Isaya 5
5
Lumbo gwe Nzhambi
1 #
Matewu 21:33; Mako 12:1; Luke 20:9 Ngwenu ndowombila n'diwa wangu
ngekwe nnda uwe we mizhambi:
N'diwa wangu wakabe ana nnda we mizhambi
pezhugwi kwe duthu pana mavu akanaka.
2Wakawutsha kadusa mabgwe;
kadzwala mizhambi yakanaka muuli.
Kabaka ngadzi pakati kwawo,
kabaka ne panoswinigwa nkumbi we zhambi muuli.
Kaumilila kuzwala zhambi
koga kukazwagwa zhambi dzinoshababa.
3Ndizo wali imwi bagali be Jerusalema
namwi bathu be Juda,
sumikilisani pakati kwangu
ne nnda wangu we mizhambi.
4Ini tjimwe tjingabe tjakathamigwa nnda wangu we mizhambi
tjandisakathama kene?
Ndabe ndakalinga kuwana zhambi dzakanaka
koga ini wakazwala zhambi dzinoshababa?
5Ndizo wali ndowomubudza
tjandinowothamila nnda wangu we mizhambi.
Ndowodusa lukuta gwawo
ngono unowobe mafulilo,
ndowoliga guma lawo
ngono unowotshambatshambiwa.
6Ndowouletjedza ukabe gula,
autowosunuligwa kene kuli kuushakulila,
unowozhala kungubo ne mihwa.
Ndowodziba makole
kasinise vula muuli.
7Ngoti nnda we mizhambi wa Yahwe Masimbawose
ing'umba ye Iziraela,
bathu be Juda
tjidzwalo tjabo tjinobashathisa.
Yahwe bakabe beda kubona malebeswa
koga bakabona kutebuka kwe lopa.
Be yemula kubona ndulamo
koga bakabona tjililo tje buyendasi.
8Yee mme wee! Ibabo banopaphidza ng'umba dzabo nge dzimwe ng'umba
bepaphidza minda nge mimwe minda
kuswikila kusala kusina bugalo gwe mmwe,
mube mugala mulimoga mu shango.
9Yahwe Masimbawose bakalebeleka beti,
“Nge malebeswa ng'umba idzedzi hwuluhwulu dzowobe matongo,
dzose ng'umba idzedzi whuluwhulu dzowosala dzisina bagali.
10Ndima dzili gumi dze mizhambi dzowobuza galoni dzili tathatu,
saka le mbewu likabuza sakana le mathunde.”
11Yee mme wee! Bapalala ibabo banobindukila zwing'o,
ibabo banoyedzisa kuswikila pakati kwe busiku,
kuswikila balaladza.
12Mu mizano yabo bana dende ne tjilidzo tje misungo ili gumi
ne thamborini nyele ne nkumbi we zhambi,
koga abana hanya nge mishingo ya Yahwe,
kene kubona mishingo ye maboko abo.
13Ndizo wali bathu bangu banotapiwa ngekusawisisa.
Bana mamo mu bali banowofa nge zhala,
banjinji banowoma nge nyota.
14Ndizo wali ikumbu tjomidza mate
tjitalabudzika kusingapele.
Bakudziwa be Jerusalema ne bunjinji gumuili banodelukila mutjili
kang'ompela ne bakashatha muili.
15Nthu unoisiwa pasi,
ne banozwikudza banoyisiwa pasi.
16Koga Yahwe Masimbawose banokudziwa ngo sumikilisa kwabo kwakatambunuka,
Ndzimu Wakayengemala unolakidza kuyengemala kwawo nge ndulamo yawo.
17Ipapo pkhwizana dzowofula sedzimu mafulo adzo,
zwakakodziwa ne mbudzana dzowofula mu matongo e bafumi.
18Yee mme wee! Bapalala ibabo banokweba zwibi zwabo nge misungo ye manyepkhwa,
bekweba bubi gwabo se bakakweba koloyi nge mitjili.
19Ibabo banoti, “Ndzimu ngaulibilidze,
ngaulibilidze kuthama nshingo wawo
kuti tiubone.
Ngaizhe, ndongoloso ye Wakayengemala we Iziraela ngaizhe,
kuti tiizibe.”
20Yee mme wee! Bapalala ibabo banodana tjakabipa beti tjakanaka,
bedana tjakanaka beti tjakabipa,
banotola zhalima bakalithama tjedza
bakatola tjedza bakatjithama zhalima,
banobiga tjinobaba
mu bumo gwe tjinozipa, tjinozipa mu bumo gwe tjinobaba.
21Yee mme wee! Bapalala ibabo bakatjenjela mu mesho abo,
beti batjenjedu nge kubona kwabo.
22Yee mme wee! Bapalala ibabo banozibika nge kung'wa nkumbi we zhambi,
nyambi mu kushanganya mikumbi.
23Mosunungula nthu una nlandu nge tjizwimba nlomo,
usina nlandu kalashikigwa nge fanilo dzidze.
24Ndizo wali se moto upisa mashanga
ne bushwa gulota mu nthuto,
saikoko midzi yabo inowobola
ne maluba abo anowuluka se hwuluba,
nge kuti bakalamba nlayo wa Yahwe Masimbawose,
bakalengudza dama le Wakayengemala we Iziraela.
25Ndizo wali Yahwe bakagwadzila moyo bathu babo,
ngono bamilidza luboko gwabo bakabaloba.
Matombo akazunguzika,
ne zwitumbu zwabo zonga malala mu dzizila.
Nenguba kwakajalo kugwadza moyo kwabo akuzopela,
luboko gwabo gutjakamilika.
26Yahwe banowomilidzila zwitjaba zwikule tjilakidzo,
banoweba nge nlidzo ibabo baku phelelo dze shango.
Ibile ababa baswika tjinyolotjo,
baswika belibilidza.
27Akuna wabo unonyala kene unotshatsharika.
Akuna wabo unotshumwayila kene unoyizela.
Mimwandabula yabo akuna wakademba mu thunji
ne shangu dzabo akuna ina ntjili wakathubuka.
28Misebe yabo inopitsha
ne matati abo akalulwamila kuposa.
Thozo dze mbizi dzabo dzakasima se bgwe
ne makumbgwana e koloyi dzabo dze ngwa anopoteleka se tjampupudze.
29Tjibombo tjabo tjonga tje shumba,
banobomba se shumba tjetjana,
dzobomba ha dzibhata tjadzinovima,
dzotjisenga kusina tjingadzitolela.
30Mu zhuba ilelo, dzowoubombela
kukanga kuwona kwe gungwa.
Ngono kowoti nthu elinga shango,
unowobona zhalima ne buyendasi,
tjedza tjowomidziwa nge zhalima le makole.
Kalanga Bible © Bible Society of Botswana, 2008, 2018.