Jobe 24
24
1“Ini Masimbawose basingabige zwibaka zwe kusumikilisa kene,
ini ibabo banobaziba basingatongobona zhuba le ndulamo kene?
2Bathu banofulusa migathu,
bakatapa zwithuwo ngono bakazwifudza.
3Banotapa madonki e siyang'wa
bakatola ngabe ye tjilikadzi bakaibigilidza.
4Banopinganyidza bashayi mu zila
basheti be shango bose banobgwata.
5Bonani banonga madonki e shango ali mu tjilambanyika,
banoyenda yenda beshinga, beshaka tjingajiwa,
mu shango beshakila bana zojiwa.
6Banovuna mu minda dzisi dzabo
banotjela mu minda dze zhambi dze babiibi.
7Banoizela basakasungila abana zwiambalo,
abana naiyo ngubo yabangafuka akupota.
8Banonigwa nge vula dze matombo,
ngono bakatizhila hwunde ye shongwe kusina pabangatizhila.
9Banodzamula siyang'wa dzitjamwa muna bomayi,
bakatola shabana dze bashayi kulipa zwikoloto.
10Banoyenda yenda basina zwiambalo
bana zhala, besenga zwiyako zwe mathunde.
11Banokuna mafuta mu mitjelo ye mitoba ne nkumbi mu zhambi,
koga ibo be bulawa nge nyota.
12Kugomela kwe banofa kohwika mu nzi nkulu
ne be mimoyo yakafubala banolila bekumbila bhatsho
koga nenguba kwakajalo Ndzimu autobateedza.
13“Bathu ibaba ndibo banofupatila tjedza,
abatozibisisa zila dzatjo kene kuli kutjitobela.
14Mabamba kuyedza mbulayi unomilika,
kanobulaya ndziyili ne nsheti,
mu busiku kabhuda se mbava.
15Zhisho le phombgwe lomilila kuti kubhate,
ibe izwidwa iti, ‘Akuna unondibona,’
ngono ikazwifukidza buso nge jila.
16Mulima mbava dzopkhwanya ng'umba
akuyedza dzozwizhalilila mu ng'umba,
adzitoshaka tjedza pa dzili.
17Zhalima lakati zwii mangwanana ku bali bose,
ngobe bazwalani be zwinotjisa zwe zhalima.
18“Unoti, ‘Mbimbi unosengwa nge nkubila,
gobe le shango iye lakalongwa bhiso,
kuti ndizo kushaye unoyenda ku minda dzabo dze mizhambi.
19Zhuba ne pisa konyawusa kapuku
ndizo bugalo gwe bafi gothamila ibabo bakatjinya saikoku.
20Mme be ntjinyi ngaban'kangang'we,
ngaazipile hwonyana,
babi basitongotjakumbugwa ndodwa.
Bubi gowokolomogwa se nti watemiwa!’
21“Banovima balumbila,
bakasilakidze lubu ku tjilikadzi.
22Koga Ndzimu unowatsha butjilo gwe bakasima nge simba lawo,
banomilika bakasima ha bapelegwa mu butjilo.
23Unobapa mbakililiko bakakulumbidziwa,
wakabiga zhisho zila dzabo nge njele.
24Banokudziwa kwe tjibaka tjitukununu, kudwapo abatjipo,
koga banowoyisiwa pasi bakanga mmwe ne mmwe,
bakabuna se zwiyako zwe mathunde.
25Akuzojalo kene? Ndiani unganyanyaidza kene?
Kalakidza ha matama angu asitjimwe kene?”
Kalanga Bible © Bible Society of Botswana, 2008, 2018.