Matewu 4
4
Kulikwa kwa Jesu
(Mako 1:12-13; Luke 4:1-13)
1 #
Bahebheru 2:18; 4:15 Ipapo Meya ikayisa Jesu ku tjilambanyika kulikwa ndi Satani. 2Wakazwinyima zojiwa mazhuba ali makumi manna ne masiku ali makumi manna, ngono shule kabe ne zhala. 3Nliki kazha kunli kati, “Ha uli Nkololo we Ndzimu idwa mabgwe iyawa abe zwiwunga.”
4 #
Matama 8:3
Jesu kanshandula kati, “Kwakakwagwa kuyi, ‘Nthu aangatjile nge tjiwunga koga, koga nge dama limwe ne limwe linodwa mu nlomo we Ndzimu!’ ”
5Ipapo Satani kantola kan'yisa ku Jerusalema, nzi nkulu wakayengemala, kammisa pa tjilungwane tje Ng'umba ye Ndzimu 6#Njimbo 91:11, 12ngono kati kunli, “Ha uli Nkololo we Ndzimu, uzwiposele pasi, ngobe kwakakwagwa kuyi,
“ ‘Unowodwa batumwa bawo be kudzimu nge kuko.
Ngono banowokugama,
kuti usilobe gumbo lilo mu bgwe.’ ”
7 #
Matama 6:16
Jesu kanshandula kati, “Kwakakwagwabo kuyi ‘Usilike She Ndzimu uwo.’ ”
8Kakale Satani kantola kantathisa dombo lefu lefu kwazo kanlakidza mibuso yose ye shango ne bubuya gwayo. 9Ngono Satani kati kunli, “Kose ikoku ndowokupa ha ungawila pasi ukandinamata.”
10 #
Matama 6:13
Jesu kati kunli, “Idwa pandili Satani, ngobe kwakakwagwa kuyi, ‘Namata She Ndzimu uwo ushingile iye ega!’ ”
11Ipapo Satani kansiya, ngono batumwa be kudzimu bakazha bakambhatsha.
Jesu unotangisa nshingo uwe mu Galili
(Mako 1:14-15; Luke 4:14-15)
12 #
Matewu 14:3; Mako 6:17; Luke 3:19, 20 Jesu wakati ehwa kuti Johani wasungwa, kabhuda mu ntuthu we Jorodani kayenda ku Galili. 13#Johani 2:12Ngono wakati ebhuda mu Nazareta kayenda kanogala ku Kapenaume pejo ne gungwa mu ntuthu we Zebhuloni ne Nafutali 14kuti kusiwile pasi matama akalebgwa ndi Isaya nlebesambeli eti,
15 #
Isaya 9:1, 2 “Shango ye Zebhuloni ne shango ye Nafutali,
kuyendila ku gungwa, seli kwe Jorodani,
Galili we be zwitjaba!
16Bathu bakabe begala mu zhalima
bakabona tjedza tjikulu.
Ibaba bakabe begala mu ntuthu
we zhalima le lufu,
tjedza tjabepo.”
17 #
Matewu 3:2
Kudwa mu tjibaka itjetjo Jesu katangisa kusumikila eti, “Shandukilani matjinyo enyu, ngobe bushe gwe kudzimu gwasedzela.”
Kudang'wa kwe babhati be hwobe
(Mako 1:16-20; Luke 5:1-11)
18Jesu kati eyenda akasupha nge gungwa gwe Galili, kabona bana be nthu babili, Simoni unoyi Pita na Enduru nnung'una uwe belashila gwanga mu gungwa, ngobe bakabe bali babhati be hwobe. 19Jesu kati ku bali, “Munditobele ngono ndowomuthama babhati be bathu.” 20Tjinyolotjo bakasiya njanga dzabo bakantobela.
21Kati, eyendila mbeli kudwa ipapo, kabona bamwe bana be nthu babili, Jakubo nkololo wa Zebhedi na Johani nnung'una uwe, bali mu n'goro bana tate babo Zebhedi beluka njanga dzabo ngono kabadana. 22Tjinyolotjo bakasiya n'goro na tate babo bakantobela.
Kudiya ne kusumikila ne kupodza kwa Jesu
(Luke 6:17-19)
23 #
Matewu 9:35; Mako 1:39 Jesu kayenda ntuthu wose we Galili ediya mu ng'umba dzabo dze mitembezelo esumikila ndebo mbuya ye bushe kakale epodza njigwele ne buworoworo gumwe ne gumwe pakati kwe bathu. 24Tjilumbi tjitje tjakahwika Siriya yose, ngono bathu bakazhisa kunli bose banogwala njigwele dzakasiyana siyana ne zwibhayo ne bakasungwa nge meya mibi ne bana zwifafa ne bakalobgwa nge gulukadzi, ngono kabapodza. 25Mibunga mikulu yakantobela idwa ku Galili ne ku Dekapoli ne ku Jerusalema ne ku Judiya ne ntuthu useli kwe Jorodani.
Kalanga Bible © Bible Society of Botswana, 2008, 2018.