Jeremiya 28
28
Nlebesambeli we manyepkhwa Hananiya
1 #
2 Bomambo 24:18-20; 2 Zwiyitikalo 36:11-13 Mu gole ilo zwalo, mukutangisa kwe mbuso wa Zedekiya mambo we Juda, mu mwedzi we bushanu we gole le bunna, Hananiya nkololo wa Azuri, nlebesambeli we ku Gibiyoni, kalebeleka nami mu Ng'umba ya Yahwe, mbeli kwe bapirisiti ne bathu bose eti, 2“Yahwe Masimbawose Ndzimu we Iziraela bakati, ‘Ndavuna jokwi la mambo we Bhabhiloni. 3Mu makole matatu ndowobuza zwija zose zwe Ng'umba ya Yahwe zwakabe zwatogwa ndi Nebukadineza mambo ezwiyisa ku Bhabhiloni, ndowozwibuzila pathu ipapa. 4Kakale ndobuzila pathu ipapa Jekoniya nkololo wa Jehoyakimu, mambo we Juda ne batapiwa bose bakadwa mu Juda beyenda ku Bhabhiloni, kojalo Yahwe, ngoti ndowo vuna jokwi le mambo we Bhabhiloni.’ ” 5Ipapo Nlebesambeli Jeremiya kalebeleka na Hananiya we nlebesambeli mbeli kwe bapirisiti ne bathu bose bakabe beshinga mu ng'umba ya Yahwe. 6Nlebesambeli Jeremiya wakati, “Ngakujalo! Atshene Yahwe bangathama sa ikoku, ungati Yahwe bangathama kuti matama awalebeselambeli asi wile pasi, ngono babuzile pathu ipapa kudwa ku Bhabhiloni zwija zwe Ng'umba ya Yahwe ne batapiwa bose. 7Ne nguba kwakajalo, teedza tjandinowokubudza mu zebe dzidzo ne mu zebe dze bathu bose bakateedza. 8Balebesambeli bakabeyapo ntolo tjose bakalebelambeli mbeli kuko kose nami bakalebela mbeli ngekwe ngwa ne bhamba ne bugwele zwinowolingisana ne shango njinji nenge mibuso mikulu. 9Koga nlebesambeli unolebelambeli mbakiso unoamutjigwa ali iye dumbu watumwa ndi Yahwe ha koga bulebesambeli gugwe gwashingikala.”
10Ipapo Nlebesambeli Hananiya kadelusa jokwi mu ntshibha wa Jeremiya nlebesambeli ngono kalivuna, 11Hananiya kalebeleka mbeli kwe bathu bose eti, “Yahwe bakati, ‘Ne kwakajalo ndowovuna jokwi la Nebukadineza mambo we Bhabhiloni ndilidusa mu ntshibha we zwitjaba zose mu makole mabili koga.’ ” Ngono Jeremiya nlebesambeli kazwiyendigwa.
12Kwakati shule Nlebesambeli Hananiya asina kudusa jokwe mu ntshibha wa Jeremiya nlebesambeli, dama la Yahwe likazha kuna Jeremiya liti, 13“Yenda unodwa Hananiya uti Yahwe bakati, ‘Wavuna jokwi le lukuni ngono mu bumo gwalo unowothama jokwi le butale. 14Ngoti Yahwe Masimbawose, Ndzimu we Iziraela bakati, “Ndakabiga jokwi ye butale mu ntshibha we zwitjaba zose izwezwi kuti zwishingile Nebukadineza mambo we Bhabhiloni ngono zowon'shingila. Kakale ndowompa simba kulaula phuka dzose dze shango.” ’ ”
15Ipapo Nlebesambeli Jeremiya kadwa Nlebesambeli Hananiya eti, “Teedza Hananiya, Yahwe abazokutuma, ngono kakale wakathama bathu ibaba kuti bagalebgwe manyepkhwa. 16Ndizo wali Yahwe bakati, ‘Bona, ndowokudusa mu shango. Mu gole ilele zwalo unowofa ngoti wakasumikila bupanduki ngekwa Yahwe.’ ”
17Mu gole ilelo zwalo mu mwedzi we butendeka Nlebesambeli Hananiya kafa.
Kalanga Bible © Bible Society of Botswana, 2008, 2018.