Isaya 42
42
Nlanda wa Yahwe
1 #
Matewu 3:17; 17:5; Mako 1:11; Luke 3:22; 9:35 #
Matewu 12:18-21
Bonani nlanda wangu wandinotabila,
nshalugwa wangu, iye unondishathisa,
ndalonga meya yangu mu nli,
unowozhisa kutambunuka mu zwitjaba.
2Aatowohwika emimila
kene elebeleka nge hwi lipezhugwi mu zila.
3Lushanga gwakazaruka aatowoguvuna,
ne luvone gunobonyabonya aatowogudzima,
nge kugalikamoyo unowozhisa kutambunuka.
4Haangatimbame kene kanyala moyo
kuswikila a zhisa kutambunuka mu shango,
ne shango dzimu tjekelo dze gungwa dzimilile nlayo uwe.
5 #
Mishingo 17:24, 25 Ndzimu, Yahwe, ibo bakabumba kudzimu bakakutambunudza,
ibo bakawala shango ne tjimwe ne tjimwe tjinodwa muili,
ibo banopa bathu bamu ili meya ye kufema
ne butjilo kuna ibabo banoyendayenda muili bakati,
6 #
Isaya 49:6; Luke 2:32; Mishingo 13:47; 26:23 “Imi ndimi Yahwe, ndakakudana mu ndulamo,
ndakakubhata nge luboko akulondolodza,
ndakakupa bathu se tjidumano,
uli tjedza ku zwitjaba,
7kuzhula mesho akapofupala,
kudusa basungwa mu ng'umba ye busungwa,
kubadusa mu zhalima ibabo bagele mu lili.
8“Ndimi Yahwe, ndilo zina langu ileli,
gudzo langu andina wandinolipa kene dendo langu andingalipe zwifano.
9Bona, zwithu zwandakaleba zwakabepo,
ngono ngwenu ndoleba zwithu zwitshwa zwisathu zwikashingikala,
ndomubudza ngekwazo.”
Lumbo gunokudza Yahwe
10Mbilani Yahwe lumbo lutshwa,
dendo labo ngalidwe ku bhelelo le shango,
imwi banodelukila ku gungwa na zose zwimu lili,
ne shango dzimu tjekelo dze gungwa ne bagali badzo.
11Tjilambanyika ne mizi yatjo ngazwimilidze hwi lazo,
ne mizana kwakabaka Kedari,
bagali be Sela ngabambe nge kushatha,
ngabambe nge mahwi apezhugwi kudwa pezhugwi kwe matombo.
12Ngabakudze Yahwe,
ne dendo labo ngalihwike mu shango dzimu tjekelo dze gungwa.
13Yahwe banobhuda betshamba se nlume wakasima,
betshamba se mbhayani bezhala bushongola,
banomilidza hwi,
bemimila mima ye ngwa,
belakidza simba linokunda zwita zwabo.
14Ndakanyalala kwe tjibaka tjilefu,
ndakati adzikama azwidziba,
koga ngwenu ndowolila se nkadzi ali mu zwibhayo,
ndowogomela afemeleka.
15Ndowokolomodza matombo ne matuthu,
ndowomesa zose zwinomela pezhugwi kwawo,
ndowoshandula njizi dzikabe zwigwizi
ne madziba ndowopkhwisa.
16Ndowotungamilila mapofu mu zila dzabasakatongo ziba,
mu zijana dzabasakatongo ziba ndowobakweba.
Ndowoshandula zhalima li mbeli kwabo likabe tjedza,
pasi pasakalizalizana ndowopalizalizanya.
Ndizo zwithu zwandinowothama izwezwi,
ngono anditowobasiya boga.
17Ibabo banogalabgwe mu midzimu yakabezhiwa,
banodwa zwifano zwakabezhiwa beti,
“Imwi mu midzimu yedu.”
Banowoshandusigwa shule bakabhakhwa nge shoni kwazo.
18Hwililani imwi mabhubuzebe,
namwi mapofu lingani mubone.
19Bhofu ndiani ha asi nlanda wangu,
kene ndiani ubhofu se ntumwa wangu wandinotuma kene?
Ndiani ubhofu saiwoyu wakazwipa mu ndili kene,
kene ubhofu se nlanda wa Yahwe kene?
20Wakabona zwinjinji,
koga ukazwishaila hanya,
zebe dzidzo dzakazhuka,
koga akuna tjaunohwa.
21Kwakashathisa Yahwe ngekwe ndulamo yabo
kuti bakudze nlayo wabo baumilidze.
22Koga aba bathu bakatapigwa bakatolegwa,
bakateyiwa nge mapuzhu bakawila muali
bakasumbikiwa mu ng'umba dze busungwa,
babe batapiwa basina ungati, “Ngababgwiliziwe.”
23Ndiani wenyu ungateedza ikoku,
kene unoyela njele tjinozha?
24Ndiani wakalonga Jakubo mu kutapiwa,
ndiani wakalonga Iziraela mu maboko e batoleli?
Apa ate bali Yahwe, ibo batakatjinyila kene?
Ibo batakalamba kuyenda mu zila dzabo,
ne nlayo wabo tilamba kuulondolodza kene?
25Ndizo wali Yahwe bakabagwadzila moyo,
nge bushongola gwe ngwa.
Bushongola gukathuta mu bali se moto,
nenguba kwakajalo abazohwisisa,
gukabapisa se moto,
koga bakasibe ne hanya nako.
Kalanga Bible © Bible Society of Botswana, 2008, 2018.