Matewu 2
2
Balume bakatjenjela
1Kwakati Jesu asinobe azwagwa mu nzi we Bhetelehema we Judiya, mu tjibaka tje mbuso wa Herode mambo, kukazha balume bakatjenjela ku Jerusalema bedwa ku bhezhuba, ngono bakabhuzwa bakati, 2“Ungayi mambo we Bajuta wazwagwa kene? Tabona nyenyedzi iye ku bhezhuba ngono tawonnamata.”
3Ngono kwakati mambo Herode ne bunji gwe bathu mu Jerusalema, behwa ikoku bakadziyidzika kwazo. 4Herode wakakubunganya bapirisiti bakulu bose ne badiyi be nlayo ngono kababhuzwa kuti Mesiya unowozwaligwa ngayi.
5Bakashandula beti, “Mu nzi we Bhetelehema mu ntuthu we Judiya, ngobe ikoku ndiko kwakakwagwa nge nlebesambeli eti,
6 #
Mika 5:2
“ ‘Koga iwe nzi we Bhetelehema, mu ntuthu we Juda,
aute uli ntukununu tjose mu balauli be Juda,
ngobe mukuli kowobhuda nlauli
unowolisa bathu bangu Baiziraela.’ ”
7Ipapo Herode kadana balume ibabo bakatjenjela nge kwakasumbikala, kuti awane malebeswa mubali ekuti nyenyedzi yakaboneka tjibaka tjipi. 8Ndizo Herode kabatumila ku Bhetelehema eti, “Yendani munoshaka mwana iwoyo nge njele. Muti ha mambona, mundizibise kuti namibo ndiyende ndinonnamata.”
9Bakati basinohwa tjalebgwa ndi mambo, bakayenda, ngono bakabona nyenyedzi yabakabe babona ku bhezhuba, ikabatungamila kudzina ima pezhugwi kwe pakabe mwana alipo. 10Bakati bebona nyenyedzi bakashatha kwazo kwazo, 11ngono bakati bengina mu ng'umba bakabona mwana na mmeyabe Mariya, bakazwiyisa pasi bakan'namata. Kudwapo bakadusa fumwa yabo bakampa zwipo zwe golide ne nti we motsha unonuhwa zwinozipa ne nti we mira.
12Ngono balume ibabo se bakabe batjenjedziwa mu hwope kuti basibgwilile kuna Herode, bakabgwilila ku shango yabo nge zila ipoga.
Kutizhila ku Egipiti
13Bakati bayenda, ntumwa wa She kaboneka kuna Josefa mu hwope eti, “Muka, tola mwana na mmeyabe utizhile ku Egipiti. Ugale ikoko kudzina ndikubudza kuti utini, ngobe Herode wabe pejo ngoshaka mwana kuti ambulaye.”
14Ndizo kamuka, katola mwana na mmeyabe busiku kayenda ku Egipiti, 15#Hoseya 11:1kwaakagala kuswikila Herode efa. Oku kwakashingikala kuti ndizo kusiwile pasi matama a She akalebgwa nge nlebesambeli eti, “Ndakadanila Nkololo wangu kuzhe kwe Egipiti.”
Kubulawa kwe bana be Bhetelehema
16Herode kati ebona kuti balume bakatjenjela bantjenjelela, kangina bushongola kwazo, ngono kadusa ndaulo kuti bana bose be tjilisana mu Bhetelehema ne ntuthu wose bana makole mabili ne kuyenda pasi babulawe. Makole iyawa Herode wakabe ealebela pezhugwi kwe tjakabe tjalebgwa nge balume bakatjenjela. 17Ipapo matama akalebgwa nge nlebesambeli Jeremiya kasiwile pasi, Jeremiya wakabe ati,
18 #
Jeremiya 31:15
“Hwi lakahwika mu nzi we Rama
kumimila ne kulila kukulu kulu
Rahele elilila ngawana dzidze
elamba nyaladziwa, ngobe dzafa.”
Kubgwilila ku Nazareta
19Herode kati asinofa, ntumwa we kudzimu kaboneka mu hwope kuna Josefa ali ku Egipiti, eti, 20“Milika utole mwana na mmeyabe uyende ku shango ye Iziraela, ngobe ibabo bakabe beshaka kupedza butjilo gugwe bakafa.” 21Ndizo kamilika katola mwana na mmeyabe kayenda ku shango ye Iziraela.
22Ngono Josefa kati ehwa kuti Akelaosi wagala tate babe Herode thaka, unobusa mu Judiya katja kuyendako. Ndizo kati atjenjedziwa mu hwope kashandukila ku ntuthu we Galili. 23#Mako 1:24; Luke 2:39; Johani 1:45Wakayenda kanogala mu nzi we Nazareta, kuti ndizo kusiwile pasi matama akalebgwa nge balebesambeli beti, “Unowodang'wa Nnazareta.”#2:23 Nnazareta: Nthu unodwa ku toropo ye Nazareta. Zina ilelo lakabe lishingisiwa muna Jesu lilakidza mamo awe, kakale lakabe lili zina lakapiwa Bakirisiti be kutanga (Mishingo 24:5).
Currently Selected:
Matewu 2: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.