Basumikilisi 11
11
1Jefutha we N'giliyadi wakabe ali mbhayani wakasima. Tate babe bakabe bali Giliyadi, mmebabe bakabe bali fukula. 2Nkadzi wa Giliyadi kanzwalila bakololo, ngono kwakati bakololo be nkadzi uwe batjikula, bakatata Jefutha bakandwa bakati, “Akuna thaka yaunowowana mu nsha wedu, ngoti u nkololo we nkadzi upoga.” 3Ndizo Jefutha katizha mu bana batate babe, kanogala mu shango ye Tobi. Ngono gupo le batoleli likankubunganila likansala shule liyenda litolela bathu naye. 4Kwakati shule kwe tjibaka Baamoni bakanogwa ne Baiziraela. 5Kwakati Baamoni begwa ne Baiziraela, bakulu be Giliyadi bakanodana Jefutha ku shango ye Tobi. 6Bakandwa beti, “Buya ube ntungamili wedu, ndizo tigwe ne Baamoni.” 7Koga Jefutha kadwa bakulu be Giliyadi kati, “Apa amuzondibenga, mukanditata mu ng'umba ya tate bangu kene? Ini matjizha kundili matjibe mu kudziyidzika kene?” 8Ngono bakulu be Giliyadi bakadwa Jefutha bakati, “Ndizo tashandukila kukuli ngwenu, kuti uyende naswi tinogwa ne Baamoni ube nsholo wedu mu bagali bose be Giliyadi.” 9Ngono Jefutha kadwa bakulu be Giliyadi kati, “Ha mundibgwiliza kanyi kuti ndinogwa ne Baamoni ngono Yahwe bebendipa ibo ndibakunda, ndowobe nsholo wenyu kene?” 10Bakulu be Giliyadi bakashandula beti, “Yahwe ndibo ntendeki wedu, towothama sekwa unoleba.” 11Ndizo Jefutha kayenda ne bakulu be Giliyadi, ngono bathu bakanthama nsholo ne nge ntungamili wabo. Jefutha kaleba matama awe wose mbeli kwa Yahwe ku Mizipha.
12Ipapo Jefutha katuma batumwa kuna mambo we Baamoni kati, “Uneni naswi kwaungatinginilila mu shango yedu kene?” 13Mambo we Amoni kashandula batumwa ba Jefutha eti, “Kwakati Baiziraela bedwa ku Egipiti, bakatola shango yangu kudwa ku Arinoni kunoti ku Jabhoki ne kunoti ku Jorodani, ngwenu tjindibgwilizilani iyo nge mbakiso.”
14Ngono Jefutha katuma batumwa kakale kuna mambo we Amoni, 15kandwa kati, “Tjinoleba Jefutha ndiyetji, Iziraela aizotola shango ye Moabu kene ye Amoni, 16koga bakati bedwa ku Egipiti, Baiziraela bakapalama tjilambanyika kunoti ku Gungwa Shaba, bakaswika ku Kadeshi. 17#Mbalo 20:14-21Baiziraela bakatuma batumwa kuna mambo we Baedomu kati, ‘Tokumbila palama shango yenyu,’ koga mambo we Edomu kaside hwa. Ngono bakatumila kakale kuna mambo we Moabu koga kasidume. Ndizo Baiziraela bakagala ku Kadeshi. 18#Mbalo 21:4Ngono bakayenda mu tjilambanyika, bepoteleka shango ye Baedomu ne shango ye Bamoabu, pakapinda tjekubhezhuba kwe shango ye Moabu, bakakotokela seli ye Arinoni, koga abazongina mu ntuthu we Moabu, ngoti Arinoni yakabe ili ngathu we Moabu.
19 #
Mbalo 21:21-24
“Ipapo Baiziraela bakatuma batumwa kuna Sihoni mambo we Baamoni wakabe ebusa mu Heshibhoni, ngono bakandwa bakati, ‘Tokumbila palama mu shango iyo toyenda kuna yedu.’ 20Koga Sihoni kasigalebgwe Baiziraela ku palama ntuthu uwe, ndizo Sihoni kakubunganya bathu babe bose ngono kakotokela ku Jahazi ngono kagwa ne Baiziraela. 21Ngono Yahwe Ndzimu we Iziraela kalonga Sihoni ne bathu babe bose mu maboko e Baiziraela ngono bakaba kunda. Ndizo Iziraela ikatola shango yose ye Baamori bakabe gala mu shango iyeyo. 22Bakaitapa yose kudwa ku Arinoni kunoti ku Jabhoki ne kudwa ku tjilambanyika kunoti ku Jorodani.
23“Ngono ngwenu se Yahwe Ndzimu we Iziraela bakatata Baamori mbeli kwe bathu babo Baiziraela, apa unafanilo dzekuitola kene? 24Apa autotola tjaunopiwa na Khemoshi ndzimu uwo kene? Naswibo bo tjatinopiwa na Yahwe Ndzimu wedu towotjithuwa. 25#Mbalo 22:1-6Apa moyita pana Bhalaki nkololo wa Zipori mambo we Moabu kene? Apa wakatongomusilana zhoba ne kukweba kwebana ne Baiziraela kene? 26Kwe makole ali mazana matatu (300) Baiziraela begala mu Heshibhoni ne mizana yayo ne mu Aruwa ne mizana yayo ne mizi yose imu tjekelo dze Arinoni. Ini musakatitolela iyo nge tjibaka itjetjo? 27Imi andizokutjinyila, koga iwe ndiwe unonditjinyila ngothama ngwa nami. Yahwe nsumikilisi ngabasumikilise pakati kwe bathu be Iziraela ne bathu be Amoni nasi.”
28Koga mambo we Amoni kasibhulutane matama aakatumiligwa ndi Jefutha.
29Ngono Meya ya Yahwe ikazha muna Jefutha. Kapalama Giliyadi ne Manase, kapindila ku Mizipha we Giliyadi, kudwa pa Mizipha kapindila ku Baamoni. 30Ngono Jefutha katuna kuna Yahwe kati, “Ha mungalonga Baamoni mu maboko angu, 31ipapo mmwe ne mmwe unowozha edwa mu ng'umba yangu kundishanganidza ha ndashanduka nge mbakiso ku Baamoni kowobe ba Yahwe, ngono ndowobadusa se tjibhayilo tjinopisiwa.” 32Ndizo Jefutha katjulukila ku Baamoni kugwa nami, ngono Yahwe bakabalonga mu maboko bo. 33Kabakunda kudwa ku Aruwa kunoti ku Miniti, katapa mizi ili makumi mabili (20), ne kunoti tjose ku Abelikeramimi, kwakabe kukunda kukulu. Ndizo Baamoni bakayisiwa pasi kwe Baiziraela.
Nkololokadzi wa Jefutha
34Kwakati Jefutha azha ku nzi uwe ku Mizipha, bonani, nkololokadzi uwe kabhuda ku nshanganidza ne dzithamborini ne njimbo. Kwakabe kuli iye yega mwana uwe, kuzhe kukwe wakabe asina nkololo kene nkololokadzi. 35#Mbalo 30:2Wakati embona kapalula zwiambalo zwizwe kati, “Aa, nkololokadzi wangu, wandiyisa pasi seni, ini ungadizhisila mathatha mangapa ngobe ndakazhula nlomo, ndikatuna kuna Yahwe ngono andingatjinyulule.”
36Ngono nkololokadzi uwe kashandula eti, “Tate, ha makazhula nlomo mukatuna kuna Yahwe, thamani tjamakandigadzabgwe, ngoti Yahwe batjimubgwilizila mu zwita zwenyu Baamoni.” 37Ngono kadwa tate babe eti, “Ndokumbila mundithamile etji, ‘Mundipe mimwedzi mibili ndi yende ku matombo ndinolilila buanadi gwangu, imi ne bazwalani bangu.’ ”
38Ngono tate babe bakati, “Yenda.” Ngono bakanletja kayenda kwe mimwedzi mibili, ngono kayenda ne bazwalani babe bakanolilila buanadi gugwe ku matombo. 39Shule kwe mimwedzi mibili kabgwilila kuna tate babe, bakanthamila kuyendidzana nge tuna kwabo. Wakabe asathu kaziba balume. Ngono kukabe tjilenje, 40kuti gole ne gole mwanadi mmwe ne mmwe mu Iziraela unoyenda kwe mazhuba ali makumi manna (40) kuli kunokumbula nkololokadzi wa Jefutha we Giliyadi.
Currently Selected:
Basumikilisi 11: KBTP
Highlight
Copy
Compare
Share
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
