Isaya 56
56
Jidzo le banji
1Yahwe bakati,
“Londolodzani kutambunuka,
muthame ndulamo
ngoti jidzo langu labe pejo
ne kusunungula kwangu kowozumbunugwa.
2Kwakakombolegwa nthu unothama ikoku,
nkololo we nthu unokubhatisisa,
iye unowolondolodza Sabata asingaitshambe nge makumbo,
ezwidziba kuthama bubi.”
3Ntaya wakazwibhatshanya na Yahwe asitongoti,
“Nge malebeswa Yahwe banowondidusa mu bathu babo.”
Ngomwa isitongoti,
“Bona imi ndi nti wakawoma koga.”
4Ngoti tjinoleba Yahwe ndietji,
“Ngomwa dzinolondolodza bo Sabata bangu,
beshalula kuthama tjinondishathisa
bebhatilila mu tjidumano tjangu.
5Mu Ng'umba yangu mukati kwe makuma angu
ndowobapa ikumbuludzo
tjinoyita pa bakololo ne bakololokadzi.
Ndowobapa zina lisingapele,
lisingake likadusiwa.
6Bataya banozwibhatshanya na Yahwe,
kushingila Yahwe ne kuda zina la Yahwe,
kube balanda babo,
bose ibabo banolondolodza Sabata basingalitshambe nge makumbo
bebhatilila mu tjidumano tjangu,
7 #
Matewu 21:13; Mako 11:17; Luke 19:46 ibaba ndowobazhisa kudombo langu lakayengemala,
ndowobathama kuti bashathe mu Ng'umba yangu ye ntembezelo,
zwibhayilo zwabo zwinopisiwa ne zwipo zwabo
zowoamutjigwa mu tjibeso tjinopisigwa zwibhayilo,
ngoti ng'umba yangu inowodang'wa ng'umba ye ntembezelo
ku zwitjaba zose.
8She Yahwe
ibo banokubunganya balashiwa be Iziraela bakati,
Nditjawokubunganyila bamwe ku bali,
kuzhe kwa ibaba bakakubungana kale.”
Batungamili be Iziraela banobong'wa nlandu
9Izhani mose imwi phuka dze shango,
mose imwi zwibandana zwe shango zwimu ishaka,
izhani muje.
10Balindili be Iziraela mapofu,
bose koga abana zibo,
bose i mbgwa dze mbebebe
dzisingake dzikabukula,
dzinowolota dzililele pasi
dzinoda kuizela.
11I mbgwa dzinopupa,
adzitotongoguta.
Balisi basingahwisise,
bose bakapambukila mu zila dzabo,
mmwe ne mmwe wakalinga mbuyilo iye.
12Banoti, “Izhani, tishake nkumbi we zhambi.
Ngati ng'weni busukwa tigute.
Mangwana kowofanana na nasi,
kowobe kuli kukulu kupindisa.”
Kalanga Bible © Bible Society of Botswana, 2008, 2018.