Isaya 39
39
Thumwa dzakadwa ku Bhabhiloni
(2 Bomambo 20:12-19)
1Mu tjibaka itjetjo Merodakhi Baladani nkololo wa Baladani mambo we Bhabhiloni katuma thumwa kunopa Hezekiya hwalo ne zwipo ngoti wakabe ahwa kuti wakabe agwala ngono atjipola. 2Hezekiya kabaamutjila ngono kabalakidza dula le fumwa iye. Kabalakidza siliva ne golide ne zwipayisi ne mafuta e themba ipezhugwi. Kabalakidza ne zwibhayano zwizwe zose, kabalakidza kose kwakabe kuli mu mbiganyilo dzidze dzose. Akuna tjimwe Hezekiya tjaakasiya mu ng'umba iye kene mu bushe gugwe asabalakidza itjo. 3Ipapo nlebesambeli Isaya kazha kuna Mambo Hezekiya kan'dwa kati, “Balume ibaba badwa ngayi? Bakatini?” Hezekiya kadabila eti, “Bazha kundili bedwa ku shango ikule, shango ye Bhabhiloni.” 4Isaya kabhuzwa eti, “Babonani mu ng'umba iyo?” Hezekiya kadabila eti, “Babona kose kungabong'wa mu ng'umba yangu, akuna tjimu matula angu tjandisabalakidza.”
5Ipapo Isaya kabe eti kuna Hezekiya, “Ihwa kuti Yahwe Masimbawose bakatini? 6Bona, anowozha mazhuba anowoti zose zwimu ng'umba iyo, naizo zose zwetjinga zwakakubunganyiwa ndi botate babo mu matula kuswikila nasi zwikasengegwa ku Bhabhiloni, akuna tjinowosala, Yahwe bakajalo. 7#Daniyele 1:1-7; 2 Bomambo 24:10-16; 2 Zwiyitikalo 36:10Bamwe be bana babo bawakazwala banowotapiwa, banowobe ngomwa mu ng'umba ye bumambo ya mambo we Bhabhiloni.” 8Ipapo Hezekiya kabe eti kuna Isaya, “Dama la Yahwe lawaleba lakalulwama.” Wakajalo ngoti wakakumbula eti, “Mbakiso ne mbakililo zowobe zwilipo muna angu mazhuba.”
Kalanga Bible © Bible Society of Botswana, 2008, 2018.