Isaya 17
17
Siriya inowolobogwa
1 #
Jeremiya 49:23-27; Amosi 1:3-5; Zakhariya 9:1 Dama ngekwe Damasiko.
Bonani, Damasiko autjawobe nzi nkulu,
unowobe matuluthulu e matongo.
2Mizi mikulu ye Aroeri inowofulukigwa tjose,
inowobe malalo e zwithuwo
ngono akuna tjinozwitjisa.
3Mizi ye matizhilo inowopela mu Ifureimi,
ne bumambo gowopela mu Damasiko,
malimbelimbe e Aramu anowonga
gudzo le Baiziraela.
Koleba Yahwe masimbawose.
4Ngono mu zhuba ilelo gudzo la Jakubo lowoyisiwa pasi,
ne mmbili uwe wakakola unowowonda.
5Ngono kowofanana ne nvuni evuna mathunde amile
ngono evuna zwiyako nge maboko,
kube kunga nthu unonunga zwiyako zwe mathunde
asalila pa kuvungwa mu Nkuku wa Refaimu.
6Masalila anowosala muuli,
kufanana ne ntoba wapugwa,
kube kusala mitjelo mibili kene mitatu
mu thabi dzipezhugwizhugwi,
kene minna kene mishanu mu thabi
dzitjapasi dze nti we mitjelo.
Koleba Yahwe Ndzimu we Iziraela.
7Mu zhuba ilelo bathu banowoziba Mbumbi wabo ne mesho abo anowolinga kuna Wakayengemala we Iziraela, 8abatowolinga ku zwibeso zwe zwibhayilo, zwabakathama nge maboko abo, abatowolinga kuna zwakathamiwa nge zwinyala zwabo, kene kuli kulinga kuna Ashera kene kulinga ku zwibeso zwe motsha.
9Mu zhuba ilelo mizi mikulu ye matizhilo abo inowonga magalo e Bahivite ne Baamori yabakasiya betizhila ku zwishaka betizha bana be Iziraela, ngono inowobe matongo.
10Ngoti makakangang'wa Ndzimu we jidzo lenyu,
mukasikumbule Shongwe ye butshilo gwenyu,
ndizo ne mukadzwala zwidzwalo zwakanaka
mube mudzikila matadzwana kuthigamila midzimu ipoga,
11kene mungathama kuti ikule mu zhuba ilelo lamaidzwala,
mube muthama kuti izwale mu mangwanana amaidzwala
akuna tjinowovungwa muili
mu zhuba le kudziyila nele zogwadza zwisingapodzeke.
12Yee mme wee, kohwika nsindo we bathu banjinji,
nsindo wabo unonga we makungwa!
Kubomba kwe njudzi,
konga kusuma kwe vula njinji!
13Njudzi dzowona se vula ye mabilila njinji,
koga Ndzimu unowozwitjemela, ngono zowopalalila kutjena
se bunye gupaladziwa ne phepo pezhugwi kwe matombo
se malala ewulusiwa nge tjampupudze mu dutu.
14Mu madekwana, bonani kuna kutja!
Kowoti kusathu kukayedza banowobe basipo!
Ileli ndilo gobe le banotitolela,
mbhayilo we banotitapila.
Kalanga Bible © Bible Society of Botswana, 2008, 2018.