Jeremiya 6
6
1Tizhani imwi bathu be Bhenjamini!
Tizhani mu Jerusalema!
Lidzani lunyanga mu Tekowa,
milidzani tjilakidzo ku Bhetehakeremu,
ngoti mbatsha dzakaangama kudwa ku bunandzwa,
ne golomodzo gulu.
2Ndowokolomola nkololokadzi we Ziyoni
iye wakanaka unozwida.
3Balisi ne ngubi dzabo banowon'nginilila,
banowobaka mishasha yabo kumpoteleka,
mmwe ne mmwe unowofudzila mu magalo awe.
4“Lulwamisani ngwa kubhayana naye,
ngati n'nginilileni zhuba lili pa thongomana!”
“Yee mme wee! Tapalala ngoti zhuba lotjimila,
mitutshi ye matewuko yotjikula.”
5“Milikani, ngatibanginilileni busiku,
tikolomole ng'umba dzidze dze bushe!”
6Ngoti Yahwe Masimbawose bakati,
“Temani miti yayo,
mubake matathilo nge vu kupoteleka Jerusalema.
Ndiwo nzi nkulu wakafanila lobgwa shamu,
akuna tjimwe kuzhe kwe kutshambilidza koga muuli.
7Koga se tshime libhata vula yalo mbuyanana,
ndizo unozwibigila vula mbuyanana mu bubi gugwe.
Ngwa ne golomodzo zohwika muuli,
bugwele ne mabanga zogala zwili mbeli kwangu.
8Tjenjela iwe Jerusalema,
kuyita kuti ndisitongodwa ndikufupatila,
ndikadwa ndikuthama kuti uthukudzike,
ube shango isina bagali.”
9Yahwe Masimbawose bakati,
“Kubunganyani limbelimbe le Iziraela kwazo se zhambi,
se ntjeli we zhambi yisani maboko enyu ku thabi dzawo.”
10Ndiani wandakafanila lebeleka naye kuti ndintjejedze,
iye ungateedza kene?
Bona zebe dzabo dzakazhaligwa
kuti basiteedze,
bona, dama la Yahwe ntukano kubali,
abatobona shatho mu lili.
11Ndizo ndizhele bushongola gwa Yahwe,
ndonyala nge kulibhatilila.
“Gutebulilani pezhugwi kwe bana mu dzizila,
na pezhugwi kwe makubungano wose e bazhuzha,
balume ne bakadzi banowobe mugulibo,
kose ne bawola ne sholotjena.
12Ng'umba dzabo dzowokobegwa bamwe,
kose ne minda dzabo kose ne bakadzi babo,
ngoti ndowotambunudza luboko gwangu,
aloba bagali be shango,”
kojalo Yahwe.
13“Kudwa mu ntukununu kunoti nkulukulu,
mmwe ne mmwe uzhele bugovu gwe kushaba nge kusakalulwama,
kudwa mu nlebesambeli kunoti ku mpirisiti,
mmwe ne mmwe unothama bupitipiti.
14 #
Ezekiele 13:10
Bakapodza mabanga e bathu bangu kutukununu,
beti, ‘Kunyalala, kunyalala,’
koga akuna kunyalala.
15 #
Jeremiya 8:10-12
Apa bakabe bana shoni abethama zwinoshimisa kene?
Aa, bose koga abana shoni,
abatolobgwa ne hana.
Ndizo banowofabo koga sa ibabo bakafa,
nge tjibaka tjandinobe ndibaloba shamu,
banowolobesiwa,”
kojalo Yahwe.
16Ngoti Yahwe bakati,
“Imani hwunde ye zila mubone,
ngono bhuzwisisani ngekwe zila hwulukugwi,
iko kuna zila yakalulwama kwayiko, ngono muyende muili,
muwane kunyaluluka kwe meya dzenyu.
Koga banoti, ‘Atingayende muili.’
17Ndakamubigila balindi kumutjengeta nditi,
‘Bhulutanani kulila kwe lunyanga!’
Koga banoti, ‘Atingabhulutane.’
18Ndizo ke teedzani, imwi zwitjaba,
zibani imwi gubungano kuti banowoshingikaligwa ngeni.
19Teedzani imwi shango, bonani, ndozhisa bubi mu bathu ibaba,
igo ntjelo we mikumbulo yabo,
ngoti abazobhulutana matama abo,
koga ngekwe nlayo wangu, bakaulasha.
20Apa ndoshathila motsha unodwa ku Sheba,
kene pkhwe dzinodwa ku shango dzikule kene?
Zwibhayilo zwenyu zwinopisiwa hazwitoamutjilika,
ne zwipo zwenyu azwitondishathisa.
21Ndizo Yahwe bakati,
‘Bonani ndobiga mbeli kwe bathu ibaba,
bgwe linokutha linowobakutha,
botate kose ne bakololo,
mbakidzani ne nkwinya banowoloba.’ ”
22Yahwe bakati,
“Bonani, bathu baswika kudwa ku shango ye bunandzwa,
shango hwulu inodzonga kudwa phelelo dze shango.
23Bakazwilulwamisa ne matati ne misebe,
bakasima mimoyo kakale abana ngoni,
nsindo wabo unonga wekuwona kwe gungwa,
banotatha mbizi,
bakalongoloka se balume banoyenda ku ngwa
kuwokunginilila iwe nkololokadzi we Ziyoni!”
24Takahwa mbiko ngekwako,
tikatemeka mafupa tisina simba,
zogwadza zwakati ambadza,
zogwadza zwinonga nkadzi ali mu zwibhayo.
25Musibhudile kuzhe ku minda,
kene kuyenda mu dzizila,
ngoti tjita tjina thumo,
lutjo gumu mabizho wose.
26Iwe nkololokadzi we bathu bangu,
ambala zwiambalo zwe saka,
ubumbuluke mu nlota,
ulile se unolilila nkololo uwo uyega,
tjililo tjinogwadza,
ngoti tjinyolotjo nkolomodzi
unodwa ezha mutili.
27“Ndakakuthama nliki we phangula ne bathu bangu,
kuti ndizo ulingisise kakale ulike zila dzabo.
28Bose koga zwikomba zwe bapanduki,
bakanoyenda yenda beleba bung'wa,
bakasima se phangula kene butale,
bose koga banotjinya.
29Vutho lothuta kwazo,
ntodo unojiwa nge moto,
kukuyunga kwakadwilila suli,
ngoti babi abatosukika.
30Bo tjidang'wa siliva yakalashiwa,
ngoti Yahwe bakabalasha.”
Kalanga Bible © Bible Society of Botswana, 2008, 2018.