Mika 7
7
Kubola mikumbulo kwe Iziraela
1Ndadziyila seni!
Ndonga nthu unoshaka mitjelo
ye tjilimo shule kwe kunungwa kwe zwakasala kuvung'wa,
akuna zhambi dzandingaja
akuna phaya dzinobidwa dzandinoshaka.
2Bagalimoyo bakapela mu shango,
akuna ne nng'ompela wakatambunuka wakasala.
Bathu bose banolalila kutebula malopa,
mmwe ne mmwe unovima mwana wa tate babe nge gwanga.
3Maboko abo ana bunyambi kushinga mbipo,
mbusi unoshaka zwipo,
nsumikilisi unoamutjila tjizwimbanlomo,
bana masimba banokombeledza kuwana tjabanoshaka,
ndizo banolangana.
4Wakalulwama kupinda bamwe mubali unonga kungubo,
wakatambunuka nge buzhalo unonga bhakasa le mihwa.
Zhuba le balindi benyu lazha,
zhuba Ndzimu launomukumba.
Ngwenu tjibaka tje kuhwumana.
5Usitongo galabgwe mu mbakidzani,
usigalemoyo mu nzwalani,
kene ali ihwoyu waunolala wakan'gumbatila,
uyele njele matama awo.
6 #
Matewu 10:35, 36; Luke 12:53 Ngoti nkololo unolengudza tate babe,
nkololokadzi kamukila mmeyabe,
nlongo kamukila mezwale babe,
zwita zwe nthu nge be nsha uwe.
7Koga nge kwangu, ndolinda kuna Yahwe,
ndolindila Ndzimu Ntjidzi wangu,
Ndzimu wangu unowondihwa.
Yahwe banozhisa jidzo
8Usipembele nge kwangu iwe tjita tjangu,
ha ndiwa, ndowomuka.
Ha ndigala mu zhalima,
Yahwe banowobe tjedza tjangu.
9Ndowodzikatidzila kugwadzamoyo kwa Yahwe
ngoti ndakabatjinyila,
kuswikila bepedza ndebo yangu
bebe bepedza kundisumikilisa.
Banowondizhisa mu tjedza,
ndowobona kusunungula kwabo.
10Ipapo zwita zwangu zowobona,
ngono unowobhakhwa nge shoni
iye wakandidwa eti,
“Ungayi Yahwe Ndzimu uwo?”
Ndowobona apembela nge kukwe,
nangwenu wali unowotshambiwa nge makumbo
se dope mu zila.
11Zhuba le kubaka makuma awo lowozha,
zhuba le kutalabudza migathu iyo.
12Mu zhuba ilelo banowozha ku kuli
bedwa ku Asiriya ne ku mizi ye Egipiti
ne kudwa ku Egipiti kunoti ku gwizi gwe Yufuratesi
ne ku gungwa
ne kudwa ku dombo kuyenda ku dombo.
13Koga shango inowothukudzika ngekwe bagali bayo,
ngekwe mbhayilo we mishingo yabo.
Yahwe behwila ngoni Iziraela
14Lisa bathu babo nge ludozo gugo,
ngubi ye thaka iyo
iyeyi inogala yoga mu ishaka
mu shango ye mafudzilo akakola.
Uletje dzifule mu Bhashani ne mu Giliyadi
kube se mazhuba a ntolo akapinda.
15“Sekwa kabe iko mu mazhuba amakabhuda mu Egipiti,
ndowobalakidza matjenamiso angu.”
16Njudzi dzowobona dzikabhakhwa nge shoni,
dzikapelegwa nge simba,
banowobhata milomo yabo
ngono bakabe bomatshi.
17Banowonazwa hwuluba se nyoka,
se zwibumbiwa zwinosoba pasi.
Banowozha betetema bebhuda mu matizhilo abo,
banowoshandukila kuna Yahwe Ndzimu wedu nge kutja
ngono banowomutja.
18Ndiwupi Ndzimu unonga imwi, unozwiibhatigwa jinyo
ukazwiibhatigwa kutjuluka nlayo
kwe malimbelimbe e thaka yawo?
Amutogala makagwadzamoyo
koga moshathila kuhwila ngoni.
19Imwi mowobe nge mahwilongoni kakale ku tili,
mowotshamba zwibi zwedu nge makumbo,
mukalashila matjinyo edu mukatikati kwe gungwa.
20Mowolakidza Jakubo malebeswa,
ne ludo gusingapele kuna Abhurahama,
sekwa makatuna kuna bobatategulu bedu
mu mazhuba a ntolo akapinda.
Kalanga Bible © Bible Society of Botswana, 2008, 2018.