Matewu 6
6
Kudiya ngekwe kupa bashayi
1 #
Matewu 23:5
“Yelani njele kuti musiyite zwiyito zwe ndulamo mbeli kwe bathu muyita mashungwa ndibong'we. Ha muyita ikoku amutowobe ne mbhayilo unodwa kuna Tate benyu ba kudzimu.
2“Ndizo ha upa bashayi, usizibise nge kulidza lunyanga se kunoyita batjengedzi mu ng'umba dze mitembezelo ne mu zila kuti balumbidziwe nge bathu. Ndolebesa ndoti kumuli, bakauamutjila mbhayilo wabo kale. 3Ha upa bashayi usiyite kuti luboko gugo gwe lumeshwe guzibe tjinoshingwa nge luboko gugo gwe luji, 4kuyita kuti kupa kuko bashayi kube kwakasumbikala. Ipapo Tate babo ibo banobona zwakasumbikika, banowokupa mbhayilo.
Kudiya ngekwe kutembezela
(Luke 11:2-4)
5 #
Luke 18:10-14
“Ha mutembezela, musifanane ne batjengedzi, ngobe banoda kutembezela bali mile mu ng'umba dze mitembezelo ne mu mashanganilo e zila kuti babong'we nge bathu. Ndolebesa ndoti kumuli, baamutjila mbhayilo wabo. 6Koga ha utembezela, ngina mu ng'umba iyo uzhalile nkoba utembezele kuna Tate babo basingaboneke. Ipapo Tate babo banobona pakasumbikika, banowokupa mbhayilo.
7“Kakale ha mutembezela musilombolodze matama asina nshingo se bathu basibagalimoyo, ngobe banokumbula kuti banowohwika nge matama manji. 8Musifanane nabo, ngobe Tate benyu banoziba tjamunosheta musathu mukakumbila. 9Tembezelani sahwoku,
“ ‘Tate bedu ba kudzimu,
zina lenyu ngaliyengamadziwe.
10Bushe gwenyu ngaguzhe
kuda kwenyu ngakuyitiwe mu shango
sekwa kunoyitiwa kudzimu.
11Mutipeni nasi zojiwa zwedu zwe misi nge misi.
12Mutizwiibhatigwe milandu yedu,
sekwa tinozwiibhatigwa banotithamila milandu.
13Musitilonge mu kulikwa,
koga mutisunungule mu bubi.’
14 #
Mako 11:25, 26 “Ngobe ha muzwiibhatigwa bathu milandu yabo, Tate benyu be kudzimu banowomuzwiibhatigwabo. 15Koga ha musingazwiibhatigwe bathu milandu yabo, Tate benyu abatowomuzwiibhatigwa milandu yenyu.
Kudiya ngekwe kuzwinyima zojiwa
16“Ha muzwinyima zojiwa musifubale se batjengedzi banoshobesa njiso dzabo kuti kuzwinyima zojiwa kwabo kubong'we nge bathu. Ndolebesa ndoti kumuli, baamutjila mbhayilo wabo kale. 17Koga ha uzwinyima zojiwa, zhodza nsholo uwo mafuta ungule buso gugo, 18kuti ndizo kuzwinyima zojiwa kuko kusibong'we nge bathu, koga kubong'we ndi Tate babo bakasumbikala, ndizo Tate babo banobona kwakasumbikala banowokupa mbhayilo.
Fumwa kudzimu
(Luke 12:33-34)
19 #
Jakubo 5:2, 3 “Musizwikubunganyile fumwa mu shango panotjinya sole ne bulala ne mbava padzinoti dzikapkhwanya dzikakwiba. 20Koga muzwikubunganyile fumwa kudzimu pasingatjinye sole ne bulala ne mbava padzisinga pkhwanye dzikakwiba. 21Ngobe ipapo pana fumwa iyo ndipo panowobe ne moyo uwo.
Tjedza tje mbili
(Luke 11:34-36)
22“Zhisho ndilo luvone gwe mbili. Ndizo ha zhisho lilo lipitsha, mbili uwo wose uzhele tjedza. 23Koga ha zhisho lilo lisingapitshe, mbili uwo wose uzhele zhalima. Ha tjedza tjimukuli tjili zhalima, ligulu kungapani zhalima ilelo kene!
Ndzimu ne fumwa
(Luke 16:13)
24“Akuna iye ungashingila botetshi babili, ngobe ungabenga mmwe wabo kada mmwe, kene unowokudza mmwe kadeelela mmwe. Aungashingile Ndzimu kose ne fumwa.
Usidziyidzike
(Luke 12:22-31)
25“Ndizo ndomudwa nditi, musidziyidzike ngekwe butjilo gwenyu, ngekwe tjamunowoja kene tjamunowong'wa, kene ngekwe mibili yenyu kuti mowombalani. Apa butjilo agutopinda zojiwa kene ne mbili autopinda zwiambalo kene? 26Bonani nyuni dzinowuluka, adzitolima kakale adzitovuna kene kuli kubiganya mu matula, koga Tate benyu be kudzimu banodzijisa dzose. Apa amutodzipinda kunjinji kwazo kene? 27Ndiani wenyu ungati ngodziyidzika nge moyo kapaphidza kuli kutukununu bulefu gwe butjilo gugwe kene?
28“Apa modziyidzikilani ngekwe zwiambalo? Bonani kuti maluba e shango anokula tjini. Aatoshinga kakale aatoluka. 29#1 Bomambo 10:4-7; 2 Zwiyitikalo 9:3-6Koga ndomubudza kuti na iye Solomoni mu bukulu gugwe gose aazobe akaambala se ling'ompela lawo. 30Ikoko ha kuli iko Ndzimu sekwa unombadza maluba e shango iyawa ayapo nasi koga mangwana eposegwa mu tjibeso, apa autowomumbadza kupinda ikoku kwazo kene, imwi bathu be kugalamoyo kutukununu kene?
31“Ndizo musidziyidzike muti, ‘Towojani kene towong'wani kene towombalani?’ 32Ngobe bathu basibagalimoyo banotizhilila zwithu izwezwi zose. Tate benyu ba kudzimu banoziba zose zwamunotjila ndizo. 33Koga shakani bushe gwabo ne ndulamo yabo kutanga, ngono zwithu izwezwi zose mowozwipiwa na izobo. 34Ndizo musidziyidzike ngekwa mangwana, ngobe mangwana kowozwidziyidzikila nge kwako. Limwe ne limwe zhuba lina tshiyilo yakalilizana.
Kalanga Bible © Bible Society of Botswana, 2008, 2018.