Matewu 23

Tjenjelelani

(Mako 12:38-39; Luke 11:43, 46; 20:45-46)

1Ipapo Jesu kalebeleka ne mibunga ye bathu ne badiyiwa babe eti, 2“Badiyi be nlayo ne Bafarasi bagele mu tjigalo tja Mushe. 3Ndizo itani kuti mulondolodze tjimwe ne tjimwe tjabanomubudza. Koga musitongo shinga zwabanoshinga, ngobe abatoshinga zwabanoleba. 4Banosunga mitolo mikukutu inolema beibiga mu mathudzi e bathu, koga ibo tjekwabo basingake bakainyanyula. 5#Matewu 6:1; Matama 6:8; Mbalo 15:38Zose zwabanoyita nge zwe mashungwa ndibong'we. Banothama zwitshwegu zwabo zwe mitembezelo#23:5 zwitshwegu…mitembezelo: Kodwiwa zwikwatjana zwakabe zwakakwagwa dama le Ndzimu, zwakabe zwisungiligwa mu phazha ne mu maboko. zwikabe zwilefu ne mahabi e hazu dzabo dze mitembezelo kabe malefu. 6Banoda magalo a pezhugwi mu mizano ne magalo mabuya mu ng'umba dze mitembezelo. 7Banoda kulezwiwa ku matengeselo ne kudang'wa nge bathu kuyi, ‘N'diyi.’ 8Koga imwi amuzofanila dang'wa kuyi ‘N'diyi,’ ngobe muna N'diyi ali ung'ompela koga kakale imwi mose mu zwikamu. 9Kakale musitongo dana mmwe muti tate mu shango, ngobe muna tate bang'ompela ba kudzimu. 10Kene musitongo dang'wa kuyi ‘Ntungamili,’ ngobe muna ntungamili ng'ompela koga Mesiya 11#Matewu 20:26, 27; Mako 9:35; 10:43, 44; Luke 22:26Nkulu tjose pakati kwenyu wakafanila kube nlanda wenyu. 12#Luke 14:11; 18:14Iye unozwikudza unowoyisiwa pasi na iye unozwiyisa pasi unowokudziwa.

Jesu unosola butjengedzi gwabo

(Mako 12:40; Luke 11:39-42, 44, 52; 20:47)

13“Yee mme wee! Mapalala imwi badiyi be nlayo ne Bafarasi, batjengedzi ndimwi! Mozhalilila bathu bushe gwe kudzimu. Imwi nge kwenyu amutongina mu bushe gwe Ndzimu kakale amutoletja banoshaka ngina bakangina.#23:13: Dzimwe hwalo dza ntolo dze Bhaibhili dzopapha ndimana 14: “Yee mme wee! Mapalala imwi badiyi be nlayo ne Bafarasi, batjengedzi ndimwi! Molobesa ng'umba dze tjilikadzi muyita mitembezelo milefu kubong'wa nge bathu. Ndizo mowohwisiwa zogwadza kukulu.” (Lingano Mako 12:40.)

15“Yee mme wee! Mapalala imwi badiyi be nlayo ne Bafarasi, batjengedzi ndimwi! Moyenda shango yose ne gungwa kushandulila nthu nng'ompela mu bugalimoyo gwe Tjijuta, koga kati ashanduka mukan'yita mwana we mbipo kabili kupinda sekwa muli iko.

16“Yee mme wee! Mapalala imwi mapofu e batungamili! Moti, ‘Ha mmwe etuna nge Ng'umba ye Ndzimu, akutoti tjimwe, koga ha mmwe etuna nge golide le Ng'umba ye Ndzimu wasungwa ngotuna kukwe.’ 17Mapofu e zwilengwe ndimwi! Tjikulu nditjipi, i golide kene Ng'umba ye Ndzimu inoyita kuti golide liyengemale? 18Kakale moti, ‘Ha mmwe etuna nge tjibeso, akutoti tjimwe, koga ha mmwe etuna nge tjipo tjipezhugwi kwatjo, wasungwa ngotuna kukwe.’ 19Mapofu e bathu ndimwi! Tjikulu nditjipi, tjipo kene tjibeso tjinoyita tjipo kuti tjiyengemale? 20Ndizo iye unotuna nge tjibeso unotuna nditjo na iko kose kumutjili; 21na iye unotuna nge Ng'umba ye Ndzimu unotuna ndiyo, na iye unogala muili. 22#Isaya 66:1; Matewu 5:34Na iyebo unotuna nge kudzimu unotuna nge tjigalo tje bushe gwe Ndzimu na iye ugele pezhugwi kwatjo.

23 # Zwipo 27:30 “Yee mme wee! Mapalala imwi badiyi be nlayo ne Bafarasi, batjengedzi ndimwi, mopa tjebugumi* tje matenjana enyu e nvavani ne dili#23:23 dili: Nti ntukununu unoshingisiwa kuzipisa zojiwa, phudzi ne mazhani ne lutabi gwawo. ne kumini. Koga moletjedza zwikulu kwazo zwe nlayo: kusumikilisa kwakalulwama ne mahwilo zogwadza ne kugalamoyo. Mobe muyita izwezwi koga musingalashe zwimwe. 24Mapofu e batungamili ndimwi! Mowungunula nyunyu koga mumidza kamela.

25“Yee mme wee! Mapalala imwi badiyi be nlayo ne Bafarasi, batjengedzi ndimwi! Mosuka kuzhe kwe nkombe ne ndilo koga mukati dzezhele kusazwidziba ne bugovu. 26Nfarasi we bhofu ndiwe! Suka mukati kwe nkombe ne ndilo kutanga, ndizo na kuzhe kwayo kowobe kubuyananabo.

27 # Mishingo 23:3 “Yee mme wee! Mapalala imwi badiyi be nlayo ne Bafarasi, batjengedzi ndimwi! Mofanana ne zwikumbu zwakadzulugwa nge butjena, zwakanaka kuzhe koga mukati zwili zhele mafupa e bathu bakafa ne zwakatemapala. 28Sa ikoko, kuzhe molingika ku bathu muli balulwami, koga mukati muzhele butjengedzi ne jinyo.

Jesu unoleba ngekwe kulobgwa kwabo

(Luke 11:47-51)

29“Yee mme wee! Mapalala imwi badiyi be nlayo ne Bafarasi, batjengedzi ndimwi! Mobakilila zwikumbu zwe balebesambeli mukanakisa zwikumbu zwe balulwami, 30muti, ‘Ha tingabe takatjila mu misi ya bobatategulu bedu, tingabe tisakabhatana nabo mu nshingo we kutebula malopa e balebesambeli.’ 31Ndizo mozwileba kuti mu bana be bathu bakabulaya balebesambeli. 32Zhadzisani tjilizanyo tje jinyo la bobatategulu benyu. 33#Matewu 3:7; 12:34; Luke 3:7Nyoka ne nyokana ndimwi! Apa mowotizha tjini kusumikilisigwa kulashigwa mu moto usingadzime? 34Ndizo ndomutumila balebesambeli ne balume bakatjenjela ne badiyi be nlayo. Bamwe babo mowobabulaya mukababambula, bamwe mubaloba mu ng'umba dzenyu dze mitembezelo mukabadziyidza nzi ne nzi. 35#Kutangisa 4:8; 2 Zwiyitikalo 24:20, 21Ndizo kowobe pezhugwi kwenyu malopa e balulwami akatebugwa mu shango, kutangisa nge malopa a Abele usina nlandu kunoti mu malopa a Zakhariya nkololo wa Bharakiya wamakabulayila pakati kwe Ng'umba ye Ndzimu ne tjibeso. 36Ndolebesa ndoti kumuli, kose ikoku kowozha pezhugwi kwe bathu bangwenu.

Jesu unolilila Jerusalema

(Luke 13:34-35)

37“Jerusalema, Jerusalema wee! Iwe unobulaya balebesambeli ukakikithidza nge mabgwe ibabo batumwa ku kuli. Ndikangana ndiyemula kukubunganya bana babo se hwuku ibubatila hwukwana dzayo nge mapapilo ayo, koga ulamba. 38#Jeremiya 22:5Bona, ng'umba iyo yafupatigwa kakale yabe dongo. 39#Njimbo 118:26Ndizoke ndokubudza nditi, autowondibona kakale kuswikila uti, ‘Wakakombolegwa iye unozha nge zina la She.’ ”

Currently Selected:

Matewu 23: KBTP

Highlight

Copy