Mika 1
1
1 #
2 Bomambo 15:32-38; 2 Zwiyitikalo 27:1-7;
2 Bomambo 16:1-20; 2 Zwiyitikalo 28:1-27;
2 Bomambo 18:1—20:21; 2 Zwiyitikalo 29:1—32:33 Dama la Yahwe lakazha kuna Mika we Moresheti mu mazhuba e kubusa kwa Jothamu ne muna a Ahazi ne a Hezekiya bomambo be Juda, ili mbono yaakabona ngekwe Samariya ne Jerusalema.
Kulilila Samariya ne Jerusalema
2Ihwani imwi bathu, imwi mose
teedzani, shango nakose ku muili,
muletje She Yahwe batendeke nge kwenyu,
She betendeka kudwa mu ng'umba yabo yakayengemala.
3Ngoti bonani, Yahwe banozha bedwa mu magalo abo,
banodeluka bebe betshamba magalo apezhugwi e shango.
4Ipapo matombo anowonyawuka kusi kwabo,
mikuku iyo ikakwamuka
se phola ipejo ne moto
ikanga vula inowunga pakakunguluka.
5Kose ikoku kodang'wa nge kutjuluka nlayo kwa Jakubo,
ne ngekwe zwibi zwe nsha wa Iziraela.
Kutjuluka nlayo kwa Jakubo ini kene?
Apa ate ili Samariya kene?
Magalo akamilika e Juda ini kene?
Apa ate ili Jerusalema kene?
6Ndizo wali ndowothama Samariya duluthulu le malala,
unowobe pathu panolimiwa mizhambi.
Ndowotebulila mabgwe awe mu nkuku
ngono asiya thiwa iye ili patjena.
7Midzimu iye ye zwifano inowovunanyiwa ikabe zwitibhutibhu,
mibhayilo iye yose inowopisiwa nge moto,
midzimu iye yose ye zwifano ndowoyipkhwanya.
Se akakubunganya zwipo zwizwe kudwa mu mibhayilo ye fukula,
zowoshingisiwa koga se mibhayilo ye fukula.
Kulilila Juda
8Ngekwa ikoku ndowolila abokolela,
ndowoyenda ndisakaambala shangu ndakati piti.
Ndowolila se phungubgwe,
abubula se fukumudzi.
9Ngoti banga lile ate linopodziwa,
kwakazha ku Juda,
kwakaswika ku nkoba we bathu bangu,
ku Jerusalema.
10Musitongo kuleba mu Gati,
musilile tjoselele.
Mu Beti Leafura mubumbuluke mu hwuluba.
11Pindani muyende muli mbujo makabhakhwa nge shoni
imwi bagali be Shafiri,
bagali be Zaanani
ibo abatowobhuda mu nzi wabo.
Beti Ezele iyo imu tjililo,
mbakililo yayo yadusiwa mu muli.
12Ngoti bagali be Maroti bakalindila
tjakanaka nge moyo nlefu,
ngoti mbatsha dzabawila dzidwa kuna Yahwe,
dzikaswika ku nkoba we Jerusalema.
13Sungililani mbizi mu koloyi dze ngwa
imwi bagali be Lakhishi.
Ndimwi batangisi be tjibi,
ku nkololokadzi we Ziyoni,
ngoti bupanduki gwe Iziraela
gwakawang'wa mu muli.
14Ndizo mowodusila Moresheti Gati zwipo
zwe kuwonekana ikoko.
Bathu be Akizibu banowobe mapitipiti
kuna bomambo be Iziraela.
15Ndowozhisa nkundi kakale ku muli
imwi bagali be Maresha.
Iye gudzo le Iziraela
unowozha ku Adulamu.
16Teselani misholo mu tjililo,
mulilila bana benyu bamunoshathila,
muzwithame mapalo musale munga gola
nge kuti banowotapiwa kudwa mu muli.
Kalanga Bible © Bible Society of Botswana, 2008, 2018.