Jeremiya 22
22
Ngekwe mambo we Juda
1Yahwe bakati, “Delukila ku ng'umba ya mambo we Juda ikoko ulebe dama yeli, 2uti, ‘Ihwa dama la Yahwe iwe mambo we Juda, iwe ugele mu tjigalo tje bumambo tja Dafite, iwe ne balanda babo ne bathu babo banongina ne mikoba iyeyi. 3Yahwe bakati, “Shingani tjakatambunuka ne ndulamo musunungule iye watolegwa mu luboko gwe ntshambilidzi, musitange kene mukamusilana zhoba ne ntaya kene siyang'wa kene tjilikadzi kene kutebula lopa lisina nlandu pathu ipapa. 4Ngoti nge malebeswa amubhulutana dama ileli bomambo banogala mu tjigalo tje bumambo tja Dafite banowozha bakangina nge mikoba ye ng'umba iyeyi bakatatha koloyi dze ngwa ne mbizi, ibo ne balanda babo ne bathu babo. 5#Matewu 23:28; Luke 13:35Koga ha musingabhulutane matama angu, ndotuna nge kwangu, koleba Yahwe, kuti ng'umba iyeyi inowobe dongo.” 6Ngoti Yahwe bakati ngekwe ng'umba ye Juda,
“ ‘Monga Giliyadi kundili,
monga thongoma ye matombo e Lebanoni,
ngono nge lebeswa ndowomuthama tjilambanyika,
nzi nkulu usina bagali.
7Ndowolulwamisa bakolomoli kubhayana namwi,
mmwe ne mmwe akabhata thumo lile,
banowotema misida yenyu yakanaka,
ngono banoilashila mu moto.
8“ ‘Zwitjaba zwinjinji zowopinda ne pa nzi nkulu iwoyu ngono nthu mmwe ne mmwe unowoti ku mbakidzani uwe, “Ini Yahwe bathama kwakajali ngekwe nzi nkulu iwoyu?” 9Ngono banowodabila beti, “Nge kuti bakafupatila Tjidumano tja Yahwe Ndzimu wabo, bakanamata midzimu ipoga kakale bakaishingila.” ’ ”
10Musililile nfi,
kene kuli kube mu buyendasi ngekukwe,
koga lililani kwazo iye unoyenda,
ngoti aatjowobuya,
kuwobona shango ya kanyi kukwe.
11 #
2 Bomambo 23:31-34; 2 Zwiyitikalo 36:1-4 Ngoti Yahwe bakati ngekwa Shalumu nkololo wa Josiya mambo we Juda, iye wakabusa mu bumo gwa Josiya tate babe ibo bakadwa pathu ipapa bakati, “Aatjowobuya, 12ngono unonofila mu bugalo gwabaka ntapila ko, aatjobona shango iyeyi kakale.”
13“Wapalala iye unozwibakila ng'umba ngoshaya ndulamo,
ne ng'umbana dzidze dzipezhugwi nge kusatambunuka,
ethama kuti mbakidzani ashingile suli,
kudwapo asingampe ndipo iye,
14iye unoti, ‘Ndowozwibakila ng'umba hwuluhwulu,
ina ng'umbana dzi pezhugwi dzakazhuka,’
ndizo kaithamila mafesitere,
ana makwasayile e misida,
kaidzulula nge bushaba.
15“Apa unozwidwa uti u mambo
kube ne misida minjinji kene?
Apa tate babo bakabe basingaje bakang'wa,
bakathama tjakatambunuka nenge ndulamo kene?
Ngono zose zwikabalulwamila.
16Bakasumikilisa ndebo ye bashayi ne basheti,
ngono kukabe kwakalulwama.
Apa ate ili iko kundiziba ikoku kene?”
Koleba Yahwe.
17“Koga una mesho ne nkumbulo,
wekushaba zwe bupitipiti,
wekutebula malopa asina nlandu,
ne kutshambilidza ne ngwa.”
18 #
2 Bomambo 23:36—24:6; 2 Zwiyitikalo 36:5-7 Ndizo Yahwe bakati ngekwa Jehoyakimu nkololo wa Josiya mambo we Juda,
“Basingon'lilila beti,
‘Yee mme wee hazwadzi yangu,’
Basingon'lilila beti,
‘Tetshi wangu kene bushe gwangu!’
19Unowobiganyiwa se kunotshigwa donki
banokukweba bakanokulashila seli kwe mikoba ye Jerusalema.”
20“Tathila ku Lebanoni umimile,
umilidze hwi lilo mu Bhashani,
ulile kudwa mu matombo e Abarimu,
ngoti badiwa babo bose bakolomogwa.
21Ndakalebeleka nawe utjakabhudilila,
koga wakati, ‘Anditowoteedza!’
Hwoku kwagala kuli mpanga uwo kudwa mu butjetjana gugo,
auzotongofa ukanditeedza.
22Phepo inowotutudzila balisi babo kutjena,
badiwa babo banowotapiwa,
ipapo unowobhakhwa ne shoni ukalengudzika,
ngekwe bubi gugo gose.
23Imwi bagali be Lebanoni,
bakazwibakila mashaka pakati kwe misida,
mowogomela tjini ha mbambo dzimubhaya,
zwibhayo zwikanga zwe nkadzi unotshibama.”
24 #
2 Bomambo 24:8-15; 2 Zwiyitikalo 36:9, 10 “Ha nditjatjila,” koleba Yahwe, “nenguba Koniya nkololo wa Jehoyakimu ne mambo we Juda bangabe bali ring'i mu luboko gwangu gwe luji, ndabe ndowokupalulanya, 25ha kulonga mu maboko a ibabo banoshakana ne butjilo gugo, mu maboko a ibabo banotja nenge mu luboko gwa Nebukadineza mambo we Bhabhiloni ne mu maboko e Bakhaladiya. 26Ndowomulashila ku shango ipoga yamusaka zwaligwa muili iwe na mmeyabo bakakuzwala ngono mowonofila ko. 27Amutjowobgwilila ku shango yamunoyemula kubgwilila kuili.”
28Apa nlume iwoyu ndi Koniya wakalengudzika, hali yakapkhwanyika,
tjija tjisina ntjengeti kene?
Ini iye ne bana babe baposegwa bakalashigwa,
ku shango yatisinga zibe kene?
29Iwe shango, shango, shango,
ihwa dama la Yahwe!
30Yahwe balebeleka bakati,
“Kwalani ngekwe nlume iwoyu,
muti, aana bana, nlume usingake kabhudilila mu butjilo gugwe,
ngono akuna we bana babe unowobhudilila,
akuna wabo unowogala tjigalo tje bumambo tja Dafite,
kene kabusa mu Juda.”
Kalanga Bible © Bible Society of Botswana, 2008, 2018.