Jeremiya 37
37
Jeremiya mu ng'umba ye busungwa
1 #
2 Bomambo 24:17; 2 Zwiyitikalo 36:10 Zedekiya nkololo wa Josiya wakathamwa mambo ndi Nebukadineza mambo we Bhabhiloni ngono kabusa mu bumo gwa Koniya nkololo wa Jehoyakimu. 2Koga iye ne balanda babe kene bathu be shango bakateedza matama a Yahwe abakalebeleka nge Nlebesambeli Jeremiya.
3Mambo Zedekiya wakatuma Jehukali nkololo wa Shelemiya na Zefaniya we mpirisiti, nkololo wa Maaseya kuna Jeremiya nlebesambeli kunoti, “Utitembezelele kuna Yahwe Ndzimu wedu.”
4Ipapo Jeremiya wakabe atjakasununguka kuzha ne kuyenda yenda pakati kwe bathu ngoti wakabe asathu kalongwa mu ng'umba ye busungwa. 5Babhayani ba Faro bakabhuda mu Egipiti, kukati Bakhaladiya bakabe bakakomba Jerusalema behwa mbiko nge kwabo bakabhuda mu Jerusalema.
6Ipapo dama la Yahwe likazha kuna Jeremiya nlebesambeli liti, 7“Yahwe Ndzimu we Iziraela bakati: Budzani mambo we Juda iye wamutuma kuwondibhuzwa muti, ‘Babhayani ba Faro bazha kowomubhatsha banowobgwilila ku shango yabo, ku Egipiti. 8Ipapo Bakhaladiya banowoshanduka bakanginilila nzi nkulu iwoyu, banowotola bakaupisa.’ 9Yahwe bakati, ‘Musizwitjebele muti, “Nge malebeswa Bakhaladiya banowogala kule naswi,” abangake. 10Nenguba mungabe mungakunda babhayani bose be Bakhaladiya banogwa namwi kukasala balume koga bakakubala mmwe ne mmwe unobhuda mu nshasha uwe kawopisa nzi nkulu iwoyu nge moto.’ ”
11Ipapo kukati babhayani be Bakhaladiya basinobhuda mu Jerusalema ngekwe babhayani ba Faro, 12Jeremiya kabhuda mu Jerusalema kayenda ku shango ye Bhenjamini kunotola gobe lile le thundu mu bathu ikoku. 13Koga wakati eswika pa Nkoba we Bhenjamini ntungamili we balindi wakabe edang'wa Irija nkololo wa Shelemiya, nkololo wa Hananiya bakansunga bakabe beti, “Unoshakathobela ku Bakhaladiya.” 14Ngono Jeremiya kabe eti, “Ate malebeswa, anditopandukila ku Bakhaladiya.” Koga Irija kasinteedze kabhata Jeremiya kan'yisa ku makulukota. 15Makulukota kagwadzila moyo Jeremiya ngono bakanloba bakanlonga mu ng'umba ye busungwa, mu ng'umba ya Jonathani nkwalili, ngoti yakabe yathamwa ng'umba ye busungwa.
16Kukati Jeremiya asinongina mu ng'umba ye busungwa ikusi kusi, kagala ikoko mazhuba manjinji. 17Ipapo Mambo Zedekiya kati an'danigwe ngono kan'amutjila. Mambo kan'bhuzwisisa mu kwakasumbikala mu ng'umba iye kati, “Apa kuna dama linodwa kuna Yahwe kene?” Jeremiya kashandula eti, “Ee, liyapo.” Ipapo kabe eti, “Mowolongwa mu luboko gwe mambo we Bhabhiloni.” 18Jeremiya kakale kabe eti kuna Mambo Zedekiya, “Ndakamutjinyilani imwi ne balanda benyu kene bathu ibaba kunoyita kuti mundilonge mu ng'umba ye busungwa kene? 19Bangayi balebesambeli benyu bakamulebesela mbeli beti, ‘Mambo we Bhabhiloni aatobhayana namwi nenge shango iyeyi kene’? 20Koga ngwenu, tetshi wangu mambo, ndomukumbila nge kuzwiyisa pasi mbeli kwenyu, musindibgwilize ku ng'umba ya Jonathani nkwalili, pamwe swiyo ndingadwa ndinofila ko.”
21Mambo Zedekiya kadusa ndaulo kuti Jeremiya alongwe mu nsha we balindi kakale apiwe tjiwunga tjing'ompela ne zhuba tjinozha ne batengesi be zila kuswikila tjiwunga mu nzi nkulu tjapela. Ndizo Jeremiya kagala mu nsha we balindi.
Kalanga Bible © Bible Society of Botswana, 2008, 2018.