Jeremiya 52
52
Kuwa kwe Jerusalema
(2 Bomambo 24:18—25:7)
1Zedekiya wakabe ali makole ali makumi mabili ana ling'ompela (21) paakabe mambo, wakabusa makole ali gumi lina ling'ompela (11) mu Jerusalema. Zina la mmeyabe lakabe liyi Hamutali bali nkololokadzi wa Jeremiya we Libina. 2Wakathama mbipo mbeli kwa Yahwe, koga sekwa kathama Jehoyakimu. 3Nge malebeswa ngekwe kugwadzamoyo kwa Yahwe zwithu zwakashingikalila Jerusalema ne Juda, zwakayita kuti babatate mbeli kwabo.
Zedekiya kapandukila mambo we Bhabhiloni. 4#Ezekiele 24:2Ngono kukati mu gole le buzhanalume le mbuso uwe, mu mwedzi we bugumi, mu zhuba le bugumi le mwedzi, Nebukadineza mambo we Bhabhiloni kazha ne babhayani babe bose kubhayana ne Jerusalema, kaikomba kabaka duluthulu le guma kuipoteleka. 5Ndizo nzi nkulu wakakombiwa kunoti gole le bugumi lina ling'ompela (11) la Mambo Zedekiya.
6Mu zhuba le buzhanalume le mwedzi we bunna bhamba likabipa mu nzi nkulu kwakayita kuti kusheteke zojiwa zwe bathu be shango. 7#Ezekiele 33:21Ipapo guma le nzi nkulu likapkhwanyiwa ngono babhayani bose bakatizha, bakabhuda mu nzi nkulu busiku nge nkoba upakati kwe makuma mabili apejo ne nnda wa mambo nenguba Bakhaladiya bakabe bakapoteleka nzi nkulu. Ngono bakatola zila yakalinga ku Araba. 8Koga babhayani be Bakhaladiya bakatatamila mambo bakabhatila Zedekiya mu lubala gwe Jerikho ngono babhayani babe bose bakabe bampalalila. 9Ipapo bakabhata mambo bakan'yisa kuna mambo we Bhabhiloni ku Ribila mu shango ye Hamati, ngono kaswika kan'tilika nlandu. 10Mambo we Bhabhiloni kabulaya bakololo ba Zedekiya mbeli kukwe, kakale kabulaya makulukota e Juda ku Ribila. 11#Ezekiele 12:13Wakakonyombola mesho a Zedekiya, kan'sunga nge ketani mu makumbo ngono mambo we Bhabhiloni kantolela ku Bhabhiloni kaswika kan'longa mu ng'umba ye busungwa kudzina zhuba le lufu gugwe.
Kukolomogwa kwe Ng'umba ye Ndzimu
(2 Bomambo 25:8-17)
12Mu mwedzi we bushanu mu zhuba le bugumi le mwedzi, hwuti gole le bugumi lina makole ali zhanalume (19) la Mambo Nebukadineza, mambo we Bhabhiloni, Nebuzaradani ntungamili we balindi wakabe eshinga mambo we Bhabhiloni kangina mu Jerusalema. 13#1 Bomambo 9:8Kapisa Ng'umba ya Yahwe ne ng'umba ye bumambo ne ng'umba dzose dze Jerusalema, ng'umba imwe ne imwe hwulu kaipisa. 14Babhayani bose bakabe bana ntungamili we balindi bakapkhwanya makuma wose kupoteleka Jerusalema. 15Nebuzaradani ntungamili we balindi katapa bathu bose bakabe bali bashayi kwazo nenge bathu bose bakabe basala mu nzi nkulu ne batizhi bakabe batizhila kuna mambo we Bhabhiloni ne nyambi dze kubezha. 16Koga Nebuzaradani ntungamili we balindi kasiya bamwe be bashayi kwazo mu shango kuti bashinge mu minda ye mizhambi ne mu minda imwe.
17 #
1 Bomambo 7:15-47
Phanda dze phangula dzakabe dzili dze Ng'umba ya Yahwe ne zwigadziko zwina makumbgwana ne Gungwa le phangula zwakabe zwili mu Ng'umba ya Yahwe, Bakhaladiya bakazwipkhwanya zwikabe zwiyenga ngono bakasengela phangula yose ku Bhabhiloni. 18Bakasenga kose ne hali ne maharawo ne zwidzimi zwe mavone ne zwikutili ne ndigwana dzinopisila motsha ne zwija zose zwe phangula zwakabe zwishingisiwa mu Ng'umba ye Ndzimu, 19ne zwikutili zwitukununu ne makambana e moto ne zwikutili ne hali ne zwigadziko zwe mavone ne ndigwana dzinopisila motsha ne ndilo hwulu, zose zwe zwipo zwe zwing'o zwakabe zwakathang'wa nge siliva.
20Phanda mbili dze phangula ne Gungwa, kusi kwalo lina zwifano zwe mikono zwili gumi lina zwibili zwakathamwa nge phangula ne zwigadziko zwina makumbgwana zwakabe zwathamwa ndi Mambo Solomoni ezwithamila Ng'umba ya Yahwe zwakabe zwili zwinjinji kwazwabe zwipinda zwiyelo. 21Phanda imwe ne imwe bulefu kuyenda pezhugwi gwakabe guli thambo dzili gumi lina zhanakadzi (18), tjapezhugwi kwe phanda kwakabe kuli bupabi gwe maboko ali gumi lina mabili (12), bupabi gwe phanda gwakabe guli zwinyala zwili zwinna phanda yakabe ili bgwambgwa koga tjemukati.
22Phanda yakabe ina nsholo wayo we phangula, pezhugwi kwe nsholo kwakabe kuli maboko ali mashanu, kwakalukanyiwa kuna dzipomegiranate dzose dzili dze phangula dzakanakisa pezhugwi kupoteleka. Phanda imwe yakabe yakanakisiwa koga sa ikoku, dzipomegiranate naidzo dzili muili. 23Dzipomegiranate dzakabe dziboneka dzakabe dzili makumi ali zhanalume dzina dzili tathatu (96). Dzipomegiranate dzose dzakabe dzakalukigwa kupoteleka dzakabe dzili zana (100).
Bajuta banoyisiwa ku Bhabhiloni
(2 Bomambo 25:18-21, 27-30)
24Ngono ntungamili we balindi katola Seraya mpirisiti nkulu na Zafaniya unotobela mpirisiti nkulu ne batjengeti batatu be lutombo, 25kudwa mu nzi nkulu wakatola nshingi wakabe ali nlauli we balume be ngwa ne balume bali kutendeka be bakumbuludzi ba mambo, bakabe bewang'wa mu nzi nkulu, ne nkwalili we nlauli we babhayani wakabe edanilila bathu be shango, ne balume bali makumi ali tathatu (60) be bathu be shango, bakabe bewang'wa mu nzi nkulu. 26Ngono Nebuzaradani ntungamili we balindi wakabatola kabayisa kuna mambo we Bhabhiloni ku Ribila. 27Mambo we Bhabhiloni kabaloba kababulaya ku Ribila mu shango ye Hamati. Ndizo Bajuta bakatolegwa kuzhe kwe shango yabo.
28Eyi imbalo ye bathu bakatogwa ndi Nebukadineza ebatapa: Mu gole le butendeka, kwakatogwa Bajuta bali zwiwulu zwili zwitatu zwina makumi mabili ana batatu (3 023), 29mu gole le bugumi lina ali zhanakadzi la Nebukadineza wakatapa kudwa mu Jerusalema bathu bali mazana ali zhanakadzi ana bali makumi matatu ana babili (832), 30mu gole le bumakumi mabili ana ali matatu la Nebukadineza, Nebuzaradani ntungamili we balindi wakatapa Bajuta bali mazana ali kutendeka ana bali makumi manna ana bashanu (745), bathu bose bose bakabe bali zwiwulu zwili zwinna zwina mazana ali tathatu (4 600).
Jehoyakini unosunungugwa
31Mu gole le bumakumi matatu ana kutendeka le kutapiwa kwa Jehoyakini mambo we Juda mu mwedzi we bugumi lina mibili mu zhuba le bugumi lina ali mashanu le mwedzi, Evilimerodaki mambo we Bhabhiloni mu gole laakaabe mambo, kamilidza nsholo wa Jehoyakini mambo we Juda ngono kan'dusa mu ng'umba ye busungwa, 32kalebeleka naye nge buthu ngono kampa tjigalo tjipezhugwi kwe tja bomambo bamwe bakabe banaye mu Bhabhiloni. 33Ndizo Jehoyakini kaambula zwiambalo zwizwe zwe busungwa. Ngono mazhuba wose e butjilo gugwe kaja zwibaka zose pa tafuli ya mambo, 34ngekwe ndipo iye wakabe epiwa ndipo tjibaka ne tjibaka kuyenda ne zwaanoshaka zhuba ne zhuba atjatjila kudzina zhuba le lufu gugwe.
Kalanga Bible © Bible Society of Botswana, 2008, 2018.