Isaya 37
37
Mambo unokumbila ikumbuludzo tja Isaya
(2 Bomambo 19:1-7)
1Mambo Hezekiya wakati ehwa mbiko iyeyi, kapalula zwiambalo zwizwe, kaambala jila le saka ngono kanongina mu Ng'umba ya Yahwe. 2Ngono katuma Eliyakimu, iye wakabe ali ntjengeti we ng'umba ye bumambo ana Shebina nkwalili ne bapirisiti bakulu ku nlebesambeli Isaya nkololo wa Amozi, bose bakabe bakaambala matyila e saka. 3Bakadwa Isaya bakati, “Hezekiya kati, ‘Zhuba lino i zhuba le buyendasi, le kutjemegwa nele kubhakhwa nge shoni, lofanana ne mwana akafanila kuti atshibamiwe ngono mmeyabe basitjina simba le kuti bantshibame. 4Kungana kukabe kwashingikala kuti Yahwe Ndzimu uwo babe bahwa matama alebgwa ne nkulu we balauli be babhayani be Asiriya wakatumiwa ndi tetshi uwe kudadila Ndzimu unotjila, ngono pamwe banon'wotjemelela matama Yahwe Ndzimu uwo abahwa ealeba. Ndizo wali tembezelela malimbelimbe akasala.’ ” 5Thumwa dza Mambo Hezekiya dzakati dziswika kuna Isaya, 6Isaya kabe edzidwa eti, “Kadweni tetshi wenyu muti, ‘Yahwe bakati, Usitje tjimwe ngekwe matama iyawa awahwa, andatukwa ndiwo nge balanda ba mambo we Asiriya.
7“ ‘Bona, imi nge kwangu ndowolonga meya mu nli, ngono unowohwa makwayi, kabgwilila ku shango iye kwandinowothama kuti abulawe nge thumo mu shango iye.’ ”
Baasiriya banolakidza banganginilila
(2 Bomambo 19:8-19)
8Nkulu we balauli be babhayani be Asiriya kabgwilila ku shango iye, ngono kawana mambo we Asiriya egwa ne Libina, ngoti wakabe ahwa kuyi mambo bakabhuda mu Lakhishi. 9Senakheribu mambo we Asiriya kahwa kuti Mambo Tirihaka we Itopiya waswika kuwogwa naye. Wakati ehwa ikoku katuma bathu kuna Hezekiya ebadwa eti, 10“Kadweni Hezekiya mambo we Juda muti, ‘Musitongo tjebegwa nge Ndzimu wamunogalabgwe muuli nge ku mugadzabgwe kuti Jerusalema ayinga wile mu maboko a mambo we Asiriya.’ 11Bonani, makahwa tjakashingwa ndi bomambo be Asiriya mu shango dzose, bakadzilobesa. Ngono apa imwi mungatjila kene? 12Apa midzimu ye zwitjaba yakazwitjidza kene? Bakalobesiwa ndi botate bangu ndiaba, bathu be Gozani, Harani, Rezefu ne bathu be Edeni bakabe bali mu Telasari. 13Bangayi bomambo be Hamati ne Aripadi, bangayi be Sefarivaimu ne be Hena ne be Iviva?”
Ntembezelo wa Hezekiya
14Mambo Hezekiya kaamutjila lukwalo mu ntumwa ngono kagubala. Ngono kayenda nago ku Ng'umba ya Yahwe kaguwala mbeli kwa Yahwe. 15Ngono Hezekiya katembezela Yahwe kati, 16#Kufuluka 25:22“Imwi Yahwe Masimbawose, Ndzimu we Iziraela, imwi mu gele pezhugwi kwe dzikherubhu, imwi mu Ndzimu imwi muli moga mu mibuso yose ye shango, makathama kudzimu ne shango. 17Bhulutanani mu hwe, imwi Yahwe, ee mu hwe, mulinge nge mesho enyu mu bone imwi Yahwe, ihwani matama wose a Senakheribu aakazhisa kudadila Ndzimu unotjila. 18Yahwe, malebeswa bomambo be Asiriya bakathukudza zwitjaba ne shango dzazo, 19bakaposela midzimu yazo mu moto nenguba yakabe isi midzimu koga zwili zwithu zwakathamiwa nge maboko e bathu, kuli zwikuni ne mabgwe ndizo wali zwakakolomodziwa. 20Ndizo wali, Yahwe Ndzimu, mutigwile mu simba lile, kuti ndizo mibuso yose ye shango izibe kuti imwi moga ndimwi Yahwe.”
Kuwa kwa Senakherubu
(2 Bomambo 19:20-37)
21Ipapo Isaya nkololo wa Amozi katuma nthu kuna Hezekiya kunon'dwa eti, Yahwe Ndzimu we Iziraela bakati, Ndahwa kunditembezela kuko ngekwa Mambo Senakherubu we Asiriya, 22ngono dama lalebgwa ndi Yahwe nge kukwe yeli,
Mwanadi we Ziyoni unokuseka maanya,
unokudadila,
Nkololokadzi we Jerusalema
unokuzunguzila nsholo,
23wawakatuka ukadadila ndiani kene?
Ndiani kene wawaka milidzila hwi
ubonyabonya mesho uzwikudza?
Wakakuthamila Wakayengemala we Iziraela.
24Wakatuma balanda babo kudadila Yahwe,
wakalebeleka uti, Ndakatathila pezhugwi kwe matombo nge koloyi dzangu dzengwa njinji,
anoti ku midzibo ikule ye Lebanoni,
aligila pasi miti yako milefu inoyi misida,
ne misipuri yakanaka.
Ndakaswika pezhugwi kwayo,
angina mu ishaka tjayo tjakazwiyana.
25Ndakatsha matshime
ngono ang'wa vula,
ndakapkhwisa hwobana dzose dze Egipiti
nge matshambo angu.
26Awuzotongobe wahwa kene
kuti ndakakulongolosa ntolo ikoku kene?
Tjandinoshingikadza sangwenu
nge tjandakalongolosa ntolo,
tjekuti mizi mikulu ye matizhilo,
unoyipkhwanya ikasala ili matuluthulu e malala.
27Babaki bako bakapedziwa simba,
bakahwumana bakabhakhwa nge shoni,
bakafanana ne zwidzwalo zwimu nnda,
ne bushwa gutjibutjetjana gusathu gukasima,
nenge bushwa gwakamela pezhugwi kwe ng'umba,
gwapisiwa nge zhuba gusathu gukakula gukasima.
28“ ‘Ndoziba kwaunogala ne tjibaka tjaunomilika,
ndoziba kubhuda kuko ne kungina kuko,
ne kundimukila nge bushongola kuko.
29Ngoti wakandimukila nge bushongola,
ngono kuzwikudza kuko kukaswika mu zebe dzangu,
ndowokulonga pima mu tjimilo
ne tomu mu nlomo uwo,
ndowokubgwiliza nge zila yawakazha ndiyo.’
30“Tjilakidzo tjowobe etji ku kuli, Mu gole lino unowoja tjinozwimelegwa, muna linozha unowoja mazhamba atjo, koga muna le butatu udzwale, uvune, ulime minda ye mizhambi ngono uje mitjelo yayo. 31Malimbelimbe akatjila e ng'umba ya Juda anowokula se n'dzi unokula pasi ube ube ne thabi pezhugwi dzibe ne mitjelo. 32Ngoti malimbelimbe anowobhuda mu Jerusalema, mu Dombo le Ziyoni kowobhuda gupo le bakatjila. Kupisika kwa Yahwe Masimbawose ndiko kunowothama ikoku.
33“Ndizo wali tjinolebgwa ndi Yahwe ngekwa mambo we Asiriya ndiyetji, Aatowotshamba mu nzi nkulu iwoyu, akuna nsebe waanowoposa muuli, aatowoboneka mbeli kwawo akabhata tjiviko kene kuli kuukomba nge ngwa. 34Zila yaakazha ndiyo, ndiyo yaanowobgwilila ndiyo. Aatowotshamba mu nzi nkulu iwoyu, koleba Yahwe. 35Nzi nkulu iwoyu ndowoumila kuwutjidza, ndiuzwitjidzila kakale ndiutjidzila Dafite nlanda wangu.” 36Ipapo ntumwa wa Yahwe kayenda ku bukotokelo gwe Asiriya ngono kabulaya babhayani bali zwiwulu zwili zana lina makumi ali zhanakadzi lina mashanu (185 000). Lakati liyedza bose bakabe bafa bali zwitumbu koga. 37Mambo we Asiriya kabgwilila kanyi, ngono kanogala ku Ninive. 38Kwakati limwe zhuba atjanamata ndzimu uwe wakabe uyi Nishirokhi mu ng'umba yawo, Adiramelekhi na Shareze bakololo babe bakambulaya nge thumo, ngono bakatizhila ku shango ye Ararati. Ngono nkololo uwe Esarihadoni kan'gala thaka.
Kalanga Bible © Bible Society of Botswana, 2008, 2018.