Isaya 35
35
Ndzimu unowonyaladza
1Tjilambanyika ne shango yakawoma zowoshatha,
tjilambanyika tjowothinila tjikashatha,
tjowofanana ne luba.
2Tjowothinila tjikathinila
nge kushatha tjikamba.
Tjowopiwa gudzo le Lebanoni,
bubuya gwe Karimeli ne Sharoni.
Zowobona gudzo la Yahwe,
bubuya gwe Ndzimu wedu.
3 #
Bahebheru 12:12
Simisani maboko asakasima,
musimise ne zwidwi zwinotedukana.
4Idwa ibabo bana moyo ina kutja uti,
“Simani, musitje.
Ndzimu wenyu uyapo.
Unowozha kubgwilizila
nge shamu yakabangalala.
Unowozha ukamutjidza.”
5 #
Matewu 11:5; Luke 7:22 Ipapo mesho e mapofu anowobona,
ne zebe dze mabhubuzebe dzowohwa,
6ipapo zwilema zowotamba se phembgwe,
ne ndimi dze mbebebe dzowomba nge kushatha.
Vula dzowodwilila mu tjilambanyika,
hwobana dzikawunga mu tjilambanyika.
7Nsetje unopisa unowoshanduka ukabe dziba,
pasi pakawomelela panowobe nsenya,
panogala phungubgwe kowomela
bushwa ne shanga ne sengezi.
8Kowobe ne zila hwulo ikweno,
ngono inowodang'wa Zila yakayengemala.
Bakatemapala abatowoyenda muili,
koga inowobe zila ye bathu be Ndzimu.
Akuna n'yendi muili ungalashika
kene tjilengwe atjingalashike.
9Akuna shumba ingabe po muili,
kene tjibandana tjinozandabula akuna tjingatshamba muili,
azwitowowanika ikweno,
koga bakadzutunugwa banowoyenda muili.
10Ibabo bakadzutunugwa ba Yahwe banowobuya
ku Ziyoni bakashatha nge njimbo.
Kushatha kusingapele kowobe mubali.
Banowowana kushatha ne kupululudza,
buyendasi ne tjililo zowopela mu bali.
Kalanga Bible © Bible Society of Botswana, 2008, 2018.