadzasha dze bathu be Iziraela. 2#Mbalo 27:7Bakabadwa bakati, “Yahwe bakadwa tetshi wedu kuti bakobele bathu be Iziraela shango kube thaka ngokandila. Bakati kakale mukobele thaka bakololokadzi be gamu lenyu Zelofehadi. 3Ngono ha balobogwa mu ludzi gwe Iziraela gupoga, thaka yedu inowobe yatapudzika, inowopaphidzila ludzi igogo shango kube thaka, ngono towobe talashikigwa nge shango hwulu kube thaka yedu. 4Ngono kowoti nge gole le makumi ali mashanu bathu be Iziraela le bgwilizilo shango lizha, thaka ye bakololokadzi ba Zelofehadi inowolingisana ne ludzi gwabakalobogwako, ngono ludzi gwedu gowobe gwalashikigwa nge thaka yago.”
5Ipapo Mushe kalaula bathu be Iziraela kuyenda nge dama la Yahwe eti, “Ludzi gwe zwizekugwana gwa Josefa golebesa. 6Yahwe bakadusa ndaulo ngekwe bakololokadzi ba Zelofehadi kuti, balobogwe nge wabanowobe bada, koga kuli mukati kwe nsha we ludzi gwa tate babo. 7Thaka ye bathu be Iziraela aitowodwa mu ludzi gwe Iziraela ipiwa ludzi gupoga, ngoti gwe mwana mmwe ne mmwe we Iziraela gwakalingisana nge ludzi gwa tate babe. 8Nkololokadzi mmwe ne mmwe wakapiwa shango ili thaka idwa mu ludzi gwe Iziraela wakafanila lobogwa ne mmwe we ludzi gwa tate babe. Kuti ndizo mmwe ne mmwe mwana we Iziraela awane shango ye thaka ya tate babe. 9Akuna shango ye thaka inowodwa mu gumwe ludzi ipiwa gumwe ludzi, ngoti ludzi gumwe ne gumwe gwe bathu be Iziraela gowolingisana nge thaka yago.”
10Ndizo bakololokadzi ba Zelofehadi bakathama Yahwe sekwa bakadwa Mushe. 11Ngoti Mahila na Tireza na Hogila na Milikha na Nuwa, bakololokadzi ba Zelofehadi bakalobogwa nge bana ba batateninini babo. 12Bakalobogwa mu nsha we bakololo ba Manase nkololo wa Josefa. Ngono thaka yabo ikagalila tjose mu ludzi gwe nsha wa tate babo.
13Eyi ndiyo milayo ne ndaulo dzakapiwa bathu be Iziraela, Yahwe pa belebeleka na Mushe mu lubala gwe Moabu seli kwe gwizi gwe Jorodani kulingisana ne Jerikho.
Currently Selected:
Mbalo 36: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
