Mbalo 28
28
Zwipo zwe misi ne misi
(Kufuluka 29:38-46)
1Yahwe bakadwa Mushe bakati, 2“Idwa bathu be Iziraela uti, ‘Tjipo tjangu, zojiwa zwe zwipo zwangu zwinothamwa nge moto kube nnuhwo unondinuhwila zwinozipa, mulondolodze kuzwizhisa kundili mu misi yazo.’ 3Ngono ubadwe kuti, ezwi ndizo zwipo zwinowothamiwa nge moto zwamakafanila zhisa kuna Yahwe: Mazhuba wose makafanila zhisa tjipo tjinopisiwa nge moto tje zhuba ne zhuba ili pkhwizana ndume dzili mbili dzina gole ling'ompela dzisina bulema. 4Pkhwizana imwe ibhayiwe mangwanana, imwe ibhayiwe madekwana. 5Imwe ne imwe izhisiwe ne tjipo tje mathunde tjili tjilizanyo tje seme ing'ompela ye bgwisa gwakanathiwa gwakashanganyiwa ne mafuta e ntjelo we ntoba akakobogwa. 6Tjipo tjinopisiwa tjinonuhwa zwinozipa, tjithamwa nge moto kupiwa Yahwe, tjidwilidza mbeli tjakatangisa ku Dombo le Sinai. 7Tjilizanyo tje tjipo tje tjing'o tjinoyenda ne pkhwizana imwe ne imwe inowobe bunna gwe lithara. 8Imwe pkhwizana uyise madekwana, ithamwe se tjipo tje mathunde tje mangwanana ne tje tjing'o, unowotjidusa tjili tjipo tjinopisiwa mu moto kube nnuhwo unozipa kuna Yahwe.
Tjipo tje Sabata
9“Mu zhuba le Sabata uyise tjibhayilo tje pkhwizana ndume mbili dzisina bulema, ne tjilizanyo tje seme dzili mbili dze bgwisa gwakanathiwa gwakashanganyiwa ne mafuta ne tjipo tje tjing'o. 10Etji tjibhayilo tjinopisiwa tje zhuba limwe ne limwe le Sabata, kuzhe kwe tjibhayilo tjinopisiwa tjakale, tjinoyisiwa ne tje tjing'o.
Tjipo tje zhuba le kutanga le mwedzi
11“Mu zhuba le kutanga le mwedzi mmwe ne mmwe, muyise tjibhayilo tjinopisiwa kuna Yahwe: Ili mikong'wana mibili ne nyundo ing'ompela ne pkhwizana ndume dzili kutendeka, dzose dzisina bulema. 12Ngekwe tjipo tje mathunde, muyise tjilizanyo tje seme dzili thatu dze bgwisa gwakanathiwa gwakashanganyiwa ne mafuta e ntjelo we ntoba tjipeleka nkong'wana mmwe ne mmwe, nyundo ipelekwe ne tjilizanyo tje seme dzili mbili dze bgwisa gwakanathiwa gwakashanganyiwa ne mafuta. 13Pkhwizana imwe ne imwe ipelekwe ne seme ing'ompela ye bgwisa gwakanathiwa gwakashanganyiwa ne mafuta. Tjibhayilo itjetji, tjibhayilo tjinonuhwa zwinozipa tjinopisiwa nge moto kupisigwa Yahwe. 14Zwipo zwabo zwe tjing'o kube lithara mbili dze nkumbi we zhambi zwipeleka nkong'wana mmwe ne mmwe, lithara ina gaswa ye nkumbi we zhambi ipeleka nyundo, lithara ing'ompela ye nkumbi we zhambi ipeleke pkhwizana imwe ne imwe. Nditjo tjipo tjinopisiwa mu mwedzi mmwe ne mmwe mu gole lose. 15Pezhugwi kwe tjibhayilo tjinopisiwa tje zhuba ne zhuba tjina tjipo tjatjo tje tjing'o, kuyisiwe phoko ing'ompela ye tjibhayilo tje tjibi kuna Yahwe.
Zwipo zwe Nzano we Kupinda pezhugwi
(Zwipo 23:5-14)
16 #
Kufuluka 12:1-13; Matama 16:1, 2 “Mu zhuba le bugumi ne bunna le mwedzi we kutanga Nzano we Kupinda pezhugwi wa Yahwe. 17#Kufuluka 12:14-20; 23:15; 34:18; Matama 16:3-8Nge zhuba le bugumi ne bushanu kube nzano, mu mazhuba ali kutendeka kube kujiwa tjiwunga tjisina mbidzo. 18Mu zhuba le kutanga le nzano kube nsi we kunamata, musitongobhata nshingo nge maboko. 19Mudusile Yahwe tjibhayilo tjinopisiwa tjili tjibhayilo tje mikong'wana mibili ne nyundo ing'ompela ne pkhwizana ndume dzili kutendeka, dzose dzisina bulema. 20Tjipo tjimwe ne tjimwe tjinodusiwa tjidusigwanyiwe nge tjibhayilo tje mathunde tje bgwisa gwakanathiwa gwakashanganyiwa ne mafuta e ntjelo we ntoba, tjilizanyo tje seme dzili thatu dzinopeleka nkong'wana mmwe ne mmwe ne tjilizanyo tje seme dzili mbili dzinopeleka nyundo. 21Ne tjilizanyo tje seme ing'ompela inopeleka pkhwizana imwe ne imwe mu pkhwizana idzedzi dzili kutendeka. 22Muduse phoko ing'ompela ye tjibhayilo tje tjibi, kuzwithamila gadzano na Yahwe. 23Muduse zwibhayilo izwezwi pezhugwi kwe tjibhayilo tjinopisiwa tjakale tje mangwanana. 24Nge zila iyo zwayo muduse tjibhayilo mazhuba wose kwe mazhuba ali kutendeka. Zwili zojiwa zwe tjipo tjinopisiwa mu moto kube nnuhwo unozipa kuna Yahwe; tjidusiwe pezhugwi kwe tjibhayilo tjinopisiwa ne tjipo tjatjo tje tjing'o. 25Ngono mu zhuba le butendeka mube ne nshangano wakayengemala we kunamata, musitongobhata nshingo nge maboko.
Zwipo zwe nzano we kuvuna
(Zwipo 23:15-22)
26 #
Kufuluka 23:16; 34:22; Matama 16:9-12 “Mu zhuba le kutanga le zwitshwa zwe minda, ha mudusa tjipo tje mathunde matshwa mupa Yahwe mu nzano wenyu we kuvuna, mube ne nshangano wakayengemala we kunamata, musitongobhata nshingo nge maboko. 27Muduse tjibhayilo tjinopisiwa kube nnuhwo unonuhwa zwinozipa kuna Yahwe. Muduse mikong'wana mibili, ne nyundo ing'ompela ne pkhwizana ndume dzina gole ling'ompela dzili kutendeka. 28Tjibhayilo tjimwe ne tjimwe tjinodusiwa tjidusigwanyiwe nge tjibhayilo tje mathunde tje bgwisa gwakanathiwa gwakashanganyiwa ne mafuta e ntoba. Tjilizanyo tje seme dzili thatu dzinopeleka nkong'wana mmwe ne mmwe, ne tjilizanyo tje seme dzili mbili dzinopeleka nyundo. 29Ne tjilizanyo tje seme ing'ompela inopeleka pkhwizana imwe ne imwe muna idzedzi dzili kutendeka. 30Kakale muduse phoko ing'ompela ye tjibhayilo tje tjibi, kuzwithamila gadzano na Yahwe. 31Pezhugwi kwe tjibhayilo tjinopisiwa ne tje mathunde tjakale, muzwiduse ne tjipo tjazo tje tjing'o. Ngono zose zwisina bulema.
Currently Selected:
Mbalo 28: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
