Joshuwa 18
18
Kobiwa kwe shango yakasala
1Gubungano lose le Baiziraela lakanokubungana ku nzi we Shilo ngono bakabaka nshasha we bushanganilo. Shango yose ikabe pasi kwabo. 2Kwakabe kutjina njudzi dzili kutendeka muna dze Baiziraela dzakabe dzasala dzisathu dzikakobegwa shango. 3Ngono Joshuwa kadwa Baiziraela kati, “Mowotola tjibaka tjingapani munonoka kutola shango yamakapiwa ndi Yahwe Ndzimu wa bobatategulu benyu kene? 4Ludzi gumwe ne gumwe ngaguduse balume bali batatu, ndibatume kuti bayende banobona shango ngono bakwale nge buzhalo nge kwayo kuti munga ikobegwa tjini ngono babe beshandukila kundili. 5Muthubukanye shango katendeka. Juda isale mu ntuthu wayo ku burwa ngono be ludzi gwa Josefa ibo batole ntuthu uku bunandzwa. 6Apa musino kuthubukanya shango katendeka, mukwale ngekwe makwamu e shango ali kutendeka amathubukanya mube muzhisa kundili, ndizo ndowomukandilila mbeli kwa Yahwe. 7Balevi ibo abana gobe pakati kwenyu ngobe kushingila Yahwe ndiyo thaka yabo. Gadi na Rubheni ne gwamu le ludzi gwa Manase ibo bakapiwa gobe labo kale ku bhezhuba kwe Jorodani ndi Mushe nlanda wa Yahwe.”
8Ndiko balume ibabo bakamilika kunobona shango kuti ingathubukanyiwa tjini, Joshuwa kabalaya eti, “Yendani munothama ndingisiso ye shango mukwale nge buzhalo nge kwayo kuti ingathubukanyiwa tjini. Kudwapo mushandukile ku ndili, ngono imi ndowoposela ndili mbeli kwa Yahwe pano mu Shilo.” 9Ndizo balume ibaba bakamilika bakayenda bakapalama shango. Bakakwala nge buzhalo ngekwe nzi ne nzi mu mituthu ili kutendeka ngono bakashandukila kuna Joshuwa ku bukotokelo ku Shilo. 10Joshuwa kaposela nge kwayo mbeli kwa Yahwe ngono kakobela Baiziraela bakasala shango nge njudzi dzabo.
Kobegwa shango kwe Babhenjamini
11Dziba le kutanga likawila ludzi gwa Bhenjamini nsha nge nsha. Bakapiwa ntuthu wakabe uli pakati kwe mituthu ya Juda neya Josefa. 12N'gathu we ludzi gwa Bhenjamini ku ndzibo we bunandzwa wakabe utangisa pa gwizi gwe Jorodani, kudwapo udwilila wakalinga kwakakung'ulukila kwe Jerikho ku bunandzwa, udwapo utathila shango ye matombo kunomila zhuba unopelela ku tjilambanyika tje Bhetiaveni. 13Wakabe udwapo upinda uli ku burwa gwe kwakatathila kwe Luzi (inodang'wa Bhetele) upinda uli ku Atarotiadari mu dombo liku burwa gwe Bhetihoroni. 14Kudwapo n'gathu ukashandukila kunomila zhuba unopubuka uli ku dombo lakalinga ku Bhetihoroni ku burwa, n'gathu wakabe ushanduka ulinga ku burwa uli kunomila zhuba unobhuda uli ku Kiriyatibhali (hwuti Kiriatijearimu), nzi we ludzi gwa Juda. Ikoku kuthama ntuthu ukunomila zhuba. 15N'gathu uku burwa wakabe utangisa ku lubizho gwe Kiriatijearimu kunomila zhuba unopubuka uli ku misenya ye Nefutoya, 16ube uyenda unoti pa thobo dze dombo wakalinga nkuku we nkololo wa Hinomu ku bunandzwa gwe nkuku we Refaimu, udwilila udelukila mu nkuku we Hinomu lubizho gwe kunokungulukila nzi we Bajebusi newe Enerogele. 17Kudwapo upotelekela kunomila zhuba, uyenda ku Eneshemeshi udwilila wakalinga ku Geliloti yakalingisana ne pakatathila kwe Adumimi, udwapo unopinda bgwe la Bhohani nkololo wa Rubheni. 18Upinda uli panotathila kwe Bhetiaraba uyenda ku Araba, 19unopinda uli ku bunandzwa gwe kunokungulukila kwe Bhetihogila unopelela ku bunandzwa gwe phili dze Gungwa le Mwenyu ku burwa gwe Jorodani. Iwoyo uli n'gathu uku burwa. 20Gwizi gwe Jorodani igo gwakabe guthama n'gathu ku bhezhuba. Iyeyi yakabe ili migathu yakabe ilakidza mituthu yakapiwa ludzi gwa Bhenjamini nsha nge nsha.
21Mizi ye ludzi gwa Bhenjamini nsha nge nsha yakabe ili sa woku; Jerikho ne Bhetihogila ne Emekikezizi ne 22Bhetiaraba ne Zemarayimi ne Bhetele ne 23Awimu ne Phara ne Ofira ne 24Khefaraamoni ne Ofini ne Geba yose yakashangana ne mizana yayo yakabe ili gumi lina mibili (12). 25Gibiyoni ne Rama ne Bheeroti ne 26Mizipha ne Khefira ne Moza ne 27Rekemu ne Iripeele ne Tarala ne 28Zela ne Haelefu ne Jebusi (hwuti Jerusalema) ne Gibiya ne Kiriatijearimu yose yose yakashangana ne mizana yayo yakabe ili gumi lina minna (14). Ndiyo thaka yakapiwa ludzi gwa Bhenjamini.
Currently Selected:
Joshuwa 18: KBTP
Highlight
Copy
Compare
Share
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
