Zwililo 3
3
Kulobgwa shamu ne kushanduka ne kugalabgwe
1Imi ndimi nthu wakabona kudziyidzika,
mu shamu ye bushongola gwabo,
2Bakandikweba bakandiyisa
ku lima lisina tjedza,
3nge malebeswa banomilidza luboko gwabo
bendiloba be paphulula kanjinji zhuba lose.
4Bakathama kuti nyama yangu
ne ganda langu zwishakale,
mafupa angu bakaavuna vuna.
5Bakandikomba bakandipoteleka
nge bushungu ne mang'oni.
6Bakathama kuti ndigale mu zhalima
se nfi wa ntolo.
7Bakandibakilila nge bhakasa kuti ndizo ndisitongo siya
bakalonga ketani dzinolema mundili.
8Nenguba ndidana ndikumbila bhatsho,
abatoteedza ntembezelo wangu,
9bakazhalila zila dzangu nge mabgwe akabezhiwa,
bakathama kuti zila dzangu dzikombame.
10Se bhira yakalalila bakandisala shule
se shumba imu zwimba,
11bakandidzibilidza mu zila dzangu,
bakandipalula abe zwitibhu tibhu
bakandisiya ndili mu zhuba.
12Bakapeta dati labo bakalingisana nami,
bakathama kuti ndibe unoposiwa nge misebe yabo.
13Bakabhaya moyo wangu
nge misebe ye gobhodo labo.
14Ndatjibe tjiseko ku bathu bose,
kundidadila kwabo kwatjibe lumbo gwe zhuba lose.
15Bakandigutsha nge zwinobaba,
bakanding'wisa ndulu inobaba.
16Bakathama kuti meno angu apupune mabgwana
bakandivukidza mu hwuluba.
17Ndakadzibigwa mbakiso,
ndakakangang'wa kuti bhudilila kodwiwani.
18Ndizo nditi, “Gudzo langu lakapela,
na zose zwandakabe ndakazwilingilila kudwa kuna Yahwe.”
19Kumbulani kudziyidzika ne lungaila kwangu,
ne mbabashulo ne ndulu zwinobaba.
20Nkumbulo wangu unogala wakakualakana,
ngono kondidzonga nkumbulo.
21Koga ikoku ndowokulonga mu moyo,
ndizo nditjina kugalabgwe.
22Ludo gusingazunguzike gwa Yahwe agutoma,
mahwilo ngoni abo aatopela,
23matshwa mangwanana mamwe ne mamwe,
kukulu kugalikamoyo kwenyu.
24Yahwe ndibo gobe langu,
ndozwidwa ndiyijalo,
ndizo ndowogalabgwe mu bali.
25Yahwe bakalulwama kuna banogalabgwe mu bali,
kuna ibabo banobashaka.
26Kwakanaka kulindila nge moyonlefu
jidzo la Yahwe.
27Kwakanaka kuti nthu
asenge jokwi atji ntjetjana.
28Ngaagale ali ega akanyalala,
ngoti Yahwe ndibo batilika ntolo mu nli.
29Ngaavukidzile buso gugwe mu hwuluba,
pamwe swiyo kungabe kutjina kugalabgwe.
30Ngaape lushaya gugwe kuna unonloba,
agute masapa awe.
31Ngobe She abangatilashile tjose.
32Nenguba bangazhisa zogwadza,
kudwapo banolakidza mahwilo zogwadza,
kuyendidzana nge bukulu gwe ludo gwabo gusingazunguzike.
33Ngoti abatoloba kene
kuzhisa zogwadza mu bana be bathu nge mwaza.
34Kutshamba nge makumbo
basungwa bose mu shango,
35kulambila nthu tjakanlingisana,
mbeli kwe Upezhugwi zhugwi,
36kudzibila nthu ndulamo,
Yahwe abatodumana ne zwithu zwakajali!
37Ndiani ungalebeleka kukashingikala,
kuzhe kwe kuti She babe balaula kuti kujalo kene?
38Apa ate nlomo we Upezhugwi zhugwi,
unodwa zogwadza zose ne zwithu zwibuya kene?
39Ini nthu unotjila angang'ongola
haelobgwa shamu ye zwibi zwizwe kene?
40Ngati shakisiseni zila dzedu kakale tidzilike,
ngono tishandukile kuna Yahwe.
41Ngatizhuleni mimoyo yedu timilidzile maboko edu
ku Ndzimu u kudzimu titi,
42“Takatjinya tikapanduka,
ngono amuzowotizwiibhatigwa.
43“Makazwifukidza nge gwadzamoyo mukatitatamila
mukatibulaya musina ngoni.
44Makazwifukidza nge gole,
kuti kushete ntembezelo ungaswika kumuli.
45Makati thama tikabe shambgwa ne malala
pakati kwe zwitjaba.
46“Zwita zose zwedu
zwakati zhulila milomo yazo zotituka.
47Lutjo ne bhuzhu zwimbeli kwedu,
paladziwa ne golomodzo zwakatilingisana.”
48Misenya ye mishodzi inowunga kudwa mu mesho angu,
ngoti bathu bakanyi kwangu balobesiwa.
49“Mesho angu anowowunga mishodzi
nge kusingapele, asina kunyaluluka,
50kudzina Yahwe belinga pasi bali pezhugwi
kubona tjinoshingikala.
51Zwandinobona zondizhisila buyendasi mu moyo wangu,
ngekwe kudziyila kwe bakololokadzi be nzi wangu nkulu.
52“Zwita zwangu zwakabe zwakandibengela suli,
zwakabe zwindivima se nyuni.
53Zwakagwisa kupedza butjilo gwangu
nge kundilashila mu gomba,
zwikandikikithidza nge mabgwe,
54vula ikandima pa thong'omana
ngono azwidwa nditi ndafa tjose.
55“Ndakadana zina lenyu imwi Yahwe,
ndili pasi pasi mu gomba.
56Makahwa kukumbila kwangu,
musizwine zebe dzenyu andililila kumuli
ndikumbila bhatsho.
57Makasedzela pandili pandakabe ndimudana,
ngono makati kundili ‘Usitje!’
58“Imwi She makatola ndebo yangu,
makadzutunula butjilo gwangu.
59Yahwe makabona kuti ndakasundigwa nlandu tjini,
sumikilisani ndebo yangu.
60Makabona kuti bakabe bali zhele kubgwilizila kungapani
ne njanga dzabakandilukila.
61“Imwi Yahwe makahwa masapa azo,
ne kundilukila njanga kwazo,
62milomo ne mikumbulu ye zwita zwangu
dzobhayana nami zhuba lose koga.
63Tongobonani koga, abegala kene bema,
tjabo hwundidadila koga nge njimbo dzabo.
64“Muzwibgwilizile itjo tjakazwilingisana imwi Yahwe,
kuyendidzana ne tjazwakathama.
65Tundubadzani mimoyo yazo,
bhiso lenyu liwile muzwili.
66Muzwitatamile nge bushongola muzwilobese,
mu zhuzhugwi la Yahwe.”
Kalanga Bible © Bible Society of Botswana, 2008, 2018.