Hoseya 8
8
Kulasha malebeswa kwe Iziraela
1Longa lunyanga mu nlomo ugulidze!
Dzu lowuluka pezhugwi kwe ng'umba ya Yahwe
ngoti bathu bakatjinya tjidumano tjangu
ngono bakatjuluka nlayo wangu.
2Iziraela unondidana eti,
“Imwi Ndzimu wedu, tomuziba!”
3Iziraela wakalamba tjakanaka,
ngono tjita tjonlonda.
4Bakabiga bomambo kuzhe kwangu,
bakabiga makulukota basadumana nami.
Bakatola siliva yabo ne golide yabo
bakazwithamigwa midzimu
inowozhisa golomodzo ku bali.
5Samariya, lashila kutjena ndzimu uwo we ifano tje phulu!
Bushongola gwangu gwakalingisana nayo.
Kowotola tjibaka tjingapani basingatubule kube babuyanana kene?
6Kana inodwa mu Iziraela,
Phulu iyeyi yakabezhiwa nge mbezhi
ate ili Ndzimu.
Inowopkhwanyiwa ikabe zwiyenga
iyeyije phulu ye Samariya.
7Kana bakadzwala phepo,
ngono banowovuna tjampupudze.
Akuna lushanga gumile akuna tjiako,
akuna pangadwa bgwisa.
Ha kwabe kungadusa bgwisa
bataya babe bowoguja.
8Iziraela yamidziwa,
ngwenu wali bapakati kwe njudzi
se tjija tjisina nshingo.
9Ngoti bakayenda ku Asiriya,
banonga donki ye shango inoyendayenda yoga
Ifureimi wakazwitengesa ku badi.
10Nenguba bakazwitengesa mu zwitjaba,
ngwenu ndowobakubunganya.
Tjinyolotjo banowotangisa kutshinda
kusi kwe mitolo yabanosengeswa ndi mambo wakasima.
11Nenguba Ifureimi akabaka zwibeso kupisila zwibhayilo zwe tjibi,
koga zwibeso izwezo zwikabe zwe kuthama tjibi.
12Ndakankwalila kuli kunjinji kwe nlayo wangu,
koga kotogwa se tjithu tjisingazibgwe.
13Kene bendipa zwibhayilo zwibuya,
beja nyama yazo, koga abatoshathisa Yahwe.
Ndizo banowokumbula mbipo yabo
bakabalobela zwibi zwabo.
Banowobgwilila ku Egipiti.
14Iziraela wakakangang'wa Mbumbi uwe
ngono kabaka ng'umba dze bumambo,
Juda iye kawatsha mizi mikulu ye matizhilo.
Koga ndowotumila moto mu mizi yabo mikulu
ngono inowoja matizhilo abo.
Kalanga Bible © Bible Society of Botswana, 2008, 2018.