Isaya 14
14
Kubuya kutapiwa kwe Juda
1Yahwe banowohwila ngoni Jakubo, ndizo wali banowoshalula Baiziraela kakale ngono bakabagadza mu shango yabo, bazhi banowozwishanganya nabo bakabhatana ne ng'umba ya Jakubo. 2Zwitjaba zowobatola zwikabayisa ku magalo abo, ngono Baiziraela banowobathuwa mu shango ya Yahwe, banowobe balandalume ne balandakadzi babo. Banowotapa ibabo bakatongo batapa, bakabusa ibabo bakatongo batshambilidza.
Kuwa kwa mambo we Bhabhiloni
3Kowoti mu zhuba Yahwe labamunyalulusa mu kudziyila kwenyu ne mu phipiti ne kushinga kunolema kwamakashingisiwa, 4ipapo mowokuwelela mambo we Bhabhiloni sahwoku:
“Ntshambilidzi waswika mu bhelelo lile!
Bushongola guna bukomba gwapela!
5Yahwe bavuna lukombo gwe mbiimbi,
ludozo gwe bushe gwe babusi,
6igo gwabakaloba bathu ndigo bakagwadzamoyo
beloba nge kusingame,
igo gwakabusa njudzi nge bushongola
nge kudziidza kusina ngoni.
7Shango yose yakanyaluluka yakatebama,
bathu banomilidza bemba.
8Miti ye misipurasi inoshongozhela ngekwenyu,
misidara ye Lebanoni yakashatha inoti,
‘Tjinga kwawakalala pasi
akuna ntemi unozha kuhwotitema.’ ”
9Bugalo gwe bafi pasi gozunguzika
kukushanganidza ha uzha,
gomusa mitutshi kukulebesa,
bose bakabe bali batungamili be shango,
tjobamilidza mu zwigalo zwe bumambo,
bose bakabe bali bomambo be njudzi.
10Bose banowolebeleka
ngono banowoti ku kuli:
“Nawe auzotjasimabo saswi!
Wafanana koga naswi!”
11Kuzwikudza kuko kwayisiwa pasi ku bugalo gwe bafi
ne misindo ye zwilidzo zwizo,
wonye dzabe bulalo kusi kuko,
ne wonyana dzabe ngubo iyo.
12 #
Zumbunulo 8:10; 9:1 “Sekwawakawa ndiko kudwa kudzimu,
iwe nyenyedzi ye kuyedza, iwe nkololo we mazhokuyedza!
Sekwawathubugwa ukalashigwa pasi,
iwe wakatongo ladza zwitjaba pasi!
13 #
Matewu 11:23; Luke 10:15 Wakati ukati mu moyo uwo,
‘Ndowotathila kudzimu,
zhuzhugwi kwe nyenyedzi dze Ndzimu,
ndowogadza tjigalo tjangu tje bumambo zhuzhugwi,
ndowogala mu dombo le nshangano
kule ku bunandzwa.
14Ndowotathila pezhugwizhugwi kwe makole,
ndowozwithama anga Upezhugwizhugwi.’ ”
15Koga wayisiwa pasi ku bugalo gwe bafi,
mu phelelo dze gomba.
16Banowokubona banowokukaabalila,
bakakumbula nge kuko beti:
“Apa ndiye nlume wakathama shango ikatetema iwoyu,
ndiye kene wakazunguza mibuso?
17Apa ndiye wakathama shango ikanga tjilambanyika,
kakolomodza mizi yayo mikulu kene?
Ndiye wakabe asingaletje batapiwa babe bakayenda kanyi kene?”
18Bomambo bose be njudzi balele mu gudzo,
mmwe ne mmwe wabo mu ikumbu tjitje,
19koga iwe walashigwa kuzhe kwe ikumbu tjitjo
se lutabi kusingashakike,
wakafukidziwa ne bafi bakabhayiwa ne thumo,
ibabo banodelukila ku mabgwe e gomba,
se itumbu tjinotshambiwa nge makumbo.
20Awutowobiganyiwa kang'ompela nabo,
ngoti wakakolomodza shango iyo,
wakabulaya bathu babo.
“Bana be babiibi
akutjowolebgwa nge kwabo kakale.
21Lulwamisilani kulilita bakololo babe
ngekwe nlandu wa botate babo,
basitongodwa bemilika betola shango,
bebe bedwa bezhadza shango nge mizi mikulu.”
22Yahwe Masimbawose bakati, “Ndowomilika abhayana nabo.
Ndowolobesa zina le Bhabhiloni ne malimbelimbe,
bana nenge ludzi, Kolebeleka Yahwe.
23Ngono ndowouthama magalo e shoni,
ne madziba e vula,
ndowoulonga ntshwailo we golomodzo, kolebeleka Yahwe Masimbawose.”
24 #
Isaya 10:5-34; Nahumu 1:1—3:19; Zefaniya 2:13-15 Yahwe Masimbawose bakatuna bakati:
“Sekwandakalongolosa
ndiko kunowoshingikala,
ne tjandakazwimisila
nditjo tjinowobe itjo.
25Ndowolobesa N'asiriya mu shango yangu,
ngono ndowontshamba nge makumbo pezhugwi kwe matombo angu,
jokwi lile lowobhuda mu bali
ne ntolo uwe unowodusiwa mu mathudzi abo.”
26Awa ndiwo mazwimisilo azwimisigwe
ngekwe shango yose,
ikoku tjiazha tjakatambunudzigwa
njudzi dzose.
27Ngoti Yahwe Masimbawose bazwimisila kuthama ikoku,
ngono ndiyani kene ungabamisa?
Luboko gwabo gwakatambunuka,
ndiyani ngono ungagubuza?
28 #
2 Bomambo 16:20; 2 Zwiyitikalo 28:27 Mu gole lakafa Mambo Ahazi kwakazha ndaidzo eyi:
29 #
Jeremiya 47:1-7; Ezekiele 25:15-17; Jowele 3:4-8; Amosi 1:6-8; Zefaniya 2:4-7; Zakhariya 9:5-7 “Musishathe imwi mose Bafilisitiya,
ngoti ikombo tjakamurutha tjavunika,
ngoti kudwa mu ndzi we nyoka kobhuda itumbimilidzo,
mu mabumbulu atjo kube kubhuda bhophoma linowuluka.
30Mbano ye nshayi inowowana zojiwa,
ne unosheta unowolala akabakililika,
koga uwo ndzi ndowoubulaya nge bhamba,
ne malimbelimbe awo ndowoabulaya.
31Amba, iwe nkoba, iwe nzi nkulu lila,
pelegwani nge simba imwi mose Bafilisitiya!
Ngoti busi wogu godwa ku bunandzwa,
ngono akuna umile ega mu babhayani babe.”
32Dabilo ndiipi ingapiwa thumwa dze ludzi igogu kene?
“Yahwe ndibo bakabamba Ziyoni,
ndizo muuli bathu bawo badziidziwa banowowana dizhilo.”
Kalanga Bible © Bible Society of Botswana, 2008, 2018.